ബാങ്ക് അക്കൗണ്ടുകൾ കാലിയാക്കാൻ പുതിയ തന്ത്രം; ഗൂഗിളിന്റെ ‘ഫയർബേസ്’ ദുരുപയോഗം ചെയ്ത് വൻ തട്ടിപ്പ്!

പ്രമുഖ ബാങ്കുകളുടെയും ഔദ്യോഗിക സർക്കാർ പദ്ധതികളുടെയും പേരിൽ വ്യാജ ആപ്പുകളും വെബ്സൈറ്റുകളും നിർമ്മിച്ച് പുതിയ രീതിയിലുള്ള സാമ്പത്തിക തട്ടിപ്പുകൾ വ്യാപകമാകുന്നു. ഗൂഗിളിന്റെ പ്രശസ്തമായ ആപ്പ്-വെബ്‌സൈറ്റ് ഡെവലപ്‌മെന്റ് പ്ലാറ്റ്‌ഫോമായ ‘ഫയർബേസ്’ ദുരുപയോഗം ചെയ്താണ് തട്ടിപ്പുകാർ ഈ കൃത്രിമങ്ങൾ കാണിക്കുന്നത്. ഇന്ത്യയിൽ ഡിജിറ്റൽ പണമിടപാടുകൾ അതിവേഗം വളരുന്ന സാഹചര്യത്തിൽ, ഉപയോക്താക്കളെ ലക്ഷ്യമിട്ട് നടക്കുന്ന ഇത്തരം സൈബർ കുറ്റകൃത്യങ്ങൾ വലിയൊരു സുരക്ഷാ ഭീഷണിയായി മാറിയിരിക്കുകയാണ്.

സ്റ്റേറ്റ് ബാങ്ക് ഓഫ് ഇന്ത്യ, ഐസിഐസിഐ ബാങ്ക്, ആക്സിസ് ബാങ്ക് തുടങ്ങിയ പ്രമുഖ ബാങ്കുകളുടെ ഔദ്യോഗിക പേജുകളെയും ലോഗോകളെയും കൃത്യമായി അനുകരിച്ചാണ് തട്ടിപ്പുകാർ ഫയർബേസിൽ വ്യാജ ഫിഷിങ് പേജുകൾ നിർമ്മിച്ചിരിക്കുന്നത്. പുതിയ ക്രെഡിറ്റ് കാർഡുകൾ, റിവാർഡുകൾ, ക്രെഡിറ്റ് ലിമിറ്റ് വർധിപ്പിക്കൽ തുടങ്ങിയ പ്രലോഭനകരമായ വാഗ്ദാനങ്ങൾ നൽകി ഉപയോക്താക്കളെ ഈ വ്യാജ വെബ്സൈറ്റുകളിലേക്ക് ആകർഷിക്കുന്നു. കൂടാതെ കർഷകർക്കായുള്ള പി.എം. കിസാൻ പോലുള്ള സർക്കാർ പദ്ധതികളുടെ പേരിൽ സഹായധനം വാഗ്ദാനം ചെയ്തും ആളുകളെ കെണിയിൽ വീഴ്ത്തുന്നുണ്ട്.

Also Read: 3000 വർഷം പഴക്കമുള്ള ശില്പശേഖരം തുറന്നിടുന്നത് നഷ്ടപ്പെട്ടുപോയ ഈജിപ്ഷ്യൻ നഗരത്തിന്റെ രഹസ്യം!

ഇത്തരം വ്യാജ ലിങ്കുകൾ വഴി ഉപയോക്താക്കൾ തങ്ങളുടെ ഫോണുകളിൽ ബാങ്കിങ് ആപ്പുകളാണെന്ന് തെറ്റിദ്ധരിച്ച് ഡൗൺലോഡ് ചെയ്യുന്ന ക്ഷുദ്ര ആപ്പുകൾ വലിയ അപകടമാണ് വരുത്തുന്നത്. ആപ്പ് ഫോണിൽ ഇൻസ്റ്റാൾ ചെയ്യപ്പെടുന്നതോടെ, ഉപയോക്താവിന്റെ ക്രെഡിറ്റ് കാർഡ് വിവരങ്ങൾ, ഒ.ടി.പി തുടങ്ങിയ അതീവ രഹസ്യ വിവരങ്ങളെല്ലാം തട്ടിപ്പുകാരുടെ കൺട്രോളിലുള്ള ഫയർബേസ് ഡാറ്റാബേസിലേക്ക് നേരിട്ട് കൈമാറപ്പെടുന്നു. സൈബർ സുരക്ഷാ വിദഗ്ദ്ധർ ‘ആൻഡ്രോയിഡ് ഗോഡ് മോഡ്’ എന്ന് വിശേഷിപ്പിക്കുന്ന ഈ അവസ്ഥയിലൂടെ, ഇരയുടെ ഫോണിന്റെ പൂർണ്ണ നിയന്ത്രണം പോലും തട്ടിപ്പുകാർക്ക് സ്വന്തമാക്കാൻ സാധിക്കും.

ഈ ഗുരുതരമായ സാഹചര്യം കണ്ടെത്തിയതിനെ തുടർന്ന്, ഇന്ത്യൻ സൈബർ ക്രൈം കോർഡിനേഷൻ സെന്റർ ഇടപെടുകയും ഫയർബേസിൽ പ്രവർത്തിച്ചിരുന്ന ഇത്തരം 57-ഓളം വ്യാജ വെബ്സൈറ്റുകളും ഡാറ്റാബേസുകളും ഉടൻ നീക്കം ചെയ്യാൻ ഗൂഗിളിന് കർശന നിർദ്ദേശം നൽകുകയും ചെയ്തിട്ടുണ്ട്. നോട്ടീസ് ലഭിച്ച് മണിക്കൂറുകൾക്കകം ലിങ്കുകൾ നീക്കം ചെയ്യണമെന്നാണ് ഗൂഗിളിനോട് ആവശ്യപ്പെട്ടിരിക്കുന്നത്. ഓൺലൈൻ തട്ടിപ്പുകൾ തടയാൻ കേന്ദ്ര ഏജൻസികൾ കർശന നടപടികൾ സ്വീകരിക്കുന്നുണ്ടെങ്കിലും, പൊതുജനങ്ങൾ ഇത്തരം വ്യാജ ലിങ്കുകളിലും ഓഫറുകളിലും വഞ്ചിതരാകാതെ അതീവ ജാഗ്രത പാലിക്കേണ്ടതുണ്ട്.

The post ബാങ്ക് അക്കൗണ്ടുകൾ കാലിയാക്കാൻ പുതിയ തന്ത്രം; ഗൂഗിളിന്റെ ‘ഫയർബേസ്’ ദുരുപയോഗം ചെയ്ത് വൻ തട്ടിപ്പ്! appeared first on Express Kerala.