‘സൂര്യാസ്തമയത്തിന് ശേഷം പ്രവേശനമില്ല’..! നിഗൂഢ വനവുമായി സിദ്ധാർഥ്, തമന്ന; ‘ദ വ്വാൻ’ ടീസർ പുറത്ത്

സൂര്യാസ്തമയത്തിന് ശേഷം പ്രവേശിക്കാൻ വിലക്കുള്ള ഒരു കാട്. അതിനുള്ളിൽ ഒളിഞ്ഞിരിക്കുന്ന അജ്ഞാത ശക്തി. അതിനെ നേരിടുന്ന സിദ്ധാർഥ് മൽഹോത്ര. നിഗൂഢതയും ഭയവും ഫാന്റസിയും നിറച്ച ‘ദ വ്വാൻ’ ടീസർ പ്രേക്ഷകർക്ക് മുന്നിൽ തുറക്കുന്നത് ഇത്തരമൊരു കൗതുകകരമായ ലോകമാണ്. സിദ്ധാർഥ് മൽഹോത്രയും തമന്ന ഭാട്ടിയയും ആദ്യമായി ഒന്നിക്കുന്ന ചിത്രം കൂടിയാണിത്.

ചൊവ്വാഴ്ച പുറത്തിറങ്ങിയ ടീസറിൽ ചിത്രത്തിന്റെ കഥയെക്കുറിച്ച് കാര്യമായ വിവരങ്ങൾ വെളിപ്പെടുത്തുന്നില്ല. എന്നാൽ “സൂര്യാസ്തമയത്തിന് ശേഷം വ്വാനിൽ പ്രവേശിക്കുന്നത് നിരോധിച്ചിരിക്കുന്നു” എന്ന നിയമമാണ് കഥയുടെ പ്രധാന കൗതുകങ്ങളിലൊന്ന്. അതീന്ദ്രിയത, ഹൊറർ, പുരാണം, ഫാന്റസി എന്നിവ കൂട്ടിച്ചേർത്ത ത്രില്ലറായാണ് ചിത്രം എത്തുന്നത്. സിദ്ധാർഥിനും തമന്നയ്ക്കുമൊപ്പം മനീഷ് പോൾ, ശ്വേത തിവാരി, അനുപ് സോണി എന്നിവരെയും ടീസറിൽ കാണാം.

ALSO READ;അഭിനയിച്ച അഞ്ച് ചിത്രങ്ങൾ നഷ്ടമായി! ഐശ്വര്യയെ ഷാരൂഖ് ഒഴിവാക്കിയത് എന്തിന്? സൽമാന്റെ ഇടപെടലും, പിന്നീട് ഷാരൂഖിന്റെ കുറ്റസമ്മതവും

ബോളിവുഡിലെ പതിവ് വാണിജ്യ സിനിമകളിൽനിന്ന് വ്യത്യസ്തമായി ഇന്ത്യൻ നാടോടിക്കഥകളെയും ഫാന്റസിയെയും വലിയ ദൃശ്യവിസ്തൃതിയിൽ അവതരിപ്പിക്കാനുള്ള ശ്രമമാണ് ‘ദ വ്വാൻ’. സാഹസികത, നിഗൂഢത, ഹാസ്യം എന്നിവയും ചേർത്താണ് ചിത്രം ഒരു കുടുംബ പ്രേക്ഷക വിനോദമായി ഒരുക്കിയിരിക്കുന്നത്. ടിവിഎഫിന്റെ അരുണാഭ് കുമാർ, സംവിധായകൻ ദീപക് മിശ്ര, ഏക്ത കപൂർ എന്നിവർ ഒന്നിക്കുന്ന ചിത്രത്തിന് അരുണാഭ് കുമാറാണ് തിരക്കഥ ഒരുക്കിയത്. ദീപക് മിശ്രയാണ് സംവിധാനം.

ബാലാജി മോഷൻ പിക്ചേഴ്സ്, ടിവിഎഫ്, 11.11 പ്രൊഡക്ഷൻ എന്നിവയുടെ സഹകരണത്തിലാണ് ചിത്രം ഒരുങ്ങുന്നത്. ചിത്രത്തിന്റെ വലിയ കഥാപ്രപഞ്ചത്തിലേക്ക് പ്രേക്ഷകർക്ക് നേരത്തെ തന്നെ പരിചയം നൽകുന്ന ‘ദ ലെജൻഡ് ഓഫ് വ്വാൻ’ കോമിക് ബുക്കും പുറത്തിറങ്ങിയിട്ടുണ്ട്. സെപ്റ്റംബർ 25, 2026നാണ് ‘ദ വ്വാൻ’ തിയറ്ററുകളിലെത്തുന്നത്.

The post ‘സൂര്യാസ്തമയത്തിന് ശേഷം പ്രവേശനമില്ല’..! നിഗൂഢ വനവുമായി സിദ്ധാർഥ്, തമന്ന; ‘ദ വ്വാൻ’ ടീസർ പുറത്ത് appeared first on Express Kerala.