ജോധ്പുരിൽ രാസവസ്തു ഫാക്ടറിയിൽ തീപിടിത്തവും സ്ഫോടനവും; 14 അഗ്നിശമനസേനാംഗങ്ങൾക്ക് പരിക്ക് | Jodhpur factory blast

ജോധ്പുർ: രാജസ്ഥാനിലെ ജോധ്പുരിൽ രാസവസ്തുക്കൾ സൂക്ഷിച്ചിരുന്ന കരകൗശല ഫാക്ടറിയിലുണ്ടായ തീപിടിത്തത്തിനിടെ 14 അഗ്നിശമനസേനാംഗങ്ങൾക്ക് പരിക്ക്. ഇവരിൽ എട്ട് പേരുടെ നില ഗുരുതരമാണെന്ന് അധികൃതർ അറിയിച്ചു (Jodhpur factory blast). ഗണേഷ് നഗർ മേഖലയിലെ ഫാക്ടറിയിൽ ബുധനാഴ്ച വൈകിട്ട് 5.30ഓടെയാണ് തീപിടിത്തമുണ്ടായത്. ഫാക്ടറി അടച്ചിട്ടിരിക്കുകയായിരുന്നെങ്കിലും അകത്ത് സൂക്ഷിച്ചിരുന്ന കത്തുന്ന രാസവസ്തുക്കൾ നിറച്ച ഡ്രമ്മുകൾക്ക് തീപിടിച്ചതോടെ തുടർച്ചയായി സ്ഫോടനങ്ങളുണ്ടായി. തീ നിയന്ത്രണവിധേയമാക്കാനുള്ള ശ്രമങ്ങൾ ഇതോടെ ദുഷ്കരമായി. വിവിധ ഫയർ സ്റ്റേഷനുകളിൽ നിന്നായി 10 ഫയർ ടെൻഡറുകൾ സ്ഥലത്തെത്തിക്കുകയും ഏകദേശം 35 അഗ്നിശമനസേനാംഗങ്ങൾ രക്ഷാപ്രവർത്തനത്തിൽ ഏർപ്പെടുകയും ചെയ്തു.

രക്ഷാപ്രവർത്തനത്തിനിടെ ഫാക്ടറിയുടെ മേൽക്കൂരയിൽനിന്ന് ഒരു കല്ല് രാസവസ്തു ഡ്രമ്മിന് മുകളിൽ വീണതിനെ തുടർന്ന് സ്ഫോടനമുണ്ടായതാണ് 14 പേർക്ക് പരിക്കേൽക്കാൻ കാരണമായതെന്നാണ് പ്രാഥമിക വിവരം. പൊള്ളലേറ്റവരെ ആദ്യം എയിംസ് ജോധ്പുരിലെത്തിച്ചു. പ്രാഥമിക ചികിത്സയ്ക്ക് ശേഷം രണ്ടുപേരെ വിട്ടയച്ചു. ബേൺ യൂണിറ്റ് ഇല്ലാത്തതിനാൽ ബാക്കിയുള്ള 12 പേരെ മഹാത്മാഗാന്ധി ആശുപത്രിയിലേക്ക് മാറ്റി.

മഹാത്മാഗാന്ധി ആശുപത്രിയിലെത്തിച്ച 12 പേരിൽ എട്ട് പേർക്ക് 50 ശതമാനത്തിലധികം പൊള്ളലേറ്റിട്ടുണ്ടെന്നും ഇവരുടെ നില ഗുരുതരമാണെന്നും പൊലീസ് കമ്മിഷണർ അൻശുമാൻ ഭോമിയ അറിയിച്ചു. ഫാക്ടറിയിൽ തീപിടിക്കാൻ സാധ്യതയുള്ള രാസവസ്തുക്കളും തിന്നറും ഉപയോഗിച്ചിരുന്നതായും അധികൃതർ കണ്ടെത്തിയിട്ടുണ്ട്.
ഫാക്ടറി ജനവാസ മേഖലയിലാണ് പ്രവർത്തിച്ചിരുന്നതെന്നാണ് വിവരം. തീപിടിത്തത്തെ തുടർന്ന് സമീപത്തെ വീടുകളിലെ താമസക്കാരെ മുൻകരുതലിന്റെ ഭാഗമായി സുരക്ഷിത സ്ഥാനങ്ങളിലേക്ക് മാറ്റി. ശക്തമായ തീപിടിത്തത്തിൽ സമീപത്തെ ചില വീടുകൾക്കും കേടുപാടുകൾ സംഭവിച്ചതായി സംശയിക്കുന്നു. ഫാക്ടറിയുടെ ഉടമസ്ഥാവകാശവും ഇത്രയും അപകടസാധ്യതയുള്ള രാസവസ്തുക്കൾ സൂക്ഷിക്കാൻ ആവശ്യമായ അനുമതികൾ ഉണ്ടായിരുന്നോയെന്നും പരിശോധിച്ച് അന്വേഷണം ആരംഭിച്ചിട്ടുണ്ട്. സംഭവത്തിന് പിന്നാലെ ജില്ലാ കളക്ടറും പൊലീസ് കമ്മിഷണറും ആശുപത്രിയിലെത്തി പരിക്കേറ്റ അഗ്നിശമനസേനാംഗങ്ങളുടെ ആരോഗ്യനില വിലയിരുത്തി. മുൻ രാജസ്ഥാൻ മുഖ്യമന്ത്രി അശോക് ഗെഹ്‌ലോട്ടും സംഭവത്തിൽ ആശങ്ക രേഖപ്പെടുത്തി പരിക്കേറ്റവർ വേഗത്തിൽ സുഖം പ്രാപിക്കട്ടെയെന്ന് ആശംസിച്ചു.

Summary: Fourteen firefighters were injured while battling a major fire and explosions at a handicraft factory in Jodhpur, Rajasthan. Eight of the injured firefighters reportedly suffered burns over 50 per cent of their bodies and are in serious condition, while authorities are investigating the storage of highly flammable chemicals at the factory.