ഉപരോധങ്ങളിലൂടെ കടുത്ത സാമ്പത്തിക യുദ്ധം പ്രഖ്യാപിച്ച് അമേരിക്ക: ഗൾഫിൽ നിന്നുള്ള എണ്ണ വിതരണം തടയുമെന്ന് ഇറാൻ്റെ മുന്നറിയിപ്പ്

ടെഹ്‌റാൻ : അമേരിക്കയും ഇറാനും തമ്മിൽ നിലനിൽക്കുന്ന സംഘർഷം പുതിയ സാമ്പത്തിക യുദ്ധത്തിലേക്ക് വഴിമാറുന്നു. ഇറാനുമായും അവരുടെ വ്യാപാര പങ്കാളികളായ രാജ്യങ്ങളുമായും ബന്ധപ്പെട്ട് കടുത്ത സാമ്പത്തിക ഉപരോധങ്ങൾ ഏർപ്പെടുത്തുമെന്ന് യു.എസ് ട്രഷറി സെക്രട്ടറി സ്കോട്ട് ബെസ്സന്റ് വ്യക്തമാക്കിയതോടെയാണ് മേഖല വീണ്ടും യുദ്ധഭീതിയിലായത്.(US Threatens Iran With Severe Financial Sanctions Tehran Warns Oil Blockade)

“ചരിത്രത്തിലെ തന്നെ ഏറ്റവും ശക്തമായ സാമ്പത്തിക ആക്രമണത്തിനാണ് തുടക്കമാകുന്നത്” എന്ന് എക്സ് പ്ലാറ്റ്‌ഫോമിലും ലേഖനത്തിലൂടെയും ബെസ്സന്റ് മുന്നറിയിപ്പ് നൽകി. അമേരിക്കയുടെ ഉപരോധ നീക്കത്തിനെതിരെ രൂക്ഷമായ പ്രതികരണവുമായി ഇറാൻ രംഗത്തെത്തി. സാമ്പത്തിക ഉപരോധം തുടരുകയാണെങ്കിൽ പേർഷ്യൻ ഗൾഫിൽ നിന്നും ഹോർമുസ് കടലിടുക്കിലൂടെയുമുള്ള ഒരു തുള്ളി എണ്ണ പോലും പുറത്തേക്ക് കയറ്റി അയക്കാൻ അനുവദിക്കില്ലെന്ന് ഇറാന്റെ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി മൊഹ്സെൻ റെസായി മുന്നറിയിപ്പ് നൽകി.

അമേരിക്കയുടെ സാമ്പത്തിക യുദ്ധത്തിൽ പങ്കാളികളാകുന്ന ഏത് രാജ്യത്തിന്റെ നീക്കത്തെയും യുദ്ധപ്രഖ്യാപനമായി കാണുമെന്നും ഇറാൻ വ്യക്തമാക്കി. കഴിഞ്ഞ ഫെബ്രുവരിയിൽ അമേരിക്കയും ഇസ്രായേലും ചേർന്ന് നടത്തിയ സൈനിക നീക്കങ്ങളിൽ ഇറാന്റെ പരമോന്നത നേതാവ് ആയത്തുള്ള അലി ഖമേനി കൊല്ലപ്പെടുകയും ഇറാന്റെ സൈനിക, വ്യവസായ കേന്ദ്രങ്ങൾക്ക് വൻ നാശനഷ്ടം സംഭവിക്കുകയും ചെയ്തിരുന്നു. എങ്കിലും, മിസൈൽ, ഡ്രോൺ ശേഷി നിലനിർത്തിക്കൊണ്ട് ഹോർമുസ് കടലിടുക്കിലൂടെയുള്ള അന്താരാഷ്ട്ര കപ്പൽ ഗതാഗതത്തിന് തടസ്സം സൃഷ്ടിക്കാൻ ഇറാനായിട്ടുണ്ട്. ഇത് ആഗോളതലത്തിൽ ഇന്ധനവില വർധിക്കാൻ കാരണമായി.

ഇറാനിൽ നിന്ന് വൻതോതിൽ എണ്ണ വാങ്ങുന്ന ചൈനയോട് അമേരിക്കൻ ഉപരോധങ്ങളുമായി സഹകരിക്കാൻ യു.എസ് ആവശ്യപ്പെട്ടിട്ടുണ്ടെങ്കിലും, ഉപരോധങ്ങളും ഭീഷണികളും പ്രശ്നപരിഹാരത്തിന് സഹായിക്കില്ലെന്നും നയതന്ത്ര ചർച്ചകളാണ് വേണ്ടതെന്നും ചൈന പ്രതികരിച്ചു. നേരിട്ടുള്ള സൈനിക ആക്രമണങ്ങൾ നിർത്തിവെച്ചിട്ടുണ്ടെങ്കിലും അമേരിക്കയും ഇറാനും തമ്മിൽ മാസങ്ങളായി ഔദ്യോഗിക ചർച്ചകളൊന്നും നടക്കുന്നില്ല.

Story Summary

The US has threatened Iran with unprecedented economic sanctions targeting its trade partners, calling it a major financial offensive. In retaliation, Iran warned that it would completely block oil exports from the Persian Gulf and the Strait of Hormuz if the economic war continues. Meanwhile, neighboring countries including Pakistan are attempting diplomatic mediation to de-escalate tensions in the region.