യുവതിയെ ചൊല്ലിയുള്ള തർക്കം: നാഗ്പൂരിൽ കുപ്രസിദ്ധ ഗുണ്ടയെ സുഹൃത്ത് കുത്തിക്കൊലപ്പെടുത്തി | Nagpur gangster Gaurav Ragde murder

നാഗ്പുർ: യുവതിയെ ചൊല്ലിയുള്ള തർക്കത്തെ തുടർന്ന് നാഗ്പൂരിൽ കുപ്രസിദ്ധ ഗുണ്ടയെ സുഹൃത്ത് കുത്തിക്കൊലപ്പെടുത്തി (Nagpur gangster Gaurav Ragde murder). നിരവധി ക്രിമിനൽ കേസുകളിലെ പ്രതിയായ ഗൗരവ് പങ്കജ് റഗ്ഡെ (27) ആണ് കൊല്ലപ്പെട്ടത്. സംഭവത്തിൽ ഇയാളുടെ സുഹൃത്ത് ഗൗരവ് റാംഭാവു റൗട്ട്, കൂട്ടാളി അഭിഷേക് വാസ്നിക് എന്നിവരെ പോലീസ് അറസ്റ്റ് ചെയ്തു. നരേന്ദ്ര നഗറിലുള്ള സുന്ദർബൻ പ്രദേശത്താണ് സംഭവം നടക്കുന്നത്.

രണ്ടാഴ്ച മുൻപാണ് കേസിൽ ജാമ്യത്തിലിറങ്ങിയ റഗ്ഡെ നാഗ്പൂരിൽ തിരിച്ചെത്തിയത്. മുംബൈ സ്വദേശിനിയായ യുവതിയുമായി റഗ്ഡെ മുൻപ് പ്രണയത്തിലായിരുന്നു. എന്നാൽ ഇയാൾ ജയിലിലായിരുന്ന സമയത്ത് യുവതി ഇയാളുടെ സുഹൃത്തായ റാംഭാവു റൗട്ടുമായി പ്രണയത്തിലാവുകയും ഒന്നിച്ച് താമസമാക്കുകയും ചെയ്തു. റൗട്ട് കുറ്റകൃത്യങ്ങൾ അവസാനിപ്പിച്ച് ക്ലൗഡ് കിച്ചൺ ബിസിനസ് നടത്തുകയായിരുന്നു. ഇതേച്ചൊല്ലി പ്രതികാരബുദ്ധിയോടെ എത്തിയ റഗ്ഡെ, റൗട്ടിന്റെ വാടകവീട്ടിലെത്തി സാധനങ്ങൾ തല്ലിത്തകർത്തു.

തുടർന്ന് രക്ഷപ്പെടാൻ ശ്രമിച്ച റൗട്ടിനെയും കൂട്ടാളികളെയും റഗ്ഡെ പിന്തുടരുകയും ഇരുവിഭാഗങ്ങളും തമ്മിൽ തെരുവിൽ വെച്ച് ഏറ്റുമുട്ടുകയുമായിരുന്നു. അടിപിടിക്കിടെ നിലത്തുവീണ റഗ്ഡെയെ റൗട്ടും വാസ്നിക്കും ചേർന്ന് കത്തികൊണ്ട് കുത്തിക്കൊലപ്പെടുത്തുകയായിരുന്നു. സംഭവം കണ്ടുനിന്നവർ പകർത്തിയ ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ പട്രോളിങ് പോലീസ് പ്രതികളെ ഉടൻ തന്നെ പിന്തുടർന്ന് പിടികൂടി. കൊല്ലപ്പെട്ട റഗ്ഡെ നാഗ്പൂരിലെ പ്രശസ്തമായ ഗംചു വധക്കേസ് ഉൾപ്പെടെ ഒൻപതോളം ക്രിമിനൽ കേസുകളിൽ പ്രതിയാണ്.

Story Summary:
Notorious criminal Gaurav Pankaj Ragde was stabbed to death in Nagpur by his friend Rambhau Raut following a dispute over a woman, leading to the arrest of two suspects.