23,000 റൺസ് ക്ലബ്ബിൽ ജോ റൂട്ട്; സച്ചിനെ മറികടന്ന് റെക്കോഡ് നേട്ടം | Joe Root 23000 runs

ലണ്ടൻ: അന്താരാഷ്ട്ര ക്രിക്കറ്റിൽ റെക്കോഡുകൾ സ്വന്തമാക്കുന്നത് തുടരുകയാണ് ഇംഗ്ലണ്ട് ബാറ്റർ ജോ റൂട്ട് (Joe Root 23000 runs). അന്താരാഷ്ട്ര ക്രിക്കറ്റിൽ ഏറ്റവും വേഗത്തിൽ 23,000 റൺസ് തികയ്ക്കുന്ന രണ്ടാമത്തെ താരമായി റൂട്ട് മാറി. ക്രിക്കറ്റ് ഇതിഹാസം സച്ചിൻ തെണ്ടുൽക്കറുടെ റെക്കോഡാണ് താരം മറികടന്നത്.

ശ്രീലങ്കയ്‌ക്കെതിരായ ആദ്യ ഏകദിനത്തിനിടെയാണ് റൂട്ട് 23,000 അന്താരാഷ്ട്ര റൺസ് എന്ന നാഴികക്കല്ല് പിന്നിട്ടത്. മത്സരത്തിൽ 52 പന്തിൽ 44 റൺസാണ് താരം നേടിയത്. 521 ഇന്നിങ്‌സുകളിൽ നിന്നാണ് റൂട്ട് 23,000 റൺസിലെത്തിയത്. സച്ചിന് ഈ നേട്ടത്തിലെത്താൻ 522 ഇന്നിങ്‌സുകൾ വേണ്ടിവന്നിരുന്നു.

അതേസമയം, പട്ടികയിൽ ഒന്നാം സ്ഥാനത്തുള്ളത് ഇന്ത്യൻ താരം വിരാട് കോലിയാണ്. 490 ഇന്നിങ്‌സുകളിൽ നിന്നാണ് കോലി 23,000 അന്താരാഷ്ട്ര റൺസ് പൂർത്തിയാക്കിയത്.

അന്താരാഷ്ട്ര ക്രിക്കറ്റിൽ 23,000 റൺസ് നേടുന്ന എട്ടാമത്തെ താരവും ആദ്യ ഇംഗ്ലീഷ് ബാറ്ററുമാണ് ജോ റൂട്ട്. സച്ചിൻ തെണ്ടുൽക്കർ, വിരാട് കോലി, രാഹുൽ ദ്രാവിഡ്, കുമാർ സംഗക്കാര, മഹേല ജയവർധന, റിക്കി പോണ്ടിങ്, ജാക്വസ് കാലിസ് എന്നിവരാണ് റൂട്ടിന് മുമ്പ് ഈ നേട്ടത്തിലെത്തിയവർ.

ടെസ്റ്റ് ക്രിക്കറ്റിലും റൂട്ട് റെക്കോഡ് പ്രകടനങ്ങളുമായി മുന്നേറുകയാണ്. ടെസ്റ്റിൽ ഏറ്റവും കൂടുതൽ അർധ സെഞ്ചുറികൾ നേടിയ താരമെന്ന നേട്ടവും അടുത്തിടെ റൂട്ട് സ്വന്തമാക്കിയിരുന്നു. സച്ചിന്റെ 68 അർധ സെഞ്ചുറികളുടെ റെക്കോഡ് മറികടന്ന് റൂട്ട് 69 അർധ സെഞ്ചുറികൾ സ്വന്തമാക്കി.

ടെസ്റ്റ് ക്രിക്കറ്റിലെ റൺവേട്ടയിലും സച്ചിന്റെ റെക്കോഡ് മറികടക്കാനുള്ള പാതയിലാണ് റൂട്ട്. സച്ചിൻ 329 ഇന്നിങ്‌സുകളിൽ നിന്ന് 15,921 റൺസ് നേടിയപ്പോൾ, റൂട്ട് 309 ഇന്നിങ്‌സുകളിൽ നിന്ന് 14,278 റൺസുമായി രണ്ടാം സ്ഥാനത്താണ്. സച്ചിന്റെ റെക്കോഡ് മറികടക്കാൻ റൂട്ടിന് ഇനി 1,643 റൺസ് കൂടി വേണം.

ടെസ്റ്റ് റൺവേട്ടയിൽ റൂട്ടിന് പിന്നിലുള്ളത് റിക്കി പോണ്ടിങ് (13,378), ജാക്വസ് കാലിസ് (13,289), രാഹുൽ ദ്രാവിഡ് (13,288) എന്നിവരാണ്. മികച്ച ഫോം തുടരുന്ന റൂട്ടിന് ടെസ്റ്റ് ക്രിക്കറ്റിലെ റൺവേട്ടയിലും ചരിത്രം കുറിക്കാനുള്ള അവസരമാണ് മുന്നിലുള്ളത്.

English Story Summary:
England batter Joe Root has completed 23,000 international runs in 521 innings, becoming the second-fastest player to reach the milestone after Virat Kohli. Root also continues to close in on Sachin Tendulkar’s record for the most Test runs.