വ്യവസായ സൗഹൃദത്തിൽ ഒന്നാം റാങ്കെന്ന പിണറായിയുടെ പ്രഖ്യാപനം വെറും തള്ള്. 46,981 കോടിയുടെ സ്വകാര്യ നിക്ഷേപം പ്രഖ്യാപിച്ചതിൽ നടപ്പായത് 6,101കോടിയുടെ മാത്രം. 43,421കോടിയുടെ പദ്ധതികൾ ഉപേക്ഷിച്ചു. 5 ദക്ഷിണേന്ത്യൻ സംസ്ഥാനങ്ങളിലെ ആകെ സ്വകാര്യ നിക്ഷേപ പദ്ധതികളിൽ കേരളത്തിന്റെ വിഹിതം അഞ്ച് വർഷത്തിനിടെ പകുതിയായി. നിക്ഷേപകർ മറ്റ് സംസ്ഥാനങ്ങളിലേക്ക് പോവുന്നു. വ്യവസായികളെ ആകർഷിക്കാൻ പദ്ധതിയൊരുക്കാൻ സതീശൻ സർക്കാർ

തിരുവനന്തപുരം: പിണറായി സർക്കാരിന്റെ കാലത്തെ വൻകിട നിക്ഷേപ പദ്ധതികളും നിക്ഷേപ വാഗ്ദാനങ്ങളും വെറും പൊള്ളയാണെന്ന് വ്യക്തമാവുന്നു. 

ഇൻവെസ്റ്റ് കേരള ഗ്ലോബൽ ഉച്ചകോടി, സംരംഭക വർഷം എന്നിങ്ങനെ വിവിധ പദ്ധതികളിലൂടെ കോടിക്കണക്കിന് രൂപയുടെ നിക്ഷേപം വരുമെന്നായിരുന്നു വാഗ്ദാനം.  

വിദേശത്തെയും ഇന്ത്യയിലെയും വൻകിട വ്യവസായികളെയും പ്രവാസി കൂട്ടായ്മകളെയും പങ്കെടുപ്പിച്ച് നടത്തുന്ന ആഗോള നിക്ഷേപ സംഗമങ്ങൾ നടത്തുകയും മന്ത്രിമാ‌ർ നിക്ഷേപം ആകർഷിക്കാൻ വിദേശയാത്ര നടത്തുകയും ചെയ്തിരുന്നു.  

ഒരു വർഷത്തിനുള്ളിൽ ഒരു ലക്ഷത്തിലധികം ചെറുകിട-ഇടത്തരം സംരംഭങ്ങൾ സംരംഭക വർഷത്തിലൂടെ വരുമെന്നായിരുന്നു പ്രഖ്യാപനമെങ്കിലും ഒന്നും നടന്നില്ല.

2021- 2026 സാമ്പത്തിക വർഷങ്ങളിൽ 46,981 കോടി രൂപയുടെ പുതിയ സ്വകാര്യ നിക്ഷേപ പദ്ധതികളാണ് സംസ്ഥാനത്ത് പ്രഖ്യാപിക്കപ്പെട്ടത്. എന്നാൽ അതേ കാലയളവിൽ, മുൻപ് പ്രഖ്യാപിച്ചവ ഉൾപ്പെടെ 43,421 കോടി രൂപയുടെ പദ്ധതികൾ ഉപേക്ഷിക്കപ്പെട്ടു. 

ഗുലാത്തി ഇൻസ്റ്റിറ്റ്യൂട്ട് ഓഫ് ഫിനാൻസ് ആൻഡ് ടാക്സേഷൻ പുറത്തുവിട്ട റിപ്പോർട്ടിലാണ് ഈ വിവരങ്ങളുള്ളത്. സെന്റർ ഫോർ മോണിറ്ററിംഗ് ഇന്ത്യൻ ഇക്കോണമിയുടെ കാപ്പെക്സ്  ഡാറ്റാബേസിനെ അടിസ്ഥാനമാക്കിയുള്ളതാണ് ഈ റിപ്പോർട്ട്. 

അഞ്ച് വർഷത്തിനിടെ 6,101 കോടി രൂപയുടെ പദ്ധതികൾ മാത്രമാണ് പൂർത്തിയായത്. ഇത് സംസ്ഥാനത്ത് പ്രതിവർഷം നിലവിലുള്ള ശരാശരി 98,000 കോടി രൂപയുടെ പദ്ധതികളുടെ വെറും 1.2% മാത്രമാണ്. നിലവിലുള്ള സ്വകാര്യ പദ്ധതികളുടെ എണ്ണം 2022 സാമ്പത്തിക വർഷത്തിലെ 212-ൽ നിന്ന് 2026-ൽ 185 ആയി കുറഞ്ഞു.

പുതിയ പ്രഖ്യാപനങ്ങൾ ലഭിക്കാത്തതല്ല സംസ്ഥാനത്തിന്റെ പ്രശ്നം, മറിച്ച് പ്രഖ്യാപിച്ച പദ്ധതികൾ യാഥാർത്ഥ്യമാക്കാൻ കഴിയാത്തതാണ്.  

സ്ഥലമേറ്റെടുക്കൽ, അനുമതികൾ ലഭിക്കുന്നതിലെ കാലതാമസം, അനുമതി ലഭിച്ച ശേഷമുള്ള പിന്തുണയുടെ കുറവ് എന്നിവയാണ് പ്രധാന തടസ്സങ്ങളായി റിപ്പോർട്ടിൽ ചൂണ്ടിക്കാണിക്കുന്നത്. 

ദക്ഷിണേന്ത്യയിലെ അഞ്ച് സംസ്ഥാനങ്ങളുടെ ആകെ സ്വകാര്യ നിക്ഷേപ പദ്ധതികളിൽ കേരളത്തിന്റെ വിഹിതം അഞ്ച് വർഷത്തിനിടെ പകുതിയായി കുറഞ്ഞു. 

2022-ൽ 4.2% ആയിരുന്നത് 2026 സാമ്പത്തിക വർഷത്തിൽ 2.2% ആയി താഴ്ന്നു. ആന്ധ്രാപ്രദേശിൽ ഒരാൾക്ക് പ്രതിശീർഷ നിക്ഷേപ പദ്ധതി 3.66 ലക്ഷം രൂപയാണെങ്കിൽ, കേരളത്തിൽ ഇത് വെറും 28,112 രൂപ മാത്രമാണ്.

അതേസമയം, സംസ്ഥാന സർക്കാരിന്റെ പൊതു നിക്ഷേപ പദ്ധതികൾ സ്വകാര്യ നിക്ഷേപത്തിനേക്കാൾ 5.6 മടങ്ങ് കൂടുതലാണ്. 

പ്രതിശീർഷ പൊതു നിക്ഷേപം 2022-ലെ 89,096 രൂപയിൽ നിന്ന് 2026-ൽ 1.57 ലക്ഷം രൂപയായി ഉയർന്നു. അഞ്ച് ദക്ഷിണേന്ത്യൻ സംസ്ഥാനങ്ങളിൽ ഏറ്റവും ഉയർന്ന സർക്കാർ നിക്ഷേപ അനുപാതമുള്ളതും കേരളത്തിലാണ്.

കേരളത്തിന്റെ പ്രവാസി ധനം കൂടുതൽ മെച്ചപ്പെട്ട രീതിയിൽ ഉപയോഗിക്കണമെന്ന് റിപ്പോർട്ട് ആവശ്യപ്പെടുന്നു. 1990കളുടെ തുടക്കത്തിൽ വിദേശ മൂലധനം ഒഴുകിയെത്തുന്നതിന് മുൻപ് ചൈനയിലെ വിദേശ നിക്ഷേപത്തിന്റെ 70%-ത്തിലധികവും അവിടുത്തെ പ്രവാസികളിൽ നിന്നായിരുന്നു എന്ന് റിപ്പോർട്ട് ചൂണ്ടിക്കാണിക്കുന്നു. 

കേരള മൈഗ്രേഷൻ സർവേ  2023 പ്രകാരം, കേരളത്തിലെ പ്രവാസികൾ പ്രതിവർഷം ഒരാൾക്ക് ഏകദേശം 60,000 രൂപ എന്ന തോതിൽ നാട്ടിലേക്ക് പണമയക്കുന്നുണ്ട്. ഇത് സംസ്ഥാനത്തേക്ക് വരുന്നത് പ്രതിവർഷം എത്തുന്ന പുതിയ നിക്ഷേപത്തിന്റെ 20 മടങ്ങിലധികമാണ്. 

അതിനാൽ ഈ പ്രവാസി പണത്തെ യഥാർത്ഥ നിക്ഷേപമാക്കി മാറ്റാനുള്ള ഫലപ്രദമായ മാർഗ്ഗങ്ങൾ രൂപീകരിക്കണമെന്ന് റിപ്പോർട്ടിൽ നിർദ്ദേശിക്കുന്നു.

തമിഴ്‌നാട്, കർണാടക, ആന്ധ്രാപ്രദേശ്, തെലങ്കാന തുടങ്ങിയ സംസ്ഥാനങ്ങൾ വലിയ വിസ്തൃതിയുള്ള വ്യവസായ പാർക്കുകളും വേഗത്തിലുള്ള അനുമതികളും ആകർഷകമായ നികുതി ഇളവുകളും വാഗ്ദാനം ചെയ്യുന്നു.

നിക്ഷേപത്തിലെ കുറവ്: റിപ്പോർട്ട് ചൂണ്ടിക്കാണിക്കുന്നത് പോലെ ദക്ഷിണേന്ത്യയിലെ ആകെയുള്ള സ്വകാര്യ നിക്ഷേപത്തിൽ കേരളത്തിന്റെ വിഹിതം 4.2%-ൽ നിന്ന് 2.2% ആയി പകുതിയോളം കുറഞ്ഞു. നിക്ഷേപകർ കൂടുതൽ ബിസിനസ് സൗഹൃദ അന്തരീക്ഷമുള്ള മറ്റ് സംസ്ഥാനങ്ങളിലേക്ക് മാറുന്നു.