‘സ്ത്രീകളെ മോശമായി ചിത്രീകരിക്കുന്നു’; യാഷിന്റെ ‘ടോക്‌സിക്’ സിനിമയ്ക്കെതിരെ രൂക്ഷ വിമർശനവുമായി കെ. അണ്ണാമലൈ

ഗീതു മോഹൻദാസിന്റെ സംവിധാനത്തിൽ യാഷ് നായകനായി എത്തിയ പുതിയ ബ്രഹ്മാണ്ഡ ചിത്രം ‘ടോക്‌സിക്കി’നെതിരെ രൂക്ഷ വിമർശനവുമായി മുൻ ബിജെപി നേതാവും ‘അണ്ണാമലൈ മക്കൾ ഇയക്കം’ സ്ഥാപകനുമായ കെ. അണ്ണാമലൈ രംഗത്ത്. ചിത്രം സ്ത്രീകളെ മോശമായ രീതിയിലും ലൈംഗിക ഉപഭോഗ വസ്തുവായിട്ടുമാണ് ചിത്രീകരിക്കുന്നതെന്ന് അദ്ദേഹം കുറ്റപ്പെടുത്തി. ഈ സിനിമയ്ക്ക് പ്രദർശനാനുമതി നൽകിയ സെൻട്രൽ ബോർഡ് ഓഫ് ഫിലിം സർട്ടിഫിക്കേഷന്റെ (സെൻസർ ബോർഡ്) നടപടിക്കെതിരെയും അദ്ദേഹം കടുത്ത വിമർശനം ഉന്നയിച്ചിട്ടുണ്ട്. സിനിമകളിലെ ഇത്തരം ചിത്രീകരണങ്ങൾ കുട്ടികളിലും സമൂഹത്തിലും ഗുരുതരമായ പ്രത്യാഘാതങ്ങൾ ഉണ്ടാക്കുമെന്നും ഫിലിം റെഗുലേഷനിൽ കർശന നിയമങ്ങൾ കൊണ്ടുവരണമെന്നും അദ്ദേഹം ആവശ്യപ്പെട്ടു.

റിലീസ് ചെയ്ത ആദ്യ ദിവസം തന്നെ നൂറുകോടി ക്ലബ്ബിൽ ഇടംനേടിയ ചിത്രം ബോക്സ് ഓഫീസ് വിജയം നേടുമ്പോഴും, വിവിധ കോണുകളിൽ നിന്ന് സമാനമായ വിമർശനങ്ങൾ ഉയരുന്നുണ്ട്. എന്നാൽ ചിത്രത്തിലെ വിമർശനങ്ങൾക്ക് മറുപടിയുമായി നായകൻ യാഷ് നേരത്തെ രംഗത്തെത്തിയിരുന്നു. പ്രീ-റിലീസ് ചടങ്ങിനിടയിൽ സംസാരിച്ച യാഷ്, സംവിധായിക ഗീതു മോഹൻദാസിനെ പൂർണ്ണമായി പിന്തുണയ്ക്കുകയും, ട്രെയിലറിൽ കാണുന്നതിൽ നിന്നും വ്യത്യസ്തമായി സ്ത്രീകൾക്ക് വേണ്ടി ശബ്ദമുയർത്തുന്ന ഘടകങ്ങൾ ഈ സിനിമയിലുണ്ടെന്ന് വ്യക്തമാക്കുകയും ചെയ്തിരുന്നു. പെൺകുട്ടികൾ തീർച്ചയായും തിയേറ്ററുകളിൽ പോയി ഈ ചിത്രം കാണണമെന്നും അദ്ദേഹം ആഹ്വാനം ചെയ്തിരുന്നു.

കെവിഎൻ പ്രൊഡക്ഷൻസും യാഷിന്റെ മോൺസ്റ്റർ മൈൻഡ് ക്രിയേഷൻസും ചേർന്ന് നിർമ്മിച്ച ഈ പീരിയഡ് ഗ്യാങ്സ്റ്റർ ഡ്രാമ കന്നഡയിലും ഇംഗ്ലീഷിലുമായാണ് ഒരുക്കിയിരിക്കുന്നത്. ഇന്ത്യൻ സിനിമയിലെ ഏറ്റവും ചെലവേറിയ ചിത്രങ്ങളിലൊന്നായ ഇതിൽ നയൻതാര, താര സുതാരിയ, കിയാര അദ്വാനി, ഹുമ ഖുറേഷി, രുക്മിണി വസന്ത് തുടങ്ങി വൻ താരനിരയാണ് അണിനിരന്നിരിക്കുന്നത്. യാഷ് ഇരട്ട വേഷത്തിലെത്തുന്ന ഈ ചിത്രത്തെച്ചൊല്ലി രാഷ്ട്രീയ-സിനിമാ രംഗങ്ങളിൽ ചർച്ചകൾ ചൂടുപിടിക്കുകയാണ്.

The post ‘സ്ത്രീകളെ മോശമായി ചിത്രീകരിക്കുന്നു’; യാഷിന്റെ ‘ടോക്‌സിക്’ സിനിമയ്ക്കെതിരെ രൂക്ഷ വിമർശനവുമായി കെ. അണ്ണാമലൈ appeared first on Express Kerala.