ഇറാന്റെ അടിയന്തര ഇന്ധന ശേഖരവും തീരുന്നു! ‘ഏതാനും ആഴ്ചകൾ മാത്രം’; രാജ്യത്ത് കടുത്ത ക്ഷാമത്തിന് സാധ്യത

ഇന്ധന പ്രതിസന്ധിക്കിടെ ഇറാന്റെ അടിയന്തര ആവശ്യങ്ങൾക്കായി സൂക്ഷിച്ചിരിക്കുന്ന തന്ത്രപ്രധാന ഇന്ധന ശേഖരം അപകടകരമായ നിലയിലേക്ക് എത്തിയതായി റിപ്പോർട്ട്. നിലവിലെ ഉപയോഗനിരക്ക് തുടർന്നാൽ ഏതാനും ആഴ്ചകൾക്കുള്ളിൽ തന്നെ ഈ ശേഖരം പൂർണമായി തീർന്നേക്കുമെന്നാണ് ഇറാൻ ഇന്റർനാഷണൽ റിപ്പോർട്ട് ചെയ്യുന്നത്. അങ്ങനെ സംഭവിച്ചാൽ ഇന്ധന ക്ഷാമം നേരിടാൻ സർക്കാരിന് അടിയന്തര ശേഖരത്തെ ആശ്രയിക്കാനാകാതെ വരികയും രാജ്യവ്യാപകമായി ഇന്ധന വിതരണത്തിൽ വലിയ തടസ്സങ്ങൾ ഉണ്ടാകുകയും ചെയ്യാം.

ഇന്ധന ശേഖരത്തിൽ നിന്നുള്ള ഉപയോഗം തുടരണമെന്നാണ് ചില രാഷ്ട്രീയ നേതാക്കളുടെ നിലപാട്. എന്നാൽ ഇത് എതിർത്ത് ഇറാന്റെ റവല്യൂഷണറി ഗാർഡ് രംഗത്തുണ്ടെന്നാണ് റിപ്പോർട്ട്. അടിയന്തര ശേഖരം ഇപ്പോഴത്തെ പ്രതിസന്ധി മറികടക്കാൻ ഉപയോഗിക്കണമോ, ഭാവിയിലെ ഗുരുതര സാഹചര്യങ്ങൾക്കായി മാറ്റിവെക്കണമോ എന്നതിലാണ് ഇരുവിഭാഗങ്ങൾക്കിടയിലെ ഭിന്നത.

ALSO READ;നേപ്പാളിൽ പ്രളയഭീഷണി ഒഴിയുന്നില്ല! വെള്ളപ്പാച്ചിലിന് പിന്നിലെ കാരണം ഇനിയും ദുരൂഹം, വീണ്ടും പ്രളയസാധ്യതയെന്ന് വിദഗ്ധർ

നിലവിലെ രീതിയിൽ ശേഖരം ഉപയോഗിക്കുന്നത് തുടർന്നാൽ ഏതാനും ആഴ്ചകൾക്കുള്ളിൽ അത് പൂർണമായി തീരാമെന്നാണ് റിപ്പോർട്ടിലെ മുന്നറിയിപ്പ്. ഇതോടെ ഇന്ധന വിതരണത്തിലെ തടസ്സം കൂടുതൽ രൂക്ഷമാകാനും രാജ്യത്തെ വിവിധ മേഖലകളിൽ ക്ഷാമം നേരിടാനും സാധ്യതയുണ്ട്. അതിനാൽ അടിയന്തര ശേഖരത്തിന്റെ ഉപയോഗം ഇറാനിൽ വലിയ രാഷ്ട്രീയ തർക്കത്തിനും കാരണമാകുകയാണ്.

ഇറാൻ ഇന്റർനാഷണൽ ഇറാൻ പ്രതിപക്ഷവുമായി ബന്ധപ്പെട്ട മാധ്യമമാണെന്നതും ശ്രദ്ധേയമാണ്. അതിനാൽ റിപ്പോർട്ടിലെ കണക്കുകൾക്കും വിലയിരുത്തലുകൾക്കും ഔദ്യോഗിക സ്ഥിരീകരണം ലഭിച്ചിട്ടില്ല. എന്നാൽ റിപ്പോർട്ട് ചൂണ്ടിക്കാണിക്കുന്നതുപോലെ ശേഖരം വേഗത്തിൽ കുറഞ്ഞാൽ, ഇന്ധന പ്രതിസന്ധി നേരിടാനുള്ള ഇറാന്റെ ശേഷിക്ക് അത് വലിയ വെല്ലുവിളിയാകുമെന്നാണ് വിലയിരുത്തൽ.

The post ഇറാന്റെ അടിയന്തര ഇന്ധന ശേഖരവും തീരുന്നു! ‘ഏതാനും ആഴ്ചകൾ മാത്രം’; രാജ്യത്ത് കടുത്ത ക്ഷാമത്തിന് സാധ്യത appeared first on Express Kerala.