പുതുവത്സരാഘോഷങ്ങളുടെ ആവേശത്തിൽ രാജ്യം മുഴുകാനിരിക്കെ, ഓൺലൈൻ ഡെലിവറി മേഖലയെ പ്രതിസന്ധിയിലാഴ്ത്തി ഗിഗ് തൊഴിലാളികൾ രാജ്യവ്യാപക പണിമുടക്കിന് ആഹ്വാനം ചെയ്തു. സൊമാറ്റോ, സ്വിഗ്ഗി, ബ്ലിങ്കിറ്റ്, സെപ്റ്റോ, ആമസോൺ തുടങ്ങിയ പ്രമുഖ പ്ലാറ്റ്ഫോമുകളിലെ ലക്ഷക്കണക്കിന് തൊഴിലാളികളാണ് നാളെ (ഡിസംബർ 31) ജോലിയിൽ നിന്നും വിട്ടുനിൽക്കുന്നത്. കുറഞ്ഞ വേതനം, തൊഴിൽ സുരക്ഷയില്ലായ്മ, അമിതമായ ജോലിഭാരം എന്നിവയ്ക്കെതിരെ പ്രതിഷേധിച്ചാണ് ഈ അപ്രതീക്ഷിത നീക്കം. തെലങ്കാന ഗിഗ് ആൻഡ് പ്ലാറ്റ്ഫോം വർക്കേഴ്സ് യൂണിയനും ഇന്ത്യൻ ഫെഡറേഷൻ ഓഫ് ആപ്പ്-ബേസ്ഡ് ട്രാൻസ്പോർട്ട് വർക്കേഴ്സും സംയുക്തമായാണ് സമരത്തിന് നേതൃത്വം നൽകുന്നത്.
Also Read: ജമ്മു കശ്മീരിൽ ഇരു വിഭാഗങ്ങൾ തമ്മിൽ ഏറ്റുമുട്ടി; ജാഗ്രതയോടെ പൊലീസ്
തൊഴിലാളികളുടെ ജീവൻ പണയപ്പെടുത്തിയുള്ള ’10 മിനിറ്റ് ഡെലിവറി’ രീതി അടിയന്തരമായി അവസാനിപ്പിക്കണമെന്നതാണ് സമരക്കാരുടെ പ്രധാന ആവശ്യം. ഡെലിവറി വേഗത കൂട്ടാനായി ട്രാഫിക് നിയമങ്ങൾ ലംഘിക്കേണ്ടി വരുന്നതും അപകടങ്ങൾ വർദ്ധിക്കുന്നതും ചൂണ്ടിക്കാട്ടിയാണ് ഈ ആവശ്യം ഉയർന്നിരിക്കുന്നത്. കൂടാതെ, സുതാര്യമായ വേതന ഘടന നടപ്പിലാക്കുക, അപകട ഇൻഷുറൻസ്, പെൻഷൻ തുടങ്ങിയ സാമൂഹിക സുരക്ഷാ ആനുകൂല്യങ്ങൾ ഉറപ്പാക്കുക, ജോലിസ്ഥലത്ത് മാന്യമായ സാഹചര്യം ഒരുക്കുക എന്നിവയും ഇവർ ആവശ്യപ്പെടുന്നു. മെട്രോ നഗരങ്ങളെയും പ്രധാന ടയർ-2 നഗരങ്ങളെയും സമരം സാരമായി ബാധിക്കുമെന്നാണ് സൂചന.
പുതുവത്സര തലേന്ന് ഓൺലൈൻ ഓർഡറുകളിൽ വൻ വർദ്ധനവ് പ്രതീക്ഷിക്കുന്ന റസ്റ്റോറന്റ് ഉടമകളെയും ഉപഭോക്താക്കളെയും ഈ സമരം വലിയ പ്രതിസന്ധിയിലാക്കും. തൊഴിലാളികളുടെ ന്യായമായ ആവശ്യങ്ങൾ അംഗീകരിക്കാതെ പിന്നോട്ടില്ലെന്ന നിലപാടിലാണ് യൂണിയനുകൾ.
തൊഴിലാളികളുടെ പ്രധാന ആവശ്യങ്ങൾ ഒറ്റനോട്ടത്തിൽ:
സുരക്ഷ: അപകടങ്ങൾ ക്ഷണിച്ചുവരുത്തുന്ന പത്ത് മിനിറ്റ് ഡെലിവറി സമ്പ്രദായം പിൻവലിക്കുക.
ആനുകൂല്യങ്ങൾ: അപകട ഇൻഷുറൻസും പെൻഷൻ പദ്ധതികളും അനുവദിക്കുക.
വേതനം: സുതാര്യമായ പ്രതിഫലവും നിശ്ചിത വിശ്രമ ഇടവേളകളോടു കൂടിയ മാന്യമായ ജോലി സമയവും ഉറപ്പാക്കുക.
മാന്യത: ജോലിസ്ഥലത്തും ഉപഭോക്താക്കളിൽ നിന്നും മാന്യമായ പെരുമാറ്റം ഉറപ്പാക്കുക.
The post പുതുവത്സരാഘോഷങ്ങൾക്ക് ‘പണി’ കിട്ടും; സൊമാറ്റോയും സ്വിഗ്ഗിയും ഉൾപ്പെടെ രാജ്യവ്യാപക ഡെലിവറി പണിമുടക്കിലേക്ക് appeared first on Express Kerala.