രമേഷ് പിഷാരടിക്കെതിരെ മഹിളാ മോർച്ചയുടെ പരാതി; സ്ത്രീവിരുദ്ധ പരാമർശം നടത്തിയെന്ന് ആരോപണം

പാലക്കാട് നിയമസഭാ ഉപതിരഞ്ഞെടുപ്പ് പ്രചാരണം ചൂടുപിടിക്കുന്നതിനിടെ യുഡിഎഫ് സ്ഥാനാർത്ഥി രമേഷ് പിഷാരടിക്കെതിരെ മഹിളാ മോർച്ച പരാതി നൽകി. പിഷാരടി സ്ത്രീവിരുദ്ധ പരാമർശം നടത്തിയെന്നും സ്ത്രീത്വത്തെ അപമാനിച്ചെന്നും ആരോപിച്ച് മഹിളാ മോർച്ച ജില്ലാ പ്രസിഡന്റ് കവിതാ മേനോനാണ് ജില്ലാ പോലീസ് മേധാവിക്ക് പരാതി നൽകിയത്. വിഷയത്തിൽ പിഷാരടിക്കെതിരെ കർശന നടപടി സ്വീകരിക്കണമെന്നാണ് സംഘടനയുടെ ആവശ്യം.

തിരഞ്ഞെടുപ്പ് പ്രചാരണത്തിനായി വടക്കന്തറയിലെത്തിയ രമേഷ് പിഷാരടിയെ ബിജെപി വനിതാ കൗൺസിലറുടെ നേതൃത്വത്തിൽ തടഞ്ഞതോടെയാണ് വിവാദങ്ങൾക്ക് തുടക്കമായത്. എന്നാൽ വോട്ട് ചോദിക്കുന്നത് തടഞ്ഞതല്ലെന്നും, പിഷാരടിയുടെ സ്ത്രീവിരുദ്ധ നിലപാടുകളോടുള്ള പ്രതിഷേധമാണെന്നുമാണ് എൻഡിഎ സ്ഥാനാർത്ഥി ശോഭാ സുരേന്ദ്രൻ വിശദീകരിച്ചത്. വിഷയത്തിൽ പിഷാരടി പരസ്യമായി മാപ്പുപറയണമെന്നും ബിജെപി നേതൃത്വം ആവശ്യപ്പെട്ടു.

സംവിധായകൻ രഞ്ജിത്ത് ലൈംഗിക പീഡനക്കേസിൽ ഉൾപ്പെട്ടതുമായി ബന്ധപ്പെട്ട് മാധ്യമപ്രവർത്തകർ ചോദിച്ച ചോദ്യത്തിന് പിഷാരടി നൽകിയ മറുപടിയാണ് വിവാദത്തിന് ആധാരം. പീഡനാരോപണങ്ങൾ വ്യക്തിപരമായ കാര്യങ്ങളല്ലേ എന്നും അതിൽ അഭിപ്രായം പറയേണ്ടതുണ്ടോ എന്നുമുള്ള പിഷാരടിയുടെ പ്രതികരണം സ്ത്രീവിരുദ്ധമാണെന്നാണ് ബിജെപിയുടെ ആരോപണം. അതേസമയം, ബിജെപി പ്രവർത്തകർ തന്നെ തടഞ്ഞ സംഭവത്തിൽ നിയമനടപടിക്കില്ലെന്നും ബാക്കി കാര്യങ്ങൾ ജനങ്ങൾ വിലയിരുത്തട്ടെയെന്നുമാണ് രമേഷ് പിഷാരടിയുടെ നിലപാട്.

The post രമേഷ് പിഷാരടിക്കെതിരെ മഹിളാ മോർച്ചയുടെ പരാതി; സ്ത്രീവിരുദ്ധ പരാമർശം നടത്തിയെന്ന് ആരോപണം appeared first on Express Kerala.