ഫ്ലൈദുബായ് വിമാനത്തിൽ സഹപൈലറ്റ് നടത്തിയ ഭീകരാക്രമണത്തോടെ വീണ്ടും ആഗോള ചർച്ചയായി വിമാനങ്ങളിലെ കോക്ക്പിറ്റ് സുരക്ഷാ പ്രോട്ടോക്കോളുകൾ: 9/11 ഭീകരാക്രമണത്തിനും കാണ്ഡഹാർ വിമാന അപഹരണത്തിനും ശേഷം കർശനമാക്കിയ ബുള്ളറ്റ് പ്രൂഫ് വാതിലുകളും അടിയന്തര സിഗ്നൽ കോഡുകളും വിമാന ദുരന്തങ്ങൾ ഒഴിവാക്കുന്നതിൽ നിർണ്ണായകമാകുന്നതായി വിലയിരുത്തൽ
Current: മലയാളം
റിയാദ്: ദുബായില്‍ നിന്ന് ടെല്‍ അവീവിലേക്ക് പറന്ന ഫ്ലൈദുബായ് വിമാനത്തില്‍ വെച്ച് സഹപൈലറ്റ് ക്യാപ്റ്റനെ കുത്തിപ്പരിക്കേല്‍പ്പിച്ച് വിമാനം തകര്‍ക്കാന്‍ ശ്രമിച്ച ഞെട്ടിക്കുന്ന സംഭവം, ആഗോള വ്യോമയാന മേഖലയിലെ കോക്ക്പിറ്റ് സുരക്ഷാ മാനദണ്ഡങ്ങളെയും അടിയന്തര പ്രോട്ടോക്കോളുകളെയും കുറിച്ചുള്ള ചര്‍ച്ചകള്‍ക്ക് വീണ്ടും വഴിവെച്ചു.
174 യാത്രക്കാരുമായി സഞ്ചരിച്ച ബോയിംഗ് 737 മാക്‌സ് 8 വിമാനം സൗദി അറേബ്യയിലെ തബൂക്കില്‍ അടിയന്തരമായി ലാന്‍ഡ് ചെയ്തത്, 2001-ലെ 9/11 ഭീകരാക്രമണത്തിനും 1999-ലെ കാണ്ഡഹാര്‍ വിമാന അപഹരണത്തിനും ശേഷം കര്‍ശനമാക്കിയ സുരക്ഷാ നിയമങ്ങളുടെ പ്രാധാന്യം ഓര്‍മ്മിപ്പിക്കുന്നതാണെന്ന് വിലയിരുത്തപ്പെടുന്നു.
വിമാനത്തിന്റെ നിയന്ത്രണം വീണ്ടെടുക്കാന്‍ സഹായിച്ച രഹസ്യ അടിയന്തര കോഡുകള്‍, നുഴഞ്ഞുകയറ്റങ്ങള്‍ പ്രതിരോധിക്കുന്ന കോക്ക്പിറ്റ് വാതിലുകള്‍, പൈലറ്റുമാരുടെ പശ്ചാത്തല പരിശോധനകള്‍ എന്നിവയാണ് ഇപ്പോള്‍ പ്രധാനമായും വിശകലനം ചെയ്യപ്പെടുന്നത്.
അക്രമത്തിന്റെ പിന്നിലെ യഥാര്‍ത്ഥ കാരണങ്ങളെക്കുറിച്ച് വ്യക്തതയില്ലെന്നും അനാവശ്യ ഊഹാപോഹങ്ങള്‍ ഒഴിവാക്കണമെന്നും ഫ്ലൈദുബായ് അധികൃതര്‍ വ്യക്തമാക്കുമ്പോഴും, ഇതൊരു ഭീകരാക്രമണ ശ്രമമാണെന്നാണ് ഇസ്രായേല്‍ പ്രതിരോധ മന്ത്രാലയത്തിന്റെ നിഗമനം.
9/11 ആക്രമണത്തിന് ശേഷമാണ് ഇന്റര്‍നാഷണല്‍ സിവിലിയന്‍ ഏവിയേഷന്‍ ഓര്‍ഗനൈസേഷന്റെ നിര്‍ദ്ദേശപ്രകാരം വെടിയുണ്ടകളെയും ഗ്രനേഡ് കഷണങ്ങളെയും പ്രതിരോധിക്കാന്‍ ശേഷിയുള്ള ബുള്ളറ്റ് പ്രൂഫ് കോക്ക്പിറ്റ് വാതിലുകള്‍ വിമാനങ്ങളില്‍ നിര്‍ബന്ധമാക്കിയത്.
അകത്തുനിന്ന് മാത്രം പൂര്‍ണ്ണമായി പൂട്ടിയിടാന്‍ കഴിയുന്ന ഇത്തരം വാതിലുകള്‍ പുറത്തുനിന്ന് കീപാഡ് വഴി തുറക്കാന്‍ ശ്രമിച്ചാലും കോക്ക്പിറ്റിലിരിക്കുന്ന പൈലറ്റിന് നിഷേധിക്കാന്‍ സാധിക്കും.
അടിയന്തര സാഹചര്യത്തില്‍ ക്യാപ്റ്റന്‍ സ്മിത് മച്ചാര്‍ വാതില്‍ തുറന്നു കൊടുത്തതുകൊണ്ട് മാത്രമാണ് യാത്രക്കാര്‍ക്കും ജീവനക്കാര്‍ക്കും അകത്തുകയറി അക്രമിയെ കീഴടക്കാന്‍ സാധിച്ചതെന്നത് ഈ സുരക്ഷാ സംവിധാനങ്ങളുടെ നിര്‍ണ്ണായക പങ്കിനെ അടിവരയിടുന്നു.
