ബീജിംഗ്: ഗതാഗത ലോകത്തെ വിസ്മയിപ്പിച്ച് ചൈനയുടെ അതിവേഗ മാഗ്ലേവ് ട്രെയിൻ പുതിയ ലോകറെക്കോഡ് കുറിച്ചു. വെറും രണ്ട് സെക്കൻഡിനുള്ളിൽ മണിക്കൂറിൽ 700 കിലോമീറ്റർ വേഗത കൈവരിച്ചാണ് ഈ മാഗ്ലേവ് (Maglev) ട്രെയിൻ ചരിത്രം കുറിച്ചത്. ചൈനയിലെ നാഷണൽ യൂണിവേഴ്സിറ്റി ഓഫ് ഡിഫൻസ് ടെക്നോളജിയിലെ ഗവേഷകർ വികസിപ്പിച്ചെടുത്ത ഈ സംവിധാനം, ലോകത്തിലെ ഏറ്റവും വേഗതയേറിയ ‘സൂപ്പർകണ്ടക്റ്റിംഗ് ഇലക്ട്രിക് മാഗ്ലേവ്’ ട്രെയിനായി മാറി. 400 മീറ്റർ നീളമുള്ള പ്രത്യേക ട്രാക്കിൽ നടത്തിയ പരീക്ഷണത്തിൽ ഒരു ടൺ ഭാരമുള്ള വാഹനം സുരക്ഷിതമായി നിർത്താനും ഗവേഷകർക്ക് സാധിച്ചു എന്നത് ഈ നേട്ടത്തിന്റെ മാറ്റ് കൂട്ടുന്നു.
Also Read: പൃഥ്വിരാജിന്റെ ഗ്യാരേജിൽ ‘രാജാവ്’ എത്തി; പോർഷെ 911 GT3 ടൂറിംഗ് സ്വന്തമാക്കി താരം! വില 3.5 കോടി രൂപ
കാന്തികശക്തി ഉപയോഗിച്ച് ട്രാക്കിൽ സ്പർശിക്കാതെ വായുവിൽ പൊങ്ങിനിന്നാണ് ഈ ട്രെയിൻ സഞ്ചരിക്കുന്നത്. അതിശക്തമായ സൂപ്പർകണ്ടക്റ്റിംഗ് കാന്തങ്ങൾ ഉപയോഗിക്കുന്നതിനാൽ ഘർഷണം (Friction) ഇല്ലാതെ മിന്നൽ വേഗത്തിൽ കുതിക്കാൻ ഇതിന് സാധിക്കും. അതിവേഗം വിദൂര നഗരങ്ങളെ ബന്ധിപ്പിക്കാൻ സഹായിക്കുന്ന ഈ സാങ്കേതികവിദ്യ, വാക്വം കുഴലുകളിലൂടെ സഞ്ചരിക്കുന്ന ‘ഹൈപ്പർലൂപ്പ്’ ഗതാഗത സംവിധാനത്തിലേക്കുള്ള നിർണ്ണായകമായ ചുവടുവെപ്പാണ്. കഴിഞ്ഞ ജനുവരിയിൽ കൈവരിച്ച 648 കിലോമീറ്റർ വേഗതയാണ് പത്ത് വർഷത്തെ കഠിനാധ്വാനത്തിലൂടെ ഗവേഷകർ ഇപ്പോൾ 700 കടത്തിയിരിക്കുന്നത്.
യാത്രകൾക്ക് മാത്രമല്ല, ബഹിരാകാശ ഗവേഷണ രംഗത്തും ഈ കണ്ടുപിടുത്തം വലിയ വിപ്ലവം സൃഷ്ടിക്കും. വൈദ്യുതകാന്തിക ഊർജ്ജം ഉപയോഗിച്ചുള്ള ഈ ത്വരിതപ്പെടുത്തൽ രീതി വിമാനങ്ങൾക്കും റോക്കറ്റുകൾക്കും കുറഞ്ഞ ഇന്ധനച്ചെലവിൽ കൂടുതൽ വേഗത്തിൽ വിക്ഷേപണം നടത്താൻ സഹായിക്കും. മുപ്പത് വർഷത്തിലേറെയായി മാഗ്ലേവ് സാങ്കേതികവിദ്യയിൽ ഗവേഷണം നടത്തുന്ന ചൈന, ഈ റെക്കോഡ് നേട്ടത്തോടെ ആഗോള ഗതാഗത സാങ്കേതിക വിദ്യയിൽ തങ്ങളുടെ ആധിപത്യം ഒരിക്കൽ കൂടി ഉറപ്പിച്ചിരിക്കുകയാണ്.
The post കൺചിമ്മുന്ന വേഗത്തിൽ ചൈനയുടെ മാഗ്ലേവ്; മണിക്കൂറിൽ 700 കി.മീ വേഗതയെന്ന ലോകറെക്കോഡ് കുറിച്ച് അതിവേഗ ട്രെയിൻ appeared first on Express Kerala.
