ഗ്യാനേഷ് കുമാറിനെതിരെ വീണ്ടും ഇംപീച്ച്മെന്റ് നീക്കവുമായി പ്രതിപക്ഷം; അടുത്തയാഴ്ച പാർലമെന്റിൽ നോട്ടീസ് നൽകിയേക്കും | Gyanesh Kumar impeachment motion

ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ വീണ്ടും ഇംപീച്ച്മെന്റ് പ്രമേയം കൊണ്ടുവരാൻ പ്രതിപക്ഷ നീക്കം. കോൺഗ്രസ് മുൻകൈയെടുത്ത് പ്രതിപക്ഷ പാർട്ടികൾക്കിടയിൽ ധാരണയായതായാണ് എൻഡിടിവി റിപ്പോർട്ട് ചെയ്യുന്നത്. പ്രമേയത്തിനുള്ള നോട്ടീസ് തയ്യാറാക്കുകയാണെന്നും അടുത്തയാഴ്ച തന്നെ പാർലമെന്റിൽ സമർപ്പിച്ചേക്കുമെന്നും കോൺഗ്രസ് വൃത്തങ്ങളെ ഉദ്ധരിച്ച് റിപ്പോർട്ട് പറയുന്നു. (Gyanesh Kumar impeachment motion)

തിരഞ്ഞെടുപ്പ് കമ്മീഷണർമാരായ സുഖ്ബീർ സിങ് സന്ധുവും വിവേക് ജോഷിയും കഴിഞ്ഞ പത്ത് മാസത്തിനിടെ കുറഞ്ഞത് 14 തവണ കമ്മീഷന്റെ തീരുമാനങ്ങളെയും ഉത്തരവുകളെയും കുറിച്ച് ഔദ്യോഗികമായി എതിർപ്പുകൾ രേഖപ്പെടുത്തിയെന്ന ഇന്ത്യൻ എക്സ്പ്രസ് അന്വേഷണ റിപ്പോർട്ടിന് പിന്നാലെയാണ് പുതിയ നീക്കം. വോട്ടർപട്ടിക പരിഷ്കരണം, പുതിയ വോട്ടർമാരെ ചേർക്കൽ, പേരുകൾ നീക്കം ചെയ്യൽ, പുനഃസ്ഥാപിക്കൽ തുടങ്ങിയ വിഷയങ്ങളിലാണ് ഇവർ എതിർപ്പുകൾ ഉന്നയിച്ചതെന്നാണ് റിപ്പോർട്ട്.

എന്നാൽ തിരഞ്ഞെടുപ്പ് കമ്മീഷനിൽ തീരുമാനങ്ങൾ വിഭജിക്കപ്പെട്ടിരുന്നുവെന്നോ രണ്ട് കമ്മീഷണർമാർ ഔദ്യോഗികമായി വിയോജിപ്പ് രേഖപ്പെടുത്തിയിരുന്നുവെന്നോ പറയാനാകില്ലെന്നാണ് കമ്മീഷന്റെ നിലപാട്. കഴിഞ്ഞ ഒരു വർഷത്തെ എല്ലാ തീരുമാനങ്ങളും ഏകകണ്ഠമായിരുന്നുവെന്നും ബന്ധപ്പെട്ട കമ്മീഷണർമാരുടെ കുറിപ്പുകൾ അഭിപ്രായങ്ങളോ നിർദേശങ്ങളോ മാത്രമായിരുന്നുവെന്നും തിരഞ്ഞെടുപ്പ് കമ്മീഷൻ വ്യക്തമാക്കിയിട്ടുണ്ട്. ഗ്യാനേഷ് കുമാറിനെതിരെ പ്രതിപക്ഷം നടത്തുന്ന നീക്കം ഇതാദ്യമല്ല. ഏപ്രിൽ 24ന് രാജ്യസഭയിലെ 73 പ്രതിപക്ഷ എംപിമാർ ‘തെളിയിക്കപ്പെട്ട ദുർനടപ്പ്’ ആരോപിച്ച് അദ്ദേഹത്തെ സ്ഥാനത്തുനിന്ന് നീക്കണമെന്നാവശ്യപ്പെട്ട് നോട്ടീസ് നൽകിയിരുന്നു. അതിന് മുമ്പ് മാർച്ചിലും ഇരുസഭകളിലുമായി ഗ്യാനേഷ് കുമാറിനെ നീക്കണമെന്നാവശ്യപ്പെട്ട് പ്രതിപക്ഷം നോട്ടീസ് നൽകിയിരുന്നു. എന്നാൽ ആ നോട്ടീസുകൾ ഏപ്രിൽ ആറിന് രാജ്യസഭാ ചെയർമാനും ലോക്സഭാ സ്പീക്കറും തള്ളിയിരുന്നു. ഏപ്രിലിലെ നോട്ടീസിൽ ഒപ്പിട്ട 73 പേരിൽ ഏഴ് പേർ പിന്നീട് കൂറുമാറിയ സാഹചര്യത്തിലാണ് നിലവിലെ പാർലമെന്റ് അംഗബലവും പുതിയ ആരോപണങ്ങളും പരിഗണിച്ച് പുതിയ നോട്ടീസ് തയ്യാറാക്കുന്നതെന്നാണ് പ്രതിപക്ഷ വൃത്തങ്ങളുടെ വിശദീകരണം. പുതിയ നീക്കത്തിൽ സെപ്റ്റംബർ 23ന് പുറത്തുവന്ന ഇന്ത്യൻ എക്സ്പ്രസ് റിപ്പോർട്ടിലെ വിവരങ്ങളും ഉൾപ്പെടുത്തുമെന്നാണ് സൂചന.

പ്രധാന തിരഞ്ഞെടുപ്പ് കമ്മീഷണറെ നീക്കം ചെയ്യുന്നതിനുള്ള നടപടിക്രമം സുപ്രീം കോടതി ജഡ്ജിയെ നീക്കം ചെയ്യുന്നതിനുള്ള നടപടിക്രമത്തിന് സമാനമാണ്. പാർലമെന്റ് അംഗങ്ങളുടെ ആവശ്യമായ പിന്തുണയോടെ പ്രമേയം അവതരിപ്പിക്കുകയും അത് അംഗീകരിക്കപ്പെട്ടാൽ അന്വേഷണത്തിന് വിധേയമാക്കുകയും തുടർന്ന് ഇരുസഭകളിലും പ്രത്യേക ഭൂരിപക്ഷത്തോടെ പ്രമേയം പാസാക്കുകയും വേണം. പുതിയ നോട്ടീസ് സമർപ്പിക്കപ്പെടുമോ, എത്ര പ്രതിപക്ഷ എംപിമാരുടെ പിന്തുണ ലഭിക്കും തുടങ്ങിയ കാര്യങ്ങൾ അടുത്ത ഘട്ടത്തിലാണ് വ്യക്തമാകുക.

Summary: Opposition parties are preparing a fresh impeachment motion against Chief Election Commissioner Gyanesh Kumar, with Congress taking the lead, according to NDTV sources. The move follows an Indian Express investigation that reported repeated objections by Election Commissioners Sukhbir Singh Sandhu and Vivek Joshi, while the Election Commission has said its decisions were unanimous.