നിയമം ലംഘിച്ച് മലിനജലം തള്ളിയാൽ ലക്ഷം ദിർഹം പിഴ! ടാങ്കറുകൾ പിടിച്ചെടുക്കും; കർശന മുന്നറിയിപ്പുമായി ദുബായ് മുനിസിപ്പാലിറ്റി

ദുബായ്: അനധികൃതമായി മലിനജലം തള്ളുന്ന വാഹനങ്ങൾക്കും വ്യക്തികൾക്കുമെതിരെ നടപടി കടുപ്പിച്ച് ദുബായ് മുനിസിപ്പാലിറ്റി. അധികൃതർ നിശ്ചയിച്ചിട്ടുള്ള സ്ഥലങ്ങളിലല്ലാതെ മലിനജലം ഒഴുക്കുന്ന ടാങ്കറുകൾ പിടിച്ചെടുക്കുന്നതുൾപ്പെടെയുള്ള കർശന നിയമനടപടികൾ സ്വീകരിച്ചു തുടങ്ങിയതായി അധികൃതർ അറിയിച്ചു. ഇത്തരം ഗുരുതര നിയമലംഘനങ്ങൾക്ക് 1,00,000 (ഒരു ലക്ഷം) ദിർഹം വരെയാണ് പിഴ ഈടാക്കുന്നത്. പൊതുശുചിത്വവും പരിസ്ഥിതി സുരക്ഷയും നിർവചിക്കുന്ന 2015-ലെ റെസല്യൂഷൻ നമ്പർ 14 പ്രകാരമാണ് നടപടി.

പരിസ്ഥിതി മലിനീകരണത്തിന്റെ തോതനുസരിച്ച് വ്യത്യസ്ത രീതിയിലാണ് പിഴകൾ നിശ്ചയിച്ചിരിക്കുന്നത്. പൊതുസ്ഥലങ്ങളിലോ ബീച്ചുകളിലോ മാലിന്യം തള്ളിയാൽ 1,000 ദിർഹവും, ഉപയോഗിച്ച എണ്ണ റോഡുകളിലേക്കോ മലിനജല സംവിധാനങ്ങളിലേക്കോ ഒഴുക്കിയാൽ 3,000 ദിർഹവുമാണ് പിഴ. കൂടാതെ അപകടകരമായ വ്യാവസായിക-നിർമാണ മാലിന്യങ്ങൾ നിക്ഷേപിക്കുന്നതിന് 5,000 ദിർഹവും, മലിനജലം പൊതുറോഡുകളിലേക്ക് ചോർന്നൊഴുകാൻ ഇടയാക്കിയാൽ 10,000 ദിർഹവും പിഴ നൽകേണ്ടി വരും. റെഡി-മിക്സ് കോൺക്രീറ്റ് വാഹനങ്ങളിൽ നിന്ന് റോഡുകളിൽ മാലിന്യം വീണാൽ 50,000 ദിർഹമാണ് ശിക്ഷ.

Also Read: യാചിക്കരുത്, നല്ല പണികിട്ടും..! ഉംറ തീർത്ഥാടകർക്ക് കടുത്ത മുന്നറിയിപ്പുമായി പാകിസ്ഥാൻ എംബസി

മലിനജലവും മറ്റ് മാലിന്യങ്ങളും തുറസ്സായ സ്ഥലങ്ങളിൽ തള്ളുന്നത് പൊതുജനാരോഗ്യത്തിനും പരിസ്ഥിതിക്കും വലിയ ഭീഷണിയാണെന്ന് ദുബായ് മുനിസിപ്പാലിറ്റി വ്യക്തമാക്കി. ഇത്തരം ലംഘനങ്ങൾ തടയാൻ വരും ദിവസങ്ങളിലും പരിശോധന കർശനമാക്കും. നിയമം പാലിക്കാൻ എല്ലാവരും ബാധ്യസ്ഥരാണെന്നും അധികൃതർ ഓർമ്മിപ്പിച്ചു.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (AI SOURCES)

The post നിയമം ലംഘിച്ച് മലിനജലം തള്ളിയാൽ ലക്ഷം ദിർഹം പിഴ! ടാങ്കറുകൾ പിടിച്ചെടുക്കും; കർശന മുന്നറിയിപ്പുമായി ദുബായ് മുനിസിപ്പാലിറ്റി appeared first on Express Kerala.