വിരലിട്ട് മൂക്ക് വൃത്തിയാക്കുന്നവരാണോ നിങ്ങൾ? എങ്കിൽ ഈ 5 കാര്യങ്ങൾ നിർബന്ധമായും അറിഞ്ഞിരിക്കണം

നമ്മുടെ ശ്വസനവ്യവസ്ഥയുടെ പ്രധാന കാവൽക്കാരനാണ് മൂക്ക്. പൊടിപടലങ്ങളും രോഗാണുക്കളും ശ്വാസകോശത്തിൽ എത്താതിരിക്കാൻ മൂക്കിലെ സ്ലേഷ്മം (Mucus) അവയെ തടഞ്ഞുനിർത്തുന്നു. ഇവ ഉണങ്ങി കട്ടിയാകുമ്പോഴാണ് മൂക്കിനുള്ളിൽ അസ്വസ്ഥത അനുഭവപ്പെടുന്നത്. സാധാരണഗതിയിൽ മൂക്കിനുള്ളിലെ ചെറിയ രോമങ്ങൾ ഈ അവശിഷ്ടങ്ങളെ വിഴുങ്ങുകയും വയറ്റിലെത്തി നശിപ്പിക്കുകയും ചെയ്തുകൊണ്ട് മൂക്കിനെ സ്വയം വൃത്തിയാക്കാറുണ്ട്.

എന്നാൽ, അമിതമായി മൂക്ക് ചൊരണ്ടുന്നതും മൂക്കിലെ അവശിഷ്ടങ്ങൾ ബലമായി നീക്കം ചെയ്യുന്നതും ആരോഗ്യത്തിന് ദോഷകരമാണെന്ന് പഠനങ്ങൾ പറയുന്നു.

മൂക്ക് ചൊരണ്ടുന്നതും അൽഷിമേഴ്‌സും തമ്മിലുള്ള ബന്ധം

2022-ൽ ഓസ്‌ട്രേലിയയിലെ ഗ്രിഫിത്ത് യൂണിവേഴ്‌സിറ്റിയിലെ ശാസ്ത്രജ്ഞർ നടത്തിയ പഠനത്തിൽ മൂക്ക് ചുരണ്ടുന്ന ശീലവും ഡിമെൻഷ്യയും (മറവിരോഗം) തമ്മിൽ ബന്ധമുണ്ടെന്ന് കണ്ടെത്തി. എലികളിൽ നടത്തിയ ഈ പഠനം പറയുന്നത് ഇങ്ങനെയാണ്.

മൂക്കിനുള്ളിലെ മൃദുവായ കോശങ്ങൾക്ക് കേടുപാടുകൾ സംഭവിക്കുമ്പോൾ, ക്ലമീഡിയ ന്യുമോണിയ പോലുള്ള ബാക്ടീരിയകൾക്ക് തലച്ചോറിലേക്ക് നേരിട്ട് പ്രവേശിക്കാൻ എളുപ്പമാകും.

ഈ ബാക്ടീരിയകളുടെ സാന്നിധ്യം അൽഷിമേഴ്‌സ് രോഗത്തിന് സമാനമായ ലക്ഷണങ്ങൾ തലച്ചോറിൽ ഉണ്ടാക്കാൻ കാരണമായേക്കാം.

Also Read: വാഹനമോടിക്കുമ്പോൾ സംസാരിക്കാറുണ്ടോ? നിങ്ങളുടെ കണ്ണുകൾ നിങ്ങളെ ചതിച്ചേക്കാം; പുതിയ പഠനം പുറത്ത്

മൂക്ക് സുരക്ഷിതമായി വൃത്തിയാക്കാൻ 5 വഴികൾ

വിരലുകൾ ഉപയോഗിച്ച് മൂക്ക് ചുരണ്ടുന്നതിന് പകരം താഴെ പറയുന്ന മാർഗ്ഗങ്ങൾ പരീക്ഷിക്കാവുന്നതാണ്.

ഉപ്പുവെള്ളം ഉപയോഗിച്ചുള്ള ശുചീകരണം: ഒരു ടീസ്പൂൺ അയോഡൈസ് ചെയ്യാത്ത ഉപ്പ് രണ്ട് കപ്പ് ചെറുചൂടുള്ള തിളപ്പിച്ചാറിയ വെള്ളത്തിൽ കലർത്തുക. ഒരു നാസാരന്ധ്രത്തിലൂടെ ഈ വെള്ളം ഒഴിച്ച് മറ്റേതിലൂടെ പുറത്തുവിടുന്നത് കഫവും അലർജിയും നീക്കം ചെയ്യാൻ സഹായിക്കും.

സലൈൻ നാസൽ സ്പ്രേ: ഡോക്ടറുടെ നിർദ്ദേശപ്രകാരം ലഭിക്കുന്ന സ്പ്രേകൾ ഉപയോഗിക്കുന്നത് മൂക്കിനുള്ളിലെ ഈർപ്പം നിലനിർത്താനും കട്ടിയായ അഴുക്കിനെ ലയിപ്പിക്കാനും സഹായിക്കും. ഇത് കുട്ടികൾക്കും മുതിർന്നവർക്കും ഒരുപോലെ ഫലപ്രദമാണ്.

ആവി പിടിക്കുക: തിളച്ച വെള്ളത്തിൽ നിന്ന് വരുന്ന ആവി ശ്വസിക്കുന്നത് കഫം സ്വാഭാവികമായി അയയാൻ സഹായിക്കും. ഇതിൽ യൂക്കാലിപ്റ്റസ് ഓയിൽ കൂടി ചേർത്താൽ കൂടുതൽ ആശ്വാസം ലഭിക്കും.

മൃദുവായി ചീറ്റുക: ഒരു നാസാരന്ധ്രം അടച്ചുപിടിച്ച് മറ്റേതിലൂടെ വളരെ മൃദുവായി വായു പുറത്തുവിട്ട് ടിഷ്യു ഉപയോഗിച്ച് മൂക്ക് വൃത്തിയാക്കുക. ശക്തിയായി ചീറ്റുന്നത് ചെവിയിൽ മർദ്ദം വർദ്ധിപ്പിക്കാൻ കാരണമാകും.

ജലാംശവും ഹ്യുമിഡിഫയറും: ധാരാളം വെള്ളം കുടിക്കുന്നത് ശരീരത്തിലെ കഫം നേർത്തതാക്കാൻ സഹായിക്കും. കൂടാതെ, രാത്രിയിൽ കിടപ്പുമുറിയിൽ ഹ്യുമിഡിഫയർ ഉപയോഗിക്കുന്നത് വായുവിലെ ഈർപ്പം നിലനിർത്താനും മൂക്ക് വരളുന്നത് തടയാനും സഹായിക്കും.
The post വിരലിട്ട് മൂക്ക് വൃത്തിയാക്കുന്നവരാണോ നിങ്ങൾ? എങ്കിൽ ഈ 5 കാര്യങ്ങൾ നിർബന്ധമായും അറിഞ്ഞിരിക്കണം appeared first on Express Kerala.