‘ഞാനാണ് ഇവിടെ കളിക്കാരൻ, ‘മേ യഹാൻ കാ ഖിലാഡി ഹുൻ’..! രാഹുൽ ഗാന്ധിക്ക് ട്രെയിനിങ് വേണമെന്ന് റിജിജുവിന്റെ പരിഹാസം

രാഷ്ട്രീയ പോരാട്ടത്തിനിടയിൽ ഇത്തവണ മത്സരം മറ്റൊരു ട്രാക്കിലാണ്. ഫിറ്റ്നസും സാഹസികതയും ചർച്ചയാകുമ്പോൾ, അരുണാചൽ പ്രദേശിലെ കുത്തൊഴുക്കുള്ള നദിയിൽ നീന്തുന്ന വീഡിയോ പങ്കുവെച്ച് കേന്ദ്ര പാർലമെന്ററികാര്യ മന്ത്രി കിരൺ റിജിജു കോൺഗ്രസ് നേതാവ് രാഹുൽ ഗാന്ധിക്കെതിരെ നടത്തിയ പരാമർശമാണ് ശ്രദ്ധ നേടുന്നത്. “ഞാനാണ് ഇവിടെ കളിക്കാരൻ” എന്നായിരുന്നു റിജിജുവിന്റെ പ്രതികരണം. ഇത്തരം കാര്യങ്ങൾക്ക് രാഹുൽ ഗാന്ധിക്ക് പരിശീലനം വേണ്ടിവരുമെന്നും, തനിക്ക് ഇത് കുട്ടിക്കാലം മുതൽ പരിചയമുള്ള സാധാരണ കാര്യങ്ങളാണെന്നും റിജിജു പറഞ്ഞു.

അരുണാചലിലെ നദികൾ വലുതും വളരെ ആഴമുള്ളതുമാണെന്നും നീന്തൽ അറിയാത്തവർ ഒരിക്കലും ആഴത്തിലുള്ള വെള്ളത്തിലേക്ക് ഇറങ്ങരുതെന്നും റിജിജു മുന്നറിയിപ്പ് നൽകി. നിരവധി പേർ നദികളിൽ മുങ്ങിമരിച്ചിട്ടുണ്ടെന്നും അദ്ദേഹം ചൂണ്ടിക്കാട്ടി. മറ്റൊരു വീഡിയോയിൽ, അരുണാചലിലെ കുത്തൊഴുക്കുള്ള നദിയിലെ നീന്തൽ കുളത്തിലോ ശാന്തമായ യമുന പോലുള്ള നദിയിലോ നീന്തുന്നതിൽനിന്ന് വ്യത്യസ്തമാണെന്നും റിജിജു വിശദീകരിച്ചു. ശക്തമായ ഒഴുക്കിൽ തല വെള്ളത്തിന് മുകളിലായിരിക്കണം, ശരീരം നീന്തൽ മത്സരങ്ങളിലേതുപോലെ നേരെയല്ല, കൂടുതൽ നിവർന്ന നിലയിലായിരിക്കണമെന്നാണ് അദ്ദേഹത്തിന്റെ വിശദീകരണം.

ALSO READ;നെല്ലിപ്പലക തേഞ്ഞു പൊട്ടി..! ഹൂതികളുടെ ഭീഷണി; എണ്ണക്കയറ്റത്തിന് പുതിയ വഴി തുറന്ന് സൗദി, ചെങ്കടലിലൂടെ ബദൽ റൂട്ട്

റിജിജുവിന്റെയും രാഹുൽ ഗാന്ധിയുടെയും ഫിറ്റ്നസ് സംബന്ധമായ സൗഹൃദപരമായ സംഭാഷണങ്ങൾ ഇതാദ്യമല്ല. കഴിഞ്ഞ ഡിസംബറിൽ പാർലമെന്റിൽ ഇരുവരും നടത്തിയ സംഭാഷണത്തിന്റെ വീഡിയോ റിജിജു ഇൻസ്റ്റഗ്രാമിൽ പങ്കുവെച്ചിരുന്നു. രാഷ്ട്രീയമല്ല, ഫിറ്റ്നസാണ് സംസാരിക്കുന്നതെന്നും രാഹുൽ ഗാന്ധി #FitIndiaMovement പ്രോത്സാഹിപ്പിക്കുമെന്ന് പ്രതീക്ഷിക്കുന്നതായും അന്ന് റിജിജു പറഞ്ഞിരുന്നു. വ്യായാമത്തെക്കുറിച്ച് സംസാരിച്ച ഇരുവരും ഒരുമിച്ച് വർക്ക്‌ഔട്ട് ചെയ്യുന്നതിനെക്കുറിച്ചും ചർച്ച ചെയ്തിരുന്നു. മാർഷ്യൽ ആർട്സിൽ ഒരുമിച്ച് പരിശീലിക്കാമെന്ന നിർദേശവും രാഹുൽ ഗാന്ധി മുന്നോട്ടുവച്ചിരുന്നു.

ഫിറ്റ്നസിനോടുള്ള താൽപര്യം രാഹുൽ ഗാന്ധിയും പലപ്പോഴും വ്യക്തമാക്കിയിട്ടുണ്ട്. അടുത്തിടെ ഇൻസ്റ്റഗ്രാം ‘Ask Me Anything’ സെഷനിൽ തന്റെ ഫിറ്റ്നസ് രീതികളെക്കുറിച്ചുള്ള ചോദ്യത്തിന് മറുപടി നൽകിയ അദ്ദേഹം, സ്ഥിരതയാണ് പ്രധാനമെന്ന് പറഞ്ഞിരുന്നു. മാർഷ്യൽ ആർട്സ്, നീന്തൽ, ഓട്ടം എന്നിവ ഇഷ്ടപ്പെടുന്നതായും യോഗ അടുത്തിടെ തന്റെ ദിനചര്യയിലെ പ്രധാന ഭാഗമായതായും രാഹുൽ വ്യക്തമാക്കി. തിരക്കിനിടയിലും വ്യായാമത്തിന് സമയം കണ്ടെത്തുന്നതിനേക്കാൾ ഫിറ്റ്നസിന് മുൻഗണന നൽകുകയാണ് തന്റെ രീതിയെന്നും അദ്ദേഹം പറഞ്ഞിരുന്നു. അതിനിടെയാണ് അരുണാചലിലെ കുത്തൊഴുക്കുള്ള നദിയിൽ നിന്നുള്ള റിജിജുവിന്റെ മേ യഹാൻ കാ ഖിലാഡി ഹുൻ എന്ന പരാമർശം വീണ്ടും ഇരുവരുടെയും ഫിറ്റ്നസ് സൗഹൃദ മത്സരത്തെ ചർച്ചയാക്കുന്നത്.

The post ‘ഞാനാണ് ഇവിടെ കളിക്കാരൻ, ‘മേ യഹാൻ കാ ഖിലാഡി ഹുൻ’..! രാഹുൽ ഗാന്ധിക്ക് ട്രെയിനിങ് വേണമെന്ന് റിജിജുവിന്റെ പരിഹാസം appeared first on Express Kerala.