കാണാൻ ഏറെ കൗതുകമുള്ളവരാണെങ്കിലും സസ്തനികളിൽ വെച്ച് ഏറ്റവും അക്രമസ്വഭാവമുള്ള ജീവി മീർക്യാറ്റുകളാണെന്ന് ഗവേഷകർ. ആയിരത്തോളം സസ്തനികളിൽ നടത്തിയ ദീർഘകാല പഠനത്തിനൊടുവിലാണ് ശാസ്ത്രജ്ഞർ ഈ നിഗമനത്തിലെത്തിയത്. കീരി കുടുംബത്തിൽപ്പെട്ട ഇവയുടെ സ്വഭാവരീതികൾ കാട്ടിലെ മറ്റു കൊടുംക്രൂര മൃഗങ്ങളെപ്പോലും വെല്ലുന്നതാണെന്നാണ് കണ്ടെത്തൽ.
തെക്കൻ ആഫ്രിക്കയിലെ മരുഭൂമികളിലും പുൽമേടുകളിലുമാണ് മീർക്യാറ്റുകൾ പ്രധാനമായും കാണപ്പെടുന്നത്. ഏകദേശം 35 സെന്റിമീറ്റർ വരെ നീളമുള്ള ഇവയ്ക്ക് വീതിയുള്ള തലയും വലിയ കണ്ണുകളും നീളമുള്ള കാലുകളുമുണ്ട്. ഒറ്റയ്ക്ക് കഴിയാൻ ഇഷ്ടപ്പെടാത്ത ഈ ജീവികൾ 50 എണ്ണം വരെയുള്ള വലിയ സംഘങ്ങളായാണ് ജീവിക്കുന്നത്.
സ്വന്തം വർഗ്ഗത്തിൽപ്പെട്ട ജീവികളെ തന്നെ കൊന്നൊടുക്കുന്ന കാര്യത്തിൽ മീർക്യാറ്റുകൾ മുൻപന്തിയിലാണ്. മീർക്യാറ്റുകളുടെ ആകെ ജനസംഖ്യയിൽ 19 ശതമാനത്തോളം മരണപ്പെടുന്നത് സ്വന്തം വർഗ്ഗക്കാരുടെ തന്നെ ആക്രമണത്തിലൂടെയാണെന്നത് ഞെട്ടിക്കുന്ന വസ്തുതയാണ്. തങ്ങൾ ജീവിക്കുന്ന പ്രദേശം കൃത്യമായി അതിർത്തി തിരിക്കുന്ന ഇവർ, അന്യസംഘങ്ങൾ അതിക്രമിച്ചു കയറിയാൽ ക്രൂരമായ ആക്രമണവും കൂട്ടക്കൊലയും നടത്താൻ മടിക്കാറില്ല.
Also Read: വീട്ടിലെ പല്ലികൾ വിഷമുള്ളതാണോ? ഭയപ്പെടണോ വേണ്ടയോ? മിഥ്യയും യാഥാർത്ഥ്യവും – ശാസ്ത്രം പറയുന്നത് ഇതാണ്!
ആൺമൃഗങ്ങളേക്കാൾ കൂടുതൽ ആക്രമണകാരികൾ പെൺ മീർക്യാറ്റുകളാണ് എന്നതാണ് ഈ സ്പീഷീസിന്റെ പ്രത്യേകത. ഒരു കൂട്ടത്തിലെ പെൺനേതാവ് ചത്താൽ, അവശേഷിക്കുന്നവരിൽ ഏറ്റവും വലിപ്പവും പ്രായവുമുള്ള പെൺ മീർക്യാറ്റ് നേതൃത്വം ഏറ്റെടുക്കും. നേതാവായി മാറുന്നതോടെ ഈ പെൺജീവിയിൽ ഹോർമോൺ മാറ്റങ്ങൾ സംഭവിക്കുകയും ശരീരഭാരം വർ ദ്ധി ക്കുകയും ചെയ്യുന്നു. പുതിയ നേതാവാകുന്നതോടെ കൂട്ടത്തിലെ മറ്റ് പെൺജീവികളുമായി കലഹിക്കാനും തന്റെ അധികാരം നിലനിർത്താൻ പ്രതിയോഗികളെ വകവരുത്താനും ഇവ തയ്യാറാകും.
മനോഹരമായ കാഴ്ചയ്ക്കപ്പുറം, പ്രകൃതിയിലെ അതിജീവനത്തിനായി ഇത്രമേൽ അക്രമം പ്രവർത്തിക്കുന്ന മറ്റൊരു സസ്തനിയുമില്ലെന്നാണ് ഗവേഷകർ സാക്ഷ്യപ്പെടുത്തുന്നത്.
The post കാണാൻ പാവം, പക്ഷേ സ്വഭാവം ക്രൂരം; ലോകത്തിലെ ഏറ്റവും അക്രമകാരിയായ സസ്തനിയായി മീർക്യാറ്റുകൾ! appeared first on Express Kerala.