നാളെ കുർബാന കൂടാനും കേന്ദ്രത്തിന്റെ അനുമതി വേണോ? പ്രധാനമന്ത്രിക്കെതിരെ ജോസ് കെ മാണി

പാലാ: കേന്ദ്ര സർക്കാരിന്റെ ക്രൈസ്തവ വിരുദ്ധ നയങ്ങളെ രൂക്ഷമായി വിമർശിച്ച് കേരള കോൺഗ്രസ് (എം) നേതാവ് ജോസ് കെ മാണി. പ്രധാനമന്ത്രി നരേന്ദ്ര മോദി കേരളം സന്ദർശിക്കാനിരിക്കെ, ക്രൈസ്തവ സമൂഹത്തിന്റെ ആശങ്കകൾക്ക് അദ്ദേഹം മറുപടി പറയണമെന്ന് ജോസ് കെ മാണി ആവശ്യപ്പെട്ടു.

പ്രധാനമന്ത്രിയുടെ സന്ദർശനത്തെ പരിഹാസത്തോടെയാണ് ജോസ് കെ മാണി നേരിട്ടത്. “നാളെ കുർബാന കൂടാൻ പോലും കേന്ദ്രത്തിന്റെ അനുമതി വേണ്ടിവരുമോ?” എന്ന് അദ്ദേഹം ചോദിച്ചു. ആരാധനാലയങ്ങളുടെയും സന്നദ്ധ സംഘടനകളുടെയും വിദേശ ഫണ്ട് സ്വീകരിക്കാനുള്ള ലൈസൻസ് റദ്ദാക്കുന്ന നടപടിയെ അദ്ദേഹം ചോദ്യം ചെയ്തു. ഈസ്റ്റർ ദിനത്തിൽ പോലും എൻട്രൻസ് പരീക്ഷകൾ നടത്തുന്നത് ക്രൈസ്തവ വിശ്വാസത്തോടുള്ള അവഗണനയാണെന്ന് അദ്ദേഹം ചൂണ്ടിക്കാട്ടി. ഇക്കാര്യങ്ങളിൽ ബിജെപി ടിക്കറ്റിൽ മത്സരിക്കുന്ന ക്രൈസ്തവ സ്ഥാനാർത്ഥികൾ മറുപടി പറയണമെന്നും അദ്ദേഹം ആവശ്യപ്പെട്ടു.

Also Read: യുഡിഎഫ് സ്ഥാനാർത്ഥിയെ ജയിപ്പിച്ചാൽ ‘സൗജന്യ വിദേശയാത്ര’; മുസ്ലിം ലീഗ് നേതാവ് സി.പി ബാവ ഹാജിക്കെതിരെ കേസ്

യുഡിഎഫിൽ നിന്ന് പുറത്താക്കപ്പെട്ട ശേഷമുള്ള രാഷ്ട്രീയ സാഹചര്യങ്ങളെക്കുറിച്ചും ജോസ് കെ മാണി സംസാരിച്ചു. യുഡിഎഫിൽ ഉണ്ടായിരുന്നതിനേക്കാൾ ക്രിയാത്മകമായി കാര്യങ്ങളിൽ ഇടപെടാൻ എൽഡിഎഫിൽ സാധിക്കുന്നുണ്ട്. പ്രതിപക്ഷത്തിരുന്നതിനേക്കാൾ കൂടുതൽ കാര്യങ്ങൾ ഭരണപക്ഷത്തിരുന്ന് സർക്കാരിനെക്കൊണ്ട് ചെയ്യിക്കാൻ കഴിഞ്ഞു. എൽഡിഎഫിന് ഇത്തവണ തുടർഭരണമുണ്ടാകുമെന്നും തദ്ദേശ തെരഞ്ഞെടുപ്പിലെ വോട്ട് വിഹിതം വർദ്ധിപ്പിച്ചത് ഇതിന്റെ സൂചനയാണെന്നും അദ്ദേഹം പറഞ്ഞു.

മത്സരിക്കുകയാണെങ്കിൽ അത് പാലായിൽ തന്നെയാകണമെന്നത് തന്റെ ഉറച്ച തീരുമാനമായിരുന്നു. ജനങ്ങളുമായി എന്നും അടുത്തുനിൽക്കുന്ന നേതാവായ താൻ ചെയ്യാൻ കഴിയുന്ന കാര്യങ്ങൾ മാത്രമേ പറയാറുള്ളൂവെന്നും അദ്ദേഹം കൂട്ടിച്ചേർത്തു. അനാവശ്യ വിവാദങ്ങളേക്കാൾ പ്രവൃത്തിയിലാണ് താൻ വിശ്വസിക്കുന്നതെന്നും അതുകൊണ്ടാണ് മാധ്യമങ്ങളിൽ നിന്ന് വിട്ടുനിൽക്കുന്നതെന്നും അദ്ദേഹം വ്യക്തമാക്കി.

The post നാളെ കുർബാന കൂടാനും കേന്ദ്രത്തിന്റെ അനുമതി വേണോ? പ്രധാനമന്ത്രിക്കെതിരെ ജോസ് കെ മാണി appeared first on Express Kerala.