വാണിയംകുളത്ത് തെരുവുനായയുടെ കടിയേറ്റ പശു പേവിഷബാധയേറ്റ് ചത്തു | Palakkad Vaniyamkulam cow rabies death

പാലക്കാട്: വാണിയംകുളത്ത് തെരുവുനായയുടെ കടിയേറ്റ പശു പേവിഷബാധയേറ്റ് ചത്തു. പനയൂർ മേലേക്കാട്ടിൽ കോത–ദാക്ഷായനി ദമ്പതികൾ വളർത്തിയിരുന്ന പശുവാണ് ദാരുണമായി ചത്തത് (Palakkad Vaniyamkulam cow rabies death). പശുവും ആടും വളർത്തൽ പ്രധാന വരുമാനമാർഗ്ഗമായുള്ള ഈ കുടുംബത്തിന് കനത്ത തിരിച്ചടിയാണ് സംഭവിച്ചിരിക്കുന്നത്.

ജൂലൈ 27-ന് രാത്രി തൊഴുത്തിൽ കയറിയ തെരുവുനായ പശുവിനെ ആക്രമിക്കുകയായിരുന്നു. സംഭവത്തിന് തൊട്ടുപിന്നാലെ വെറ്ററിനറി ഡോക്ടറെത്തി പേവിഷബാധ പ്രതിരോധ കുത്തിവയ്പ് നൽകിയിരുന്നുവെങ്കിലും രണ്ട് ദിവസം മുൻപ് പശുവിൽ വീണ്ടും പേവിഷബാധയുടെ ലക്ഷണങ്ങൾ പ്രകടമാവുകയായിരുന്നു. തുടർന്ന് നടത്തിയ പരിശോധനയിൽ രോഗബാധ സ്ഥിരീകരിക്കുകയും ഞായറാഴ്ച ഉച്ചയോടെ പശു ചാവുകയുമായിരുന്നു.

നായയുടെ ആക്രമണത്തിൽ കുടുംബത്തിന്റെ കൈവശമുള്ള മറ്റൊരു പശുവിനും നേരിയ പരിക്കേറ്റിരുന്നു. എന്നാൽ നിലവിൽ ഈ പശുവിന് ആരോഗ്യപ്രശ്നങ്ങളൊന്നുമില്ലെന്ന് ഉടമകൾ വ്യക്തമാക്കി. വാണിയംകുളം പഞ്ചായത്തിന്റെ വിവിധ ഭാഗങ്ങളിൽ തെരുവുനായ ശല്യം അതീവ രൂക്ഷമാണെന്നും ഇതിനെതിരെ അധികൃതർ അടിയന്തര നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.

Story Summary: A cow owned by a couple in Vaniyamkulam, Palakkad, died of rabies after being bitten by a stray dog despite receiving post-bite vaccination.