കാലിഫോർണിയയിൽ രണ്ടു മലയാളി യുവതികൾ കൊല്ലപ്പെട്ടു; സുഹൃത്ത് പൊലീസ് കസ്റ്റഡിയിൽ | Malayali woman killed California

കാലിഫോർണിയ: അമേരിക്കയിലെ കാലിഫോർണിയ സംസ്ഥാനത്തെ മിൽപിറ്റാസിൽ മലയാളി യുവതി ഉൾപ്പെടെ രണ്ട് യുവതികൾ കൊല്ലപ്പെട്ടതായി റിപ്പോർട്ട് (Malayali woman killed California). പാണഞ്ചേരി തെക്കൂട്ട് ഹരിദാസ്–സുഷമ ദമ്പതികളുടെ മകൾ അഞ്ജന (35), കോട്ടയം ചിങ്ങവനം സ്വദേശിനിയായ ആൻ എന്നിവരാണ് മരിച്ചത്.

അഞ്ജനയുടെ സുഹൃത്തായ അനിലയെ സംഭവവുമായി ബന്ധപ്പെട്ട് പൊലീസ് കസ്റ്റഡിയിലെടുത്തിട്ടുണ്ട്. അഞ്ജനയുടെ ഭർത്താവ് വിലങ്ങന്നൂർ സ്വദേശിയായ വിജീഷാണ്. ഇവർക്ക് വാമിക എന്ന മകളുമുണ്ട്.

അഞ്ജനയും കുടുംബവും കഴിഞ്ഞ ആറ് വർഷമായി കാലിഫോർണിയയിൽ താമസിച്ചുവരികയായിരുന്നു. അഞ്ജന അധ്യാപികയായും ഭർത്താവ് വിജീഷ് സോഫ്റ്റ്‌വെയർ എൻജിനീയറായും ജോലി ചെയ്തുവരികയാണെന്നാണ് ബന്ധുക്കൾ നൽകുന്ന വിവരം.

സംഭവത്തിൽ ആദ്യം ആൻ എന്ന യുവതിയെ ഫ്ലാറ്റിനുള്ളിൽ കത്തി ഉപയോഗിച്ച് ആക്രമിച്ച് കൊലപ്പെടുത്തിയെന്നാണ് പ്രാഥമിക റിപ്പോർട്ടുകൾ. തുടർന്ന് അഞ്ജനയെ ഫ്ലാറ്റിന് താഴേക്ക് വിളിച്ചുവരുത്തിയ ശേഷം കാർ ഇടിപ്പിച്ച് കൊലപ്പെടുത്തിയതായും വിവരമുണ്ട്.

ഇവർ കുടുംബങ്ങളോടൊപ്പം ഒരേ ഫ്ലാറ്റ് സമുച്ചയത്തിലാണ് താമസിച്ചിരുന്നതെന്നാണ് റിപ്പോർട്ട്. വെള്ളിയാഴ്ച ഉച്ചയ്ക്ക് 12 മണിയോടെയാണ് സംഭവം നടന്നത്.

അഞ്ജനയുടെയും ആന്റെയും മൃതദേഹങ്ങൾ നാട്ടിലെത്തിക്കുന്നതിനുള്ള നടപടികൾ പുരോഗമിക്കുകയാണെന്ന് ബന്ധുക്കൾ അറിയിച്ചു. സംഭവത്തിന്റെ കൂടുതൽ വിവരങ്ങൾക്കായി അമേരിക്കൻ പൊലീസ് അന്വേഷണം തുടരുകയാണ്.

Story Summary:
Two women, including a 35-year-old Malayali woman from Kerala, were reportedly killed in Milpitas, California. Police have taken their friend into custody in connection with the deaths, and an investigation is underway.