കോട്ടയം: കേരള കോൺഗ്രസ് (എം) യുഡിഎഫിലേക്ക് മടങ്ങുമെന്ന ചർച്ചകൾ ശക്തമാകുന്നതിനിടെ, മുന്നണി മാറ്റമില്ലെന്ന കർശന നിലപാടുമായി പാർട്ടി നേതൃത്വം. എൽഡിഎഫിൽ ഉറച്ചുനിൽക്കുമെന്ന് ആവർത്തിച്ച് വ്യക്തമാക്കിയിട്ടും യുഡിഎഫ് നേതാക്കൾ ക്ഷണം തുടരുന്നത് എന്തിനാണെന്ന് കേരള കോൺഗ്രസ് (എം) ജനറൽ സെക്രട്ടറി സ്റ്റീഫൻ ജോർജ് ചോദിച്ചു. പാർട്ടിയെ യുഡിഎഫിലേക്ക് ക്ഷണിക്കുന്നത് നിർത്തണമെന്നും അദ്ദേഹം ആവശ്യപ്പെട്ടു.
കേരള കോൺഗ്രസിന്റെ അടിത്തറ ഭദ്രമാണെന്നതിന് തെളിവാണ് യുഡിഎഫ് നേതാക്കളുടെ ഈ താൽപ്പര്യമെന്നും അദ്ദേഹം കൂട്ടിച്ചേർത്തു. ക്രൈസ്തവ വോട്ടുകൾ ഇടതുമുന്നണിയെ കൈവിട്ടു എന്ന പ്രചാരണം തെറ്റാണെന്നും വരാനിരിക്കുന്ന നിയമസഭാ തിരഞ്ഞെടുപ്പിൽ മധ്യകേരളത്തിൽ വലിയ തിരിച്ചുവരവ് നടത്താനാകുമെന്നും പാർട്ടി നേതൃത്വം ആത്മവിശ്വാസം പ്രകടിപ്പിച്ചു.
Also Read: ഭരണവിരുദ്ധ വികാരമില്ല, പരാജയകാരണങ്ങൾ പരിശോധിക്കും; ഫേസ്ബുക് പോസ്റ്റുമായി എം.വി. ഗോവിന്ദൻ
മുഖ്യമന്ത്രിയെ കണ്ട് ജോസ് കെ. മാണി
മുന്നണി മാറ്റ വാർത്തകൾ അടിസ്ഥാനരഹിതമാണെന്ന് പാർട്ടി ചെയർമാൻ ജോസ് കെ. മാണി മുഖ്യമന്ത്രി പിണറായി വിജയനെ നേരിട്ട് കണ്ട് ഉറപ്പുനൽകി. തിരുവനന്തപുരത്ത് നടന്ന കൂടിക്കാഴ്ചയിൽ, മാധ്യമങ്ങളിൽ വരുന്നത് വെറും സൃഷ്ടികൾ മാത്രമാണെന്നും ഒരു യുഡിഎഫ് നേതാവുമായും ചർച്ച നടത്തിയിട്ടില്ലെന്നും അദ്ദേഹം വ്യക്തമാക്കി. നിയമസഭാ തിരഞ്ഞെടുപ്പിൽ കോട്ടയം ഉൾപ്പെടെയുള്ള മേഖലകളിൽ ഇടതുമുന്നണിക്ക് മികച്ച വിജയം ഉറപ്പാക്കുമെന്നും ജോസ് കെ. മാണി മുഖ്യമന്ത്രിയെ അറിയിച്ചു.
The post യുഡിഎഫിലേക്ക് മടക്കമോ? എൽഡിഎഫിൽ ഉറച്ച് നിൽക്കും, ക്ഷണം ഇനി വേണ്ട; വെളിപ്പെടുത്തി സ്റ്റീഫൻ ജോർജ് appeared first on Express Kerala.