ബസ് അപകടസ്ഥലത്തിന് സമീപം ന്യൂസ് ഹെലികോപ്റ്റർ തകർന്നുവീണു; മൂന്ന് പേർക്ക് ദാരുണാന്ത്യം, അവസാന നിമിഷങ്ങളുടെ ദൃശ്യങ്ങൾ പുറത്ത് | Los Angeles helicopter crash

ലോസ് ആഞ്ചലസ്: ബസ് അപകടത്തിന്റെ ദൃശ്യങ്ങൾ പകർത്താനെത്തിയതായി റിപ്പോർട്ടുള്ള വാർത്താ ഹെലികോപ്റ്റർ പാർക്കിങ് ഏരിയയിൽ തകർന്നുവീണ് മൂന്ന് പേർ മരിച്ചു (Los Angeles helicopter crash). ചൊവ്വാഴ്ച ലോസ് ആഞ്ചലസിലാണ് അപകടം. മറ്റൊരാളെ പരിക്കുകളോടെ ആശുപത്രിയിൽ പ്രവേശിപ്പിച്ചെങ്കിലും ആരോഗ്യനില സംബന്ധിച്ച കൂടുതൽ വിവരങ്ങൾ പുറത്തുവന്നിട്ടില്ല. നേരത്തെ ഒരു എസ്‌യുവി ബസിലേക്ക് ഇടിച്ചുകയറിയുണ്ടായ അപകടം നടന്ന സ്ഥലത്തിന് സമീപമാണ് ഹെലികോപ്റ്റർ തകർന്നുവീണത്. ബസ് അപകടത്തിൽ രണ്ട് പേർ മരിക്കുകയും ആറ് പേർക്ക് പരിക്കേൽക്കുകയും ചെയ്തിരുന്നു. ഈ അപകടത്തിന്റെ ദൃശ്യങ്ങൾ പകർത്തുന്നതിനിടെയാണ് ഹെലികോപ്റ്റർ അപകടത്തിൽപ്പെട്ടതെന്നാണ് റിപ്പോർട്ട്.

ഹെലികോപ്റ്ററിനുള്ളിൽ നിന്ന് പകർത്തിയതായി കരുതുന്ന വീഡിയോയിൽ അപകടത്തിന് തൊട്ടുമുമ്പുള്ള നിമിഷങ്ങൾ കാണാം. ബസ് അപകടസ്ഥലത്തിന് മുകളിലൂടെ ഹെലികോപ്റ്റർ പറന്നുനിൽക്കുന്നതിനിടെ ക്യാമറയിൽ പെട്ടെന്ന് ശക്തമായ കുലുക്കം അനുഭവപ്പെടുന്നു. തുടർന്ന് വിമാനം താഴേക്ക് പതിക്കുന്ന ദൃശ്യങ്ങളാണ് പുറത്തുവന്നത്.
പാർക്കിങ് ഏരിയയിലെ നിരവധി വാഹനങ്ങൾക്ക് സമീപമാണ് ഹെലികോപ്റ്റർ തകർന്നുവീണതെന്ന് ലോസ് ആഞ്ചലസ് ഫയർ ഡിപ്പാർട്ട്മെന്റ് അറിയിച്ചു. അപകടത്തിൽ നാല് വാഹനങ്ങൾക്കും രണ്ട് സ്റ്റോറേജ് കണ്ടെയ്‌നറുകൾക്കും തീപിടിച്ചു. അമ്പതിലേറെ അഗ്നിരക്ഷാസേനാംഗങ്ങൾ സ്ഥലത്തെത്തി തീയണച്ചു. അപകടത്തിൽ മരിച്ചവരിൽ എത്ര പേർ ഹെലികോപ്റ്ററിലുണ്ടായിരുന്നുവെന്ന് ആദ്യം വ്യക്തമല്ലായിരുന്നു. മരിച്ചവരിൽ ഒരാൾ ഹെലികോപ്റ്ററിന് പുറത്തുള്ള പാർക്കിങ് ഏരിയയിലുണ്ടായിരുന്നയാളാണെന്ന് അധികൃതർ അറിയിച്ചു. ഹെലികോപ്റ്റർ തകർന്ന നിലയിലായതിനാൽ അവശിഷ്ടങ്ങൾ പരിശോധിച്ച ശേഷമേ വിമാനത്തിലുണ്ടായിരുന്നവരുടെ എണ്ണം ഉൾപ്പെടെയുള്ള കൂടുതൽ വിവരങ്ങൾ വ്യക്തമാകൂ.

A helicopter with @NBCLA has crashed. This was their feed as it happened. pic.twitter.com/9rHiqA1ZEI

— Traffic Cam Watch (@PCALive) September 16, 2026

അപകടത്തിന്റെ കാരണം കണ്ടെത്തുന്നതിനായി യുഎസ് നാഷണൽ ട്രാൻസ്‌പോർട്ടേഷൻ സേഫ്റ്റി ബോർഡും ഫെഡറൽ ഏവിയേഷൻ അഡ്മിനിസ്ട്രേഷനും അന്വേഷണം നടത്തും. ഹെലികോപ്റ്റർ എങ്ങനെ നിയന്ത്രണം വിട്ടുവെന്നതടക്കമുള്ള കാര്യങ്ങൾ അന്വേഷണത്തിലൂടെ വ്യക്തമാകുമെന്നാണ് പ്രതീക്ഷിക്കുന്നത്.

Summary: A news helicopter crashed into a parking lot near the site of a deadly bus accident in Los Angeles, killing at least three people. Video recorded from inside the helicopter appears to capture the aircraft’s final moments before the crash.