ഐപിഎൽ ചരിത്രത്തിലെ അതുല്യ റെക്കോർഡുമായി കരൺ ശർമ്മ വിരമിക്കുന്നു; ക്രിക്കറ്റിനോട് വിടപറയുന്നത് മൂന്ന് വ്യത്യസ്ത ടീമുകൾക്കൊപ്പം കിരീടം ചൂടിയ താരം!

ഇന്ത്യൻ താരവും റെയിൽവേസ് കളിക്കാരനുമായ കരൺ ശർമ്മ പ്രൊഫഷണൽ ക്രിക്കറ്റിന്റെ എല്ലാ ഫോർമാറ്റുകളിൽ നിന്നും വിരമിക്കൽ പ്രഖ്യാപിച്ചു. യുപി ടി20 ലീഗിൽ കാൺപൂർ സൂപ്പർ സ്റ്റാർസിന് വേണ്ടി ചൊവ്വാഴ്ച ലക്നൗ ഏക്നാ സ്റ്റേഡിയത്തിൽ മീററ്റ് മാവെറിക്സിനെതിരെ നടക്കുന്ന മത്സരമായിരിക്കും തന്റെ കരിയറിലെ അവസാന മത്സരമെന്ന് താരം വ്യക്തമാക്കി. സജീവ ക്രിക്കറ്റിൽ നിന്ന് പടിയിറങ്ങിയ ശേഷം പരിശീലകനായോ മറ്റ് ക്രിക്കറ്റ് ബന്ധപ്പെട്ട ഉത്തരവാദിത്തങ്ങളിലോ സജീവമാകാനാണ് തന്റെ തീരുമാനമെന്നും അദ്ദേഹം കൂട്ടിച്ചേർത്തു.

ഐപിഎൽ ചരിത്രത്തിൽ സമാനതകളില്ലാത്ത അപൂർവ്വ റെക്കോർഡോടെയാണ് കരൺ ശർമ്മ പടിയിറങ്ങുന്നത്. മൂന്ന് വ്യത്യസ്ത ഫ്രാഞ്ചൈസികൾക്കൊപ്പം തുടർച്ചയായ സീസണുകളിൽ ഐപിഎൽ കിരീടം സ്വന്തമാക്കിയ ഏക താരമെന്ന നേട്ടം അദ്ദേഹത്തിന്റെ പേരിലാണ്. സൺറൈസേഴ്സ് ഹൈദരാബാദ്, മുംബൈ ഇന്ത്യൻസ്, ചെന്നൈ സൂപ്പർ കിംഗ്സ്, റോയൽ ചലഞ്ചേഴ്സ് ബെംഗളൂരു തുടങ്ങിയ പ്രമുഖ ടീമുകൾക്കായി കളിച്ചിട്ടുള്ള താരം, ഐപിഎല്ലിൽ 90 മത്സരങ്ങളിൽ നിന്നായി 83 വിക്കറ്റുകൾ വീഴ്ത്തിയിട്ടുണ്ട്.

Also Read: എല്ലാ ഫോർമാറ്റിലും തിളങ്ങാൻ മിടുക്കൻ; യുവതാരം വൈഭവ് സൂര്യവംശിയെ വാനോളം പുകഴ്ത്തി രാഹുൽ ദ്രാവിഡ്

ആഭ്യന്തര ക്രിക്കറ്റിലെ മികച്ച പ്രകടനങ്ങൾക്കൊപ്പം ഇന്ത്യക്കായി ഒരു ടെസ്റ്റ്, രണ്ട് ഏകദിനം, ഒരു ടി20 മത്സരങ്ങളിലും കരൺ ശർമ്മ ജഴ്സിയണിഞ്ഞിട്ടുണ്ട്. 2014-ൽ ഓസ്ട്രേലിയക്കെതിരായ അഡ്‌ലെയ്ഡ് ടെസ്റ്റിലൂടെയായിരുന്നു അദ്ദേഹത്തിന്റെ അന്താരാഷ്ട്ര അരങ്ങേറ്റം. കരിയറിലുടനീളം തനിക്ക് പിന്തുണ നൽകിയ കുടുംബാംഗങ്ങൾക്കും, ബിസിസിഐയ്ക്കും, വിവിധ ക്രിക്കറ്റ് അസോസിയേഷനുകൾക്കും ആരാധകർക്കും താരം തന്റെ നന്ദി അറിയിച്ചു.

The post ഐപിഎൽ ചരിത്രത്തിലെ അതുല്യ റെക്കോർഡുമായി കരൺ ശർമ്മ വിരമിക്കുന്നു; ക്രിക്കറ്റിനോട് വിടപറയുന്നത് മൂന്ന് വ്യത്യസ്ത ടീമുകൾക്കൊപ്പം കിരീടം ചൂടിയ താരം! appeared first on Express Kerala.