യമുന എക്‌സ്‌പ്രസ്‌വേയിൽ സ്ലീപ്പർ ബസിന് തീപിടിച്ച് ദുരന്തം: ഒരു സ്ത്രീയടക്കം 9 പേർ വെന്തുമരിച്ചു | Greater Noida bus fire
Current: മലയാളം
ഗ്രേറ്റർ നോയിഡ: ഉത്തർപ്രദേശിലെ ഗ്രേറ്റർ നോയിഡയ്ക്ക് സമീപം യമുന എക്‌സ്‌പ്രസ്‌വേയിൽ സ്ലീപ്പർ ടൂറിസ്റ്റ് ബസിന് തീപിടിച്ച് ഒരു സ്ത്രീയടക്കം ഒൻപത് യാത്രക്കാർ വെന്തുമരിച്ചു. നിരവധി പേർക്ക് ഗുരുതരമായി പരിക്കേറ്റു. ഡൽഹിയിൽ നിന്ന് ഉത്തർപ്രദേശിലെ മഹോബയിലേക്ക് പോകുകയായിരുന്ന ബസിലാണ് ദാരുണമായ അപകടമുണ്ടായത്.(Greater Noida bus fire, Nine Dead In Yamuna Expressway Sleeper Bus Fire)
അപകടസമയത്ത് 35-ഓളം യാത്രക്കാർ ബസിലുണ്ടായിരുന്നു.എയർ കണ്ടീഷനിങ് സിസ്റ്റത്തിലുണ്ടായ സ്ഫോടനത്തെ തുടർന്ന് എഞ്ചിനിലെ ലൂബ്രിക്കേറ്റിങ് ഓയിലിലേക്ക് തീ പടർന്നതാണ് ദുരന്തത്തിന് കാരണമെന്ന് പ്രാഥമിക അന്വേഷണത്തിൽ കണ്ടെത്തി. രാത്രിയിൽ ബസിലെ യാത്രക്കാർ ഭൂരിഭാഗവും ഉറങ്ങിക്കിടക്കുമ്പോഴാണ് പെട്ടെന്ന് തീ പടർന്നുപിടിച്ചത്. പുകയും തീയും ഉയർന്നതോടെ ഭയാനകമായ അന്തരീക്ഷമാണ് ബസിനുള്ളിൽ സൃഷ്ടിക്കപ്പെട്ടത്.
ജനൽച്ചില്ലുകൾ തകർത്ത് പുറത്തേക്ക് ചാടിയാണ് പലരും ജീവൻ രക്ഷപ്പെടുത്തിയത്. ഡ്രൈവറുടെ ക്യാബിനിൽ നിന്ന് പുകയും എരിഞ്ഞ നാറ്റവും ഉയർന്നതിനെ തുടർന്ന് യാത്രക്കാർ മുന്നറിയിപ്പ് നൽകിയിരുന്നെങ്കിലും വാഹനം നിർത്താൻ തയ്യാറാകാതിരുന്നതാണ് ദുരന്തത്തിന്റെ ആക്കം കൂട്ടിയതെന്ന് പോലീസിന്റെ എഫ്.ഐ.ആറിൽ വ്യക്തമാക്കുന്നു. സംഭവത്തിൽ ഡ്രൈവറെയും കണ്ടക്ടറെയും പോലീസ് അറസ്റ്റ് ചെയ്തു.
ജേവാർ പോലീസ് സ്റ്റേഷൻ പരിധിയിൽ നടന്ന അപകടസ്ഥലത്ത് അഗ്നിശമന സേനയെത്തിയാണ് തീയണച്ചതും രക്ഷാപ്രവർത്തനം നടത്തിയത്. അപകടത്തിൽ പ്രധാനമന്ത്രി നരേന്ദ്ര മോദിയും ഉത്തർപ്രദേശ് മുഖ്യമന്ത്രി യോഗി ആദിത്യനാഥും തീവ്രമായ ദുഃഖം രേഖപ്പെടുത്തി. പ്രധാനമന്ത്രിയുടെ ദേശീയ ദുരിതാശ്വാസ നിധിയിൽ നിന്നും സംസ്ഥാന സർക്കാരിൽ നിന്നും മരണപ്പെട്ടവരുടെ കുടുംബങ്ങൾക്ക് 2 ലക്ഷം രൂപ വീതവും പരിക്കേറ്റവർക്ക് 50,000 രൂപ വീതവും ധനസഹായം പ്രഖ്യാപിച്ചു.
Story Summary
At least nine passengers, including a woman, were killed and several injured after a sleeper tourist bus caught fire on the Yamuna Expressway in Greater Noida due to an AC system blast. The police have arrested the bus driver and conductor, while PM Narendra Modi and UP CM Yogi Adityanath announced compensation for the victims’ families.
