എഐ ലോകത്തെ കീഴടക്കാൻ ഓപ്പൺഎഐ; പ്രൊഫഷണലുകൾക്കായി പുതിയ സർട്ടിഫിക്കേഷൻ കോഴ്‌സുകൾ

നിർമ്മിത ബുദ്ധി മേഖലയിൽ പ്രായോഗിക വൈദഗ്ധ്യം നേടാൻ ആഗ്രഹിക്കുന്നവർക്കായി ഓപ്പൺഎഐ തങ്ങളുടെ ആദ്യത്തെ ഔദ്യോഗിക സർട്ടിഫിക്കേഷൻ കോഴ്‌സുകൾ പുറത്തിറക്കി. പ്രൊഫഷണലുകൾക്കും അധ്യാപകർക്കും എഐ സാങ്കേതികവിദ്യ ഫലപ്രദമായി ഉപയോഗിക്കാൻ പ്രാപ്തരാക്കുക എന്നതാണ് ഈ പ്രോഗ്രാമിന്റെ ലക്ഷ്യം. ഇതിൽ ശ്രദ്ധേയമായ ‘എഐ ഫൗണ്ടേഷൻസ്’ എന്ന കോഴ്‌സ് നേരിട്ട് ചാറ്റ്ജിപിടിയിലൂടെ തന്നെ പൂർത്തിയാക്കാൻ സാധിക്കും. നിലവിൽ വൻകിട കമ്പനികളിൽ പരീക്ഷണാടിസ്ഥാനത്തിൽ നടപ്പിലാക്കുന്ന ഈ പദ്ധതി, അധ്യാപകർക്കായി പ്രത്യേകം രൂപകൽപ്പന ചെയ്ത പരിശീലന പരിപാടികളും വാഗ്ദാനം ചെയ്യുന്നുണ്ട്.

ആഗോള തൊഴിൽ വിപണിയിൽ എഐ അധിഷ്ഠിത വൈദഗ്ധ്യമുള്ളവർക്ക് ഉയർന്ന ശമ്പളവും പരിഗണനയും ലഭിക്കുന്ന സാഹചര്യത്തിലാണ് ഓപ്പൺഎഐയുടെ ഈ നീക്കം. ആഴ്ചയിൽ 800 ദശലക്ഷത്തിലധികം ആളുകൾ ചാറ്റ്ജിപിടി ഉപയോഗിക്കുന്നുണ്ടെന്നാണ് കണക്കുകൾ സൂചിപ്പിക്കുന്നത്. മാറുന്ന സമ്പദ്‌വ്യവസ്ഥയിൽ ദശലക്ഷക്കണക്കിന് ആളുകളെ തൊഴിൽസജ്ജരാക്കുക എന്ന ലക്ഷ്യത്തോടെയാണ് ഓപ്പൺഎഐ ഈ പദ്ധതിയുടെ രണ്ടാം ഘട്ടം ആരംഭിച്ചിരിക്കുന്നത്. സാങ്കേതിക വിദ്യയിലെ മാറ്റങ്ങൾക്കൊപ്പം മുന്നേറാൻ ആഗ്രഹിക്കുന്നവർക്ക് ഈ സർട്ടിഫിക്കേഷൻ വലിയൊരു മുതൽക്കൂട്ടാകും.

Also Read: ചന്ദ്രനിൽ ആണവ നിലയം, ആകാശത്ത് സ്വർണ്ണ താഴികക്കുടം! ട്രംപിന്റെ ബഹിരാകാശ വിപ്ലവം വെറുംവാക്കാണോ അതോ ലോകം പേടിക്കണോ?

ചാറ്റ്ജിപിടിയിലൂടെ എഐ പഠിക്കാം

ഓപ്പൺഎഐ അവതരിപ്പിക്കുന്ന ‘എഐ ഫൗണ്ടേഷൻസ്’ കോഴ്‌സ് ചാറ്റ്ജിപിടിയിലൂടെ നേരിട്ട് പഠിക്കാനുള്ള സൗകര്യമാണ് ഒരുങ്ങുന്നത്. വിവിധ എഐ ജോലികൾ പ്രായോഗികമായി പരിശീലിക്കാനും സംശയങ്ങൾക്ക് അപ്പപ്പോൾ തന്നെ മറുപടി നേടാനും പഠന പുരോഗതി വിലയിരുത്താനും ഈ സംവിധാനത്തിലൂടെ സാധിക്കും. കോഴ്സ് വിജയകരമായി പൂർത്തിയാക്കുന്നവർക്ക് വ്യവസായ ലോകം അംഗീകരിക്കുന്ന സർട്ടിഫിക്കറ്റ് ലഭിക്കും. കൂടാതെ, അധിക പ്രോജക്റ്റുകളും കോഴ്‌സുകളും പൂർത്തിയാക്കുന്നവർക്ക് ഓപ്പൺഎഐയുടെ ഔദ്യോഗിക സർട്ടിഫിക്കേഷനും സ്വന്തമാക്കാം. ഇത് ഉദ്യോഗാർത്ഥികളുടെ പ്രൊഫഷണൽ മൂല്യം വർദ്ധിപ്പിക്കാൻ സഹായിക്കും.

പഠനത്തിനൊപ്പം ജോലിയും

വെറുമൊരു പരിശീലന കോഴ്‌സ് എന്നതിലുപരി, പഠനം കഴിഞ്ഞാലുടൻ തൊഴിൽ ഉറപ്പാക്കുന്ന ഒരു സംവിധാനമാണ് ഓപ്പൺഎഐ വിഭാവനം ചെയ്യുന്നത്. ഇതിനായി പ്രശസ്ത തൊഴിൽ പ്ലാറ്റ്‌ഫോമായ ‘ഇൻഡീഡു’മായി (Indeed) അവർ കൈകോർത്തു കഴിഞ്ഞു. കൂടാതെ ‘അപ്‌വർക്കുമായുള്ള’ (Upwork) സഹകരണം കൂടുതൽ വിപുലീകരിക്കുകയും ചെയ്തു. എഐ സർട്ടിഫിക്കേഷൻ നേടിയവരെയും മികച്ച കമ്പനികളെയും തമ്മിൽ നേരിട്ട് ബന്ധിപ്പിക്കുന്ന ഒരു ‘ജോബ് പ്ലാറ്റ്‌ഫോം’ ആണ് ഓപ്പൺഎഐയുടെ അടുത്ത ലക്ഷ്യം. ഇതുവഴി ദശലക്ഷക്കണക്കിന് ആളുകൾക്ക് പുതിയ എഐ മേഖലകളിൽ മികച്ച തൊഴിലവസരങ്ങൾ ലഭ്യമാകുമെന്ന് കമ്പനി കരുതുന്നു.
The post എഐ ലോകത്തെ കീഴടക്കാൻ ഓപ്പൺഎഐ; പ്രൊഫഷണലുകൾക്കായി പുതിയ സർട്ടിഫിക്കേഷൻ കോഴ്‌സുകൾ appeared first on Express Kerala.