സ്വർണവിലയിൽ വീണ്ടും കുതിപ്പ്; ചൈനയുടെ വൻതോതിലുള്ള വാങ്ങലും ആഗോള വിപണിയിലെ മാറ്റങ്ങളും നിർണായകം | Kerala gold price

കൊച്ചി: തുടർച്ചയായ ഇടിവിന് ശേഷം കേരളത്തിലെ സ്വർണവില വീണ്ടും ഉയർന്നു. ഗ്രാമിന് 70 രൂപ വർധിച്ച് 13,710 രൂപയായപ്പോൾ പവന് 560 രൂപ കൂടി 1,09,680 രൂപയിലെത്തി. 18 കാരറ്റ് സ്വർണവിലയും ഗ്രാമിന് 60 രൂപ ഉയർന്ന് 11,265 രൂപയായി. വെള്ളിവിലയിൽ മാറ്റമില്ല; ഗ്രാമിന് 240 രൂപയാണ്. അന്താരാഷ്ട്ര വിപണിയിലും സ്വർണവില ഉയർന്നു. കഴിഞ്ഞ ദിവസം ഔൺസിന് 4,138 ഡോളറായിരുന്ന വില സെപ്റ്റംബർ 30ന് 4,177 ഡോളറിലെത്തി. സൗദി അറേബ്യയിൽ യാമ്പുവിൽ നിന്നുള്ള എണ്ണ കയറ്റുമതി പുനരാരംഭിച്ചതിനെ തുടർന്ന് ക്രൂഡോയിൽ വിലയിൽ വന്ന മാറ്റവും സ്വർണവിലയെ സ്വാധീനിക്കുന്ന ഘടകങ്ങളിലൊന്നാണ്. (Kerala gold price)

ചൈനയുടെ സ്വർണം വാങ്ങിക്കൂട്ടലും വിപണിയിൽ ശ്രദ്ധേയമാണ്. 2025ൽ ചൈന 940 ടൺ സ്വർണം ഇറക്കുമതി ചെയ്തപ്പോൾ, 2026 ഓഗസ്റ്റ് വരെയുള്ള കണക്ക് പ്രകാരം ഇറക്കുമതി 1,141 ടണ്ണിലെത്തി. ഓഗസ്റ്റിൽ മാത്രം 142 ടൺ സ്വർണം വാങ്ങിയതായി റിപ്പോർട്ടിൽ പറയുന്നു. ചൈനീസ് കേന്ദ്രബാങ്കായ പീപ്പിൾസ് ബാങ്ക് ഓഫ് ചൈനയാണ് കരുതൽ ശേഖരത്തിലേക്ക് സ്വർണം കൂട്ടിച്ചേർക്കുന്നത്. ഭൗമരാഷ്ട്രീയ സംഘർഷങ്ങളും കറൻസി, ബോണ്ട് വിപണികളിലെ അനിശ്ചിതത്വവും ആഗോളതലത്തിൽ സ്വർണത്തിന്റെ ഡിമാൻഡ് വർധിപ്പിക്കുന്ന ഘടകങ്ങളാണ്. കേന്ദ്രബാങ്കുകളുടെ സ്വർണം വാങ്ങൽ തുടരുകയും യുഎസ് ഡോളറും ബോണ്ട് യീൽഡും താഴുകയും ചെയ്താൽ 2027ൽ അന്താരാഷ്ട്ര സ്വർണവില 5,200 ഡോളറിലെത്താമെന്നാണ് ലണ്ടൻ ആസ്ഥാനമായ എലാറ ക്യാപിറ്റലിന്റെ വിലയിരുത്തൽ.

അന്താരാഷ്ട്ര വില 5,200 ഡോളറിലെത്തിയാൽ കേരളത്തിൽ പവൻ വില 1.26 ലക്ഷം രൂപ കടന്നേക്കാമെന്നാണ് കണക്കുകൂട്ടൽ. രൂപ-ഡോളർ വിനിമയനിരക്ക് കൂടി പരിഗണിച്ചാൽ പവൻ വില 1.32 ലക്ഷം രൂപയെങ്കിലും എത്തിയേക്കാമെന്നാണ് ചില അനലിസ്റ്റുകളുടെ വിലയിരുത്തൽ. ഈ വർഷം ജനുവരി 29ന് രേഖപ്പെടുത്തിയ 1,31,000 രൂപയാണ് പവന്റെ നിലവിലെ റെക്കോർഡ്. അതേസമയം, സ്വർണവില എപ്പോഴും ഉയരണമെന്നില്ല. ഇറാൻ-യുഎസ് സംഘർഷം രൂക്ഷമാകുകയും ക്രൂഡോയിൽ വില ഉയരുകയും ചെയ്താൽ യുഎസ് ഡോളറും ബോണ്ട് യീൽഡും ശക്തിപ്പെടാൻ സാധ്യതയുണ്ട്. ഫെഡറൽ റിസർവ് പലിശനിരക്ക് ഉയർത്തുന്ന സാഹചര്യമുണ്ടായാൽ സ്വർണത്തിന് സമ്മർദമുണ്ടാകാം. അത്തരമൊരു സാഹചര്യത്തിൽ അന്താരാഷ്ട്ര വില 3,940 ഡോളറിലേക്ക് താഴാനും കേരളത്തിൽ പവൻ വില ഏകദേശം 1.06 ലക്ഷം രൂപയിലെത്താനും സാധ്യതയുണ്ടെന്നാണ് റിപ്പോർട്ടിലെ വിലയിരുത്തൽ.

Summary: Gold prices in Kerala have resumed their upward movement, with the price of a sovereign rising to ₹1,09,680. Chinese gold purchases, oil prices, US dollar movements and geopolitical tensions are among the key factors influencing the market.