2000 രൂപയ്ക്ക് മുകളിലുള്ള UPI ഇടപാടുകൾക്ക് MDR: സർക്കാർ തീരുമാനത്തെ പിന്തുണച്ച് RBI | RBI Backs MDR

മുംബൈ: 2,000 രൂപയ്ക്ക് മുകളിലുള്ള വലിയ തുകയുടെ വ്യക്തിഗത-വ്യാപാരി യുപിഐ ഇടപാടുകൾക്ക് മർച്ചന്റ് ഡിസ്‌കൗണ്ട് റേറ്റ് ഏർപ്പെടുത്താനുള്ള കേന്ദ്ര സർക്കാർ തീരുമാനത്തെ പിന്തുണച്ച് റിസർവ് ബാങ്ക് ഓഫ് ഇന്ത്യ. ഡിജിറ്റൽ പേയ്‌മെന്റ് മേഖലയുടെ സാങ്കേതിക മുന്നേറ്റത്തിനും ദീർഘകാല സുസ്ഥിരതയ്ക്കും ഈ തീരുമാനം ഏറെ സഹായകരമാകുമെന്ന് ആർബിഐ എക്‌സിൽ കുറിച്ചു.(RBI Backs MDR Charges On Large UPI Transactions Above 2000 Rupees)

ഒക്ടോബർ 15 മുതലാണ് 2,000 രൂപയ്ക്ക് മുകളിലുള്ള നിശ്ചിത യുപിഐ ഇടപാടുകൾക്ക് പരമാവധി 300 രൂപ പരിധിയിൽ 0.4% തുക മർച്ചന്റ് ഡിസ്‌കൗണ്ട് റേറ്റായി ഈടാക്കാൻ കേന്ദ്ര സർക്കാർ തീരുമാനിച്ചത്. പേയ്‌മെന്റ് സംവിധാനത്തിൽ പങ്കാളികളാകുന്ന ബാങ്കുകൾക്കും സേവന ദാതാക്കൾക്കും ന്യായമായ വരുമാനം ലഭിക്കുന്നത് വഴി ഇൻഫ്രാസ്ട്രക്ചറിലും സുരക്ഷയിലും കൂടുതൽ നിക്ഷേപം നടത്താൻ കഴിയുമെന്ന് ആർബിഐ ചൂണ്ടിക്കാട്ടി.

യുപിഐ ഉപയോഗിച്ച് പണം അയക്കുന്ന സാധാരണ ഉപഭോക്താക്കളിൽ നിന്ന് യാതൊരുവിധ ചാർജുകളും ഈടാക്കില്ല. വ്യാപാരികൾ ഈ തുക ഉപഭോക്താക്കളിൽ നിന്ന് ഈടാക്കുന്നില്ലെന്ന് ബാങ്കുകൾ ഉറപ്പാക്കണം. വ്യക്തികൾ തമ്മിൽ നടത്തുന്ന പണമിടപാടുകൾ തുക എത്രയാണെങ്കിലും പൂർണ്ണമായും സൗജന്യമായി തുടരും. 2,000 രൂപ വരെയുള്ള ചെറുകിട വ്യാപാരി ഇടപാടുകൾക്ക് യാതൊരുവിധ എംഡിആർ ചാർജും ഉണ്ടാകില്ല. പ്രതിമാസം 1 ലക്ഷം രൂപ വരെ യുപിഐ ക്യുആർ വഴി സ്വീകരിക്കുന്ന ചെറുകിട വ്യാപാരികളെയും ഇതിൽ നിന്നും ഒഴിവാക്കിയിട്ടുണ്ട്.

റെയിൽവേ, ടെലികോം, ഇൻഷുറൻസ്, ഇന്ധനം തുടങ്ങിയ മേഖലകളിൽ 2,000 രൂപയ്ക്ക് മുകളിലുള്ള ഇടപാടുകൾക്ക് നിരക്ക് 5 രൂപയായി ക്ലിപ്തപ്പെടുത്തിയിട്ടുണ്ട്. മ്യൂച്വൽ ഫണ്ട്, സ്റ്റോക്ക് ബ്രോക്കിംഗ് തുടങ്ങിയ മേഖലകളിൽ 0.02% ആയിരിക്കും നിരക്ക്. പുതിയ തീരുമാനം വിപണിയിലെ ആകെയുള്ള വ്യാപാരി ഇടപാടുകളുടെ 4 ശതമാനത്തെ മാത്രമാണ് ബാധിക്കുകയെന്നും 96% ഇടപാടുകളും മാറ്റമില്ലാതെ തുടരുമെന്നും ധനമന്ത്രാലയം വ്യക്തമാക്കി.

Story Summary

The Reserve Bank of India supported the government’s decision to introduce Merchant Discount Rate (MDR) on UPI P2M transactions exceeding ₹2,000 to ensure digital payment ecosystem sustainability. RBI clarified that customers will not face any charges, and P2P payments as well as small merchant transactions below ₹2,000 will remain completely free.