ക്ഷേമപ്രവർത്തനങ്ങൾ ആരുടെയും ഔദാര്യമല്ല, അവകാശമാണ്; സ്വാതന്ത്ര്യദിന സന്ദേശവുമായി മുഖ്യമന്ത്രി വി.ഡി. സതീശൻ

തിരുവനന്തപുരം: ക്ഷേമപ്രവർത്തനങ്ങൾ ജനാധിപത്യ സംവിധാനത്തിൽ ആരുടെയും ഔദാര്യമല്ല, മറിച്ച് പൗരന്റെ അവകാശമാണെന്ന് മുഖ്യമന്ത്രി വി.ഡി. സതീശൻ. സ്വാതന്ത്ര്യ ദിനത്തോടനുബന്ധിച്ച് തിരുവനന്തപുരം സെൻട്രൽ സ്റ്റേഡിയത്തിൽ ദേശീയ പതാക ഉയർത്തി സംസാരിക്കുകയായിരുന്നു അദ്ദേഹം. കനത്ത ദുരന്തമുഖത്തുനിന്ന് അതിജീവിച്ചാണ് കേരളം മുന്നോട്ടുപോരുന്നതെന്നും, നഷ്ടങ്ങൾക്ക് പകരമാകാൻ ഒന്നിനും കഴിയില്ലെങ്കിലും സർക്കാർ ആ കുടുംബങ്ങളെ എപ്പോഴും ചേർത്തുപിടിക്കുമെന്നും മുഖ്യമന്ത്രി വ്യക്തമാക്കി.

ഏത് വലിയ പ്രതിസന്ധിയെയും ഒറ്റക്കെട്ടായി നിന്ന് അതിജീവിക്കാൻ കേരളത്തിന് കഴിയുന്നുണ്ടെന്ന് അദ്ദേഹം പറഞ്ഞു. പ്രളയദുരന്തങ്ങളെ ശാസ്ത്രീയമായ സമീപനങ്ങളിലൂടെയാണ് സർക്കാർ നേരിടുന്നത്. ജാതി, മതം, ലിംഗവിവേചനം, രാഷ്ട്രീയ അന്ധത, വിദ്വേഷം എന്നിവയെല്ലാം വെടിഞ്ഞ് എല്ലാവരും ഒറ്റക്കെട്ടായി മുന്നേറണം. മതേതരത്വവും ജനാധിപത്യ ബോധവും തുല്യതയുമാണ് നമ്മുടെ യഥാർത്ഥ കരുത്തും ഊർജ്ജവുമെന്നും, അതിൽ യാതൊരു വിട്ടുവീഴ്ചയുമുണ്ടാകില്ലെന്നും മുഖ്യമന്ത്രി കൂട്ടിച്ചേർത്തു.

Also Read:‘വിക്ഷിത് ഭാരത് 2047’! നൂറാം സ്വാതന്ത്ര്യദിനത്തിൽ ലോകം ഇന്ത്യയെ വ്യത്യസ്തമായി നോക്കിക്കാണും; പ്രധാനമന്ത്രി നരേന്ദ്ര മോദി

പട്ടിണി, രോഗം, തൊഴിലില്ലായ്മ എന്നിവ ഏതൊരു ജനതയെയും പിന്നോട്ട് വലിക്കുന്ന പ്രധാന വിപത്തുകളാണ്. സ്വാതന്ത്ര്യം ലഭിച്ച് 79 വർഷങ്ങൾ പിന്നിടുമ്പോഴും രാജ്യത്തും കേരളത്തിലും ഇവ ഇനിയും അവശേഷിക്കുന്നു എന്നത് കയ്പായ യാഥാർത്ഥ്യമാണ്. എന്നാൽ ലോകവും രാജ്യവും കേരളവും പ്രത്യേകമായ ഒരു ഘട്ടത്തിലൂടെ കടന്നുപോകുമ്പോൾ, നമ്മുടെ യുവതയാണ് രാജ്യത്തിന്റെ യഥാർത്ഥ സമ്പത്ത് എന്ന് സമീപകാല സംഭവങ്ങൾ തെളിയിക്കുന്നു. സമൂഹത്തിൽ ശക്തമായ തിരുത്തൽ ശക്തിയാകാനും, ഭാവിയിൽ രാജ്യത്തെ തെളിമയോടെ നയിക്കാനുമുള്ള വലിയ കരുത്ത് ഇന്നത്തെ യുവതലമുറയ്ക്കുണ്ടെന്നും മുഖ്യമന്ത്രി ഓർമ്മിപ്പിച്ചു.

The post ക്ഷേമപ്രവർത്തനങ്ങൾ ആരുടെയും ഔദാര്യമല്ല, അവകാശമാണ്; സ്വാതന്ത്ര്യദിന സന്ദേശവുമായി മുഖ്യമന്ത്രി വി.ഡി. സതീശൻ appeared first on Express Kerala.