‘ബോബി ജാസൂസ്’ നിർമിക്കാൻ വീട് പണയംവച്ചു; വിദ്യ ബാലന് കരിയറിലെ മികച്ച പ്രതിഫലം നൽകിയെന്ന് ദിയ മിർസ | Dia Mirza Bobby Jasoo

മുംബൈ: ബോബി ജാസൂസ് എന്ന ചിത്രം നിർമിക്കാൻ തന്റെ ആദ്യ വീട് വരെ പണയംവച്ചിരുന്നതായി നടിയും നിർമാതാവുമായ ദിയ മിർസ. ചിത്രത്തിന്റെ സാമ്പത്തിക പിന്തുണ അവസാന നിമിഷം പിൻവലിക്കപ്പെട്ടതോടെയാണ് ബാങ്ക് വായ്പയെടുത്ത് വീട് പണയംവച്ച് സിനിമ പൂർത്തിയാക്കിയതെന്ന് ദിയ മിർസ വെളിപ്പെടുത്തി (Dia Mirza Bobby Jasoo). 2014ൽ പുറത്തിറങ്ങിയ ബോബി ജാസൂസ് ഒരു വനിതാ കേന്ദ്രീകൃത ചിത്രമായാണ് ദിയ നിർമിക്കാൻ തീരുമാനിച്ചത്. തിരക്കഥയും മുഴുവൻ ടീമും തയ്യാറായിരുന്നുവെന്നും വിദ്യ ബാലന്റെ ഡേറ്റുകളും ലഭിച്ചിരുന്നുവെന്നും ദിയ പറഞ്ഞു. എന്നാൽ ചിത്രത്തിന്റെ നിർമാണം ആരംഭിക്കാനിരിക്കെ സ്റ്റുഡിയോകളും ഫിനാൻസർമാരും പിന്മാറുകയായിരുന്നു.

“ഞാൻ ആദ്യമായി വാങ്ങിയ വീട് പണയംവച്ചാണ് എനിക്ക് പറയാനുണ്ടായിരുന്ന കഥ സിനിമയാക്കിയത്. ബാങ്കിൽ നിന്ന് വായ്പയെടുത്തു, വീട് പണയംവച്ചു, അങ്ങനെ ഞങ്ങൾ ആ സിനിമ പൂർത്തിയാക്കി,” എന്നായിരുന്നു ദിയയുടെ പ്രതികരണം. സിനിമയുടെ നിർമാണത്തിന് നേരിട്ട സാമ്പത്തിക പ്രതിസന്ധിക്കിടയിലും ചിത്രം പൂർത്തിയാക്കിയതിൽ തനിക്ക് അഭിമാനമുണ്ടെന്നും അവർ പറഞ്ഞു. വിദ്യ ബാലന് പൂർണ പ്രതിഫലം നൽകിയതായും ദിയ വ്യക്തമാക്കി. “അവരുടെ കരിയറിലെ ഏറ്റവും മികച്ച പ്രതിഫലങ്ങളിലൊന്ന് ഞാൻ നൽകിയെന്നാണ് കരുതുന്നത്. സിനിമ മുഴുവൻ അവരെ കേന്ദ്രീകരിച്ചായിരുന്നു. ഒരു പുരുഷതാരം ഇതേ രീതിയിൽ സിനിമയെ നയിച്ചിരുന്നെങ്കിൽ മികച്ച പ്രതിഫലം നൽകുമായിരുന്നു. പിന്നെ എന്തുകൊണ്ട് വനിതാ താരത്തിന് അങ്ങനെ നൽകിക്കൂടാ?” എന്നായിരുന്നു ദിയയുടെ വാക്കുകൾ.

രഹ്ന ഹേ തേരേ ദിൽ മേം എന്ന ചിത്രത്തിലൂടെ 2001ൽ അഭിനയരംഗത്തെത്തിയ ദിയ മിർസ പിന്നീട് നിർമാണ രംഗത്തേക്കും കടന്നിരുന്നു. ബോബി ജാസൂസ് സംവിധാനം ചെയ്തത് സമർ ഷെയ്ഖാണ്. ചിത്രത്തിൽ ഡിറ്റക്ടീവാകാൻ ആഗ്രഹിക്കുന്ന യുവതിയായാണ് വിദ്യ ബാലൻ അഭിനയിച്ചത്. 2014ലാണ് ചിത്രം റിലീസ് ചെയ്തത്.

Summary: Dia Mirza revealed that she mortgaged her first home and took a bank loan to finance Bobby Jasoos after the film’s financiers withdrew. She also said she ensured Vidya Balan received one of the best salaries of her career because she was central to the film.