ഡേറ്റിംഗ് ആപ്പുകൾ ഇനി ‘ജോബ് പോർട്ടലുകൾ’; ലിങ്ക്ഡ്ഇൻനെ കൈവിട്ട് ഉദ്യോഗാർത്ഥികൾ!

ന്യൂയോര്‍ക്ക്: അമേരിക്കൻ തൊഴിൽ വിപണിയിൽ വിപ്ലവകരമായ മാറ്റങ്ങൾ സംഭവിക്കുന്നതായി പുതിയ റിപ്പോർട്ടുകൾ. പ്രൊഫഷണൽ നെറ്റ്‌വർക്കിംഗിനായി ലിങ്ക്ഡ്ഇൻ പോലുള്ള പ്ലാറ്റ്‌ഫോമുകളെ ആശ്രയിക്കുന്നതിന് പകരം, ടിൻഡർ, ബംബിൾ തുടങ്ങിയ ഡേറ്റിംഗ് ആപ്പുകൾ വഴി ജോലി കണ്ടെത്തുന്നവരുടെ എണ്ണം വർധിക്കുന്നു. റെസ്യൂം ബിൽഡർ ഡോട്ട് കോം നടത്തിയ സർവ്വേയെ ഉദ്ധരിച്ച് ബ്ലൂംബെർഗാണ് ഈ കൗതുകകരമായ വിവരം പുറത്തുവിട്ടത്. ഡേറ്റിംഗ് ആപ്പുകൾ ഇപ്പോൾ സുഹൃത്തുക്കളെ ഉണ്ടാക്കുന്നതിൽ മാത്രമല്ലെന്നും പ്ലെയ്‌സ്‌മെന്‍റ്, റഫറലുകൾ, അഭിമുഖങ്ങൾ, പ്രൊഫഷണൽ നെറ്റ്‌വർക്കിംഗ് എന്നിവയ്ക്കും ഉപയോഗിക്കുന്നുണ്ടെന്നാണ് ഈ സർവ്വേ പറയുന്നത്.

സർവ്വേയിലെ പ്രധാന കണ്ടെത്തലുകൾ

കഴിഞ്ഞ വർഷം അമേരിക്കയിലെ ഡേറ്റിംഗ് ആപ്പ് ഉപയോക്താക്കളിൽ ഏകദേശം മൂന്നിലൊന്ന് പേരും തൊഴിൽ സംബന്ധമായ ആവശ്യങ്ങൾക്കായി ഈ പ്ലാറ്റ്‌ഫോമുകൾ ഉപയോഗിച്ചു. പ്രൊഫഷണൽ നെറ്റ്‌വർക്കിംഗ്, ജോലി അവസരങ്ങൾ, അഭിമുഖങ്ങൾ, മെന്റർഷിപ്പ് എന്നിവയ്ക്കായി ഉദ്യോഗാർത്ഥികൾ ഇപ്പോൾ ഡേറ്റിംഗ് പ്രൊഫൈലുകളെ ഉപയോഗിക്കുന്നു. ഇത്തരത്തിൽ ഡേറ്റിംഗ് ആപ്പുകൾ വഴി ബന്ധപ്പെടുന്നവർക്ക് പെട്ടെന്ന് ജോലി ഓഫറുകൾ ലഭിക്കുന്നതായും സർവ്വേ ചൂണ്ടിക്കാട്ടുന്നു.

Also Read: ജിമ്മില്ല, ട്രെയിനറില്ല; ചാറ്റ് ജിപിടി വഴി 27 കിലോ കുറച്ച് യുവാവ്!

എന്തുകൊണ്ട് ഡേറ്റിംഗ് ആപ്പുകൾ

പരമ്പരാഗത ജോബ് പോർട്ടലുകളിൽ നിന്ന് വ്യത്യസ്തമായി ഡേറ്റിംഗ് ആപ്പുകളെ തൊഴിലന്വേഷകർ തിരഞ്ഞെടുക്കാൻ ചില പ്രത്യേക കാരണങ്ങളുണ്ട്. റെസ്യൂമെകൾക്ക് അപ്പുറം ഉദ്യോഗാർത്ഥിയുടെ വ്യക്തിത്വം പ്രകടിപ്പിക്കാൻ ഇവിടെ സാധിക്കുന്നു. സംഭാഷണങ്ങൾ കൂടുതൽ നേരിട്ടുള്ളതും അനൗദ്യോഗികവുമാണ്. പ്രൊഫൈലുകളിൽ നൽകിയിരിക്കുന്ന കമ്പനിയുടെ പേരോ ഉദ്യോഗപ്പേരോ നോക്കി കൃത്യമായ ആളുകളിലേക്ക് എത്താൻ സാധിക്കുന്നു. നേരിട്ട് ഹ്യൂമൻ റിസോഴ്സ് ഉദ്യോഗസ്ഥരോടോ മാനേജർമാരോടോ സംസാരിക്കാൻ ഈ പ്ലാറ്റ്‌ഫോമുകൾ വഴിയൊരുക്കുന്നു. തുടക്കക്കാർക്ക് മാത്രമല്ല, പരിചയസമ്പന്നരായ പ്രൊഫഷണലുകൾക്കും കരിയർ മാറ്റത്തിനും മെന്റർമാരെ കണ്ടെത്തുന്നതിനും ഈ രീതി ഉപകരിക്കുന്നു. കടുത്ത മത്സരമുള്ള തൊഴിൽ വിപണിയിൽ മറ്റുള്ളവരിൽ നിന്ന് വേറിട്ടുനിൽക്കാനും കൂടുതൽ ഹ്യൂമൻ ടച്ച് നിലനിർത്താനുമാണ് ഉദ്യോഗാർത്ഥികൾ ഡേറ്റിംഗ് ആപ്പുകളെ ഇപ്പോൾ പ്രൊഫഷണൽ ടൂളാക്കി മാറ്റുന്നത്.
The post ഡേറ്റിംഗ് ആപ്പുകൾ ഇനി ‘ജോബ് പോർട്ടലുകൾ’; ലിങ്ക്ഡ്ഇൻനെ കൈവിട്ട് ഉദ്യോഗാർത്ഥികൾ! appeared first on Express Kerala.