മഞ്ഞപ്പടയുടെ ഹൃദയം തകർന്നു! ഇനി ലൂണയില്ല; ബ്ലാസ്റ്റേഴ്സ് വിട്ട് താരം വിദേശത്തേക്ക്, ഔദ്യോഗിക സ്ഥിരീകരണം

മഞ്ഞപ്പടയുടെ ആരാധകർക്ക് ഹൃദയഭേദകമായ വാർത്തയോടെയാണ് പുതുവർഷം പിറന്നിരിക്കുന്നത്. കേരള ബ്ലാസ്റ്റേഴ്സിന്റെ ഇതിഹാസ താരം അഡ്രിയാൻ ലൂണ ഈ സീസണിൽ ക്ലബ്ബിനായി കളിക്കില്ല. കേരള ബ്ലാസ്റ്റേഴ്‌സ് തങ്ങളുടെ സോഷ്യൽ മീഡിയ പേജുകളിലൂടെ ഔദ്യോഗികമായാണ് ഈ വിവരം ആരാധകരെ അറിയിച്ചത്.

ലോൺ അടിസ്ഥാനത്തിൽ വിദേശ ക്ലബ്ബിലേക്ക്

2025–26 സീസണിൽ ലൂണ ഒരു വിദേശ ക്ലബ്ബിന് വേണ്ടി ലോൺ അടിസ്ഥാനത്തിൽ കളിക്കുമെന്നാണ് ബ്ലാസ്റ്റേഴ്സ് അറിയിച്ചിരിക്കുന്നത്. ക്ലബ്ബും താരവും തമ്മിലുള്ള പരസ്പര ധാരണയുടെ അടിസ്ഥാനത്തിലാണ് ഈ തീരുമാനമെന്നും മാനേജ്‌മെന്റ് വ്യക്തമാക്കി. നാല് വർഷമായി ബ്ലാസ്റ്റേഴ്സിന്റെ മിടിപ്പായിരുന്ന ലൂണ ക്ലബ്ബ് വിടുന്നത് ആരാധകർക്ക് വലിയ ആഘാതമാണ് സൃഷ്ടിച്ചിരിക്കുന്നത്.

Also Read: കപ്പടിക്കാനുറച്ച് കംഗാരുപ്പട! ലോകകപ്പിനുള്ള ഓസ്‌ട്രേലിയൻ ടീമിനെ പ്രഖ്യാപിച്ചു

ബ്ലാസ്റ്റേഴ്സിലെ ലൂണ യുഗം

2021-ലാണ് അഡ്രിയാൻ ലൂണ കേരള ബ്ലാസ്റ്റേഴ്സിലെത്തുന്നത്. നാല് വർഷത്തിനിടെ 87 മത്സരങ്ങളിൽ മഞ്ഞക്കുപ്പായമണിഞ്ഞ താരം 15 ഗോളുകൾ നേടിയിട്ടുണ്ട്. വെറുമൊരു കളിക്കാരൻ എന്നതിലുപരി ബ്ലാസ്റ്റേഴ്സിന്റെ വികാരമായിരുന്നു ലൂണ. എന്നാൽ കഴിഞ്ഞ സീസണിൽ ടീമിനും ലൂണയ്ക്കും പ്രതീക്ഷിച്ച പ്രകടനം പുറത്തെടുക്കാൻ സാധിച്ചിരുന്നില്ല.

പ്രതിസന്ധിയിലായ ഐഎസ്എൽ

ഇന്ത്യൻ ഫുട്ബോളിനെ പിടിച്ചുലച്ച പ്രതിസന്ധികളും ഐഎസ്എൽ പാതിവഴിയിൽ മുടങ്ങിയതും ലൂണയെ ഏറെ നിരാശപ്പെടുത്തിയിരുന്നു. ലീഗ് പുനരാരംഭിക്കണമെന്ന് ലൂണ ഇന്ത്യൻ ഫുട്ബോൾ ഫെഡറേഷനോട് പരസ്യമായി അപേക്ഷിച്ചതും വാർത്തയായിരുന്നു. നിലവിൽ വളരെ കുറഞ്ഞ ചിലവിൽ പുതിയ സീസൺ നടത്താനുള്ള ആലോചനയിലാണ് ഓൾ ഇന്ത്യ ഫുട്ബോൾ ഫെഡറേഷൻ.
The post മഞ്ഞപ്പടയുടെ ഹൃദയം തകർന്നു! ഇനി ലൂണയില്ല; ബ്ലാസ്റ്റേഴ്സ് വിട്ട് താരം വിദേശത്തേക്ക്, ഔദ്യോഗിക സ്ഥിരീകരണം appeared first on Express Kerala.