മുംബൈ-അഹമ്മദാബാദ് ബുള്ളറ്റ് ട്രെയിൻ പദ്ധതിയുടെ ചെലവ് 2 ലക്ഷം കോടി രൂപ കടക്കുന്നു? നിർമ്മാണം വൈകാൻ കാരണങ്ങൾ എന്തൊക്കെ!

രാജ്യത്തിന്റെ അഭിമാനകരമായ സംരംഭമായ മുംബൈ-അഹമ്മദാബാദ് ബുള്ളറ്റ് ട്രെയിൻ പദ്ധതിയുടെ മൊത്തത്തിലുള്ള ചെലവ് കുത്തനെ ഉയർന്നതായി റിപ്പോർട്ട്. തുടക്കത്തിൽ 1.1 ലക്ഷം കോടി രൂപയായി കണക്കാക്കിയിരുന്ന പദ്ധതിച്ചെലവ്, പുതുക്കിയ കണക്കുകൾ പുറത്തുവരുമ്പോൾ 2.1 ലക്ഷം കോടി രൂപയായി ഇരട്ടിയോളമാണ് വർധിച്ചിരിക്കുന്നത്. പുതുക്കിയ എസ്റ്റിമേറ്റിന് ഔദ്യോഗിക അനുമതി ലഭിക്കുന്നതിനായി ഇതിനോടകം തന്നെ മന്ത്രിസഭയ്ക്ക് മുന്നിൽ സമർപ്പിച്ചിട്ടുണ്ടെന്ന് റെയിൽവേ മന്ത്രാലയ വൃത്തങ്ങൾ വ്യക്തമാക്കി.

മഹാരാഷ്ട്രയിൽ ഭൂമി ഏറ്റെടുക്കുന്നതിൽ നേരിട്ട വലിയ തോതിലുള്ള കാലതാമസവും, ജപ്പാനിൽ നിന്ന് ആവശ്യമായ ട്രെയിൻ സെറ്റുകൾ സമയബന്ധിതമായി ലഭിക്കാത്തതുമാണ് ചെലവ് ഇത്രയധികം വർധിക്കാൻ പ്രധാന കാരണങ്ങളായി വിലയിരുത്തപ്പെടുന്നത്. പദ്ധതിയുടെ ആദ്യ ഘട്ടം 2027 ഓഗസ്റ്റോടെ പൂർത്തിയാക്കി പ്രവർത്തനക്ഷമമാക്കുമെന്നും, മുഴുവൻ പദ്ധതിയും 2030-ഓടെ പൂർത്തീകരിക്കുമെന്നുമാണ് റെയിൽവേ അധികൃതരുടെ പുതിയ അറിയിപ്പ്. നിലവിൽ ജപ്പാൻ ഇന്റർനാഷണൽ കോപ്പറേഷൻ ഏജൻസിയുടെയും കേന്ദ്ര ബജറ്റ് വിഹിതത്തിന്റെയും സഹായത്തോടെയാണ് നിർമ്മാണ പ്രവർത്തനങ്ങൾ മുന്നോട്ട് പോകുന്നത്.

Also Read: ഓഗസ്റ്റിൽ സർവ്വകാല റെക്കോർഡിലേക്ക് സ്വർണവില? ഒറ്റമാസം കൊണ്ട് വർധിച്ചത് 14,000 രൂപയിലേറെ!

അതേസമയം, രാജ്യത്ത് തന്നെ അതിവേഗ ട്രെയിനുകൾ നിർമ്മിക്കാൻ റെയിൽവേ പദ്ധതിയിടുന്നുണ്ടെന്നും അധികൃതർ വ്യക്തമാക്കിയിട്ടുണ്ട്. ഇവയിൽ ഓരോ ട്രെയിൻ സെറ്റിനും ഏകദേശം 390 കോടി മുതൽ 400 കോടി രൂപ വരെയാണ് ചെലവ് പ്രതീക്ഷിക്കുന്നത്. പദ്ധതിക്കായി ആവശ്യമായ വരുന്ന അധിക തുക കേന്ദ്ര ബജറ്റ് വിഹിതത്തിൽ നിന്നും ലഭ്യമാക്കുമെന്നാണ് സൂചനകൾ പുറത്തുവരുന്നത്.

The post മുംബൈ-അഹമ്മദാബാദ് ബുള്ളറ്റ് ട്രെയിൻ പദ്ധതിയുടെ ചെലവ് 2 ലക്ഷം കോടി രൂപ കടക്കുന്നു? നിർമ്മാണം വൈകാൻ കാരണങ്ങൾ എന്തൊക്കെ! appeared first on Express Kerala.