വിജയ്‌യെ രാഷ്ട്രീയമായി നേരിടാൻ വയ്യ, അതുകൊണ്ട് തൃഷയെ ലക്ഷ്യം വെക്കുന്നു; പൊട്ടിത്തെറിച്ച് സഞ്ജന ഗൽറാണി!

തമിഴ്നാട് മുഖ്യമന്ത്രി വിജയ്‌യുടെ ഭരണനേട്ടങ്ങളെ രാഷ്ട്രീയമായി നേരിടാൻ കഴിയാതെ വരുമ്പോൾ, അദ്ദേഹത്തിന്റെ വ്യക്തിജീവിതത്തിലേക്ക് ശ്രദ്ധ തിരിക്കാൻ പ്രതിപക്ഷം തൃഷയെ കരുവാക്കുകയാണെന്ന ആരോപണവുമായി നടി സഞ്ജന ഗൽറാണി. തമിഴ്നാട് സർക്കാർ സംഘടിപ്പിച്ച സ്വാതന്ത്ര്യദിനാഘോഷ ചടങ്ങിൽ മുഖ്യമന്ത്രിയുടെ മാതാപിതാക്കൾക്കൊപ്പം തൃഷ പങ്കെടുത്തതും, തുടർന്നുണ്ടായ വിവാദങ്ങളും വലിയ ചർച്ചകൾക്ക് വഴിവെച്ചിരിക്കെയാണ് സഞ്ജനയുടെ പിന്തുണയുമായുള്ള രംഗപ്രവേശം. വിജയ്‌യുടെ രാഷ്ട്രീയ നേട്ടങ്ങളെ വിമർശിക്കാൻ കഴിയാത്തതുകൊണ്ടാണ് ഒരു സ്ത്രീയെ ലക്ഷ്യം വെച്ചുകൊണ്ട് വ്യക്തിപരമായ ആക്രമണങ്ങൾ നടത്തുന്നതെന്ന് സഞ്ജന കുറ്റപ്പെടുത്തി.

കോട്ട് സെന്റ് ജോർജിൽ നടന്ന ചടങ്ങിൽ തൃഷയ്ക്ക് ലഭിച്ച പ്രാധാന്യത്തെ ഡി.എം.കെ മുഖപത്രമായ ‘മുരശൊലി’ രൂക്ഷമായി വിമർശിച്ചിരുന്നു. മുഖ്യമന്ത്രിയുടെ ഓഫീസിന്റെ അന്തസ്സ് കളങ്കപ്പെടുത്തുന്നതാണ് ഇതെന്ന് ആരോപിച്ചായിരുന്നു മുഖപ്രസംഗം. എന്നാൽ, ഇത് തൃഷയുടെ വ്യക്തിപരമായ തിരഞ്ഞെടുപ്പാണെന്നും, അവരെ വിധിക്കാൻ ആർക്കും അവകാശമില്ലെന്നും സഞ്ജന തുറന്നടിച്ചു. “വിജയ്‌യുടെ രാഷ്ട്രീയ നേട്ടങ്ങളെക്കുറിച്ച് സംസാരിക്കൂ, പോരായ്മകളെക്കുറിച്ച് പറയൂ. അതിനപ്പുറം ഒരു സ്ത്രീയെ ലക്ഷ്യം വെക്കുന്നത് അങ്ങേയറ്റം സങ്കടകരമാണ്. അവർ തമ്മിലുള്ള സൗഹൃദമോ ബന്ധമോ എന്തുതന്നെയായാലും, തൃഷ അർഹിക്കുന്ന ബഹുമാനം അവർക്ക് നൽകണം,” സഞ്ജന പറഞ്ഞു.

ALSO READ;ഭാര്യ ഇടനിലക്കാരി, പത്തുലക്ഷം കൈക്കൂലി! കേന്ദ്ര മന്ത്രാലയത്തിലെ സാമ്പത്തിക ഉപദേഷ്ടാവ് സി.ബി.ഐ പിടിയിൽ

അതേസമയം, മുഖ്യമന്ത്രിയെന്ന നിലയിൽ വിജയ്‌യുടെ പ്രവർത്തനങ്ങളെ സഞ്ജന ഗൽറാണി വാനോളം പുകഴ്ത്തി. ചുരുങ്ങിയ കാലയളവിനുള്ളിൽ റോഡ് വികസനം, ജലവിതരണ സംവിധാനങ്ങളുടെ അറ്റകുറ്റപ്പണി, സർക്കാർ ആശുപത്രികളിലെ സ്വർണ്ണനാണയ പദ്ധതി തുടങ്ങിയവ നടപ്പിലാക്കി മികച്ച ഭരണാധികാരിയായി മാറാൻ വിജയ്ക്ക് കഴിഞ്ഞിട്ടുണ്ടെന്നും അവർ അവകാശപ്പെട്ടു. വിജയ്‌യുടെ സോഷ്യൽ മീഡിയ ടീം ജനങ്ങളുടെ പ്രശ്നങ്ങൾ വേഗത്തിൽ പരിഹരിക്കുന്നതിൽ വലിയ പങ്കുവഹിക്കുന്നുണ്ടെന്നും, അദ്ദേഹം കേവലം ഒരു നടനല്ല, മറിച്ച് കാര്യക്ഷമതയുള്ള ഒരു രാഷ്ട്രീയക്കാരനായാണ് വളരുന്നതെന്നും സഞ്ജന കൂട്ടിച്ചേർത്തു.

ഭാവിയിൽ പ്രധാനമന്ത്രി സ്ഥാനത്തേക്കുപോലും പരിഗണിക്കപ്പെടാൻ സാധ്യതയുള്ള രീതിയിലാണ് വിജയ്‌യുടെ ജനപ്രീതി ഉയരുന്നത്. രാഷ്ട്രീയ അഭിപ്രായവ്യത്യാസങ്ങൾ പ്രൊഫഷണൽ രീതിയിൽ ചർച്ച ചെയ്യപ്പെടേണ്ടതാണെന്നും, വ്യക്തിപരമായ ആക്രമണങ്ങൾ അവസാനിപ്പിക്കണമെന്നും ആവശ്യപ്പെട്ടുകൊണ്ടുള്ള സഞ്ജനയുടെ പ്രതികരണം തമിഴ്നാട് രാഷ്ട്രീയത്തിൽ പുതിയ വിവാദങ്ങൾക്ക് തിരികൊളുത്തിയിരിക്കുകയാണ്.

The post വിജയ്‌യെ രാഷ്ട്രീയമായി നേരിടാൻ വയ്യ, അതുകൊണ്ട് തൃഷയെ ലക്ഷ്യം വെക്കുന്നു; പൊട്ടിത്തെറിച്ച് സഞ്ജന ഗൽറാണി! appeared first on Express Kerala.