Skip to content
November 19, 2026
⌕

ഡബ്ലിനിൽ പ്ലാസ്റ്റിക് ബിൻ ബാഗുകൾ ഉപയോഗിക്കുന്നതിനു നിരോധനം ഏർപ്പെടുത്താൻ സിറ്റി കൗൺസിൽ

October 3, 2026
Share this post to

ഡബ്ലിൻ 7 പ്രദേശത്ത് തെരുവിൽ പ്ലാസ്റ്റിക് ബിൻ ബാഗുകൾ ഉപയോഗിക്കുന്നത് അടുത്ത ഫെബ്രുവരി മുതൽ നിരോധിക്കാനുള്ള പദ്ധതികളുമായി മുന്നോട്ട് പോകാൻ ഡബ്ലിൻ സിറ്റി കൗൺസിലിന്റെ വേസ്റ്റ് ഡിവിഷൻ. സ്റ്റോണിബാറ്റർ, ഫിബ്സ്ബറോ, സ്മിത്ത്ഫീൽഡ്, ബ്രോഡ്സ്റ്റോൺ എന്നിവിടങ്ങളിൽ ഒക്ടോബർ 17 മുതൽ ബാഗുകൾ നിരോധിക്കാനും ലംഘിക്കുന്നവർക്ക് 250 യൂറോ പിഴ ചുമത്താനും നേരത്തെ തീരുമാനിച്ചിരുന്നെങ്കിലും, പ്രദേശവാസികളുടെ ശക്തമായ പ്രതിഷേധത്തെത്തുടർന്ന് ഈ മാസം നടപ്പിലാക്കാനിരുന്ന പദ്ധതി താൽക്കാലികമായി മാറ്റിവെക്കുകയായിരുന്നു.

വീടുകളിൽ വീലി ബിന്നുകൾ സൂക്ഷിക്കാൻ മതിയായ ഇടമില്ലാത്ത താമസക്കാരുടെ എതിർപ്പിനെത്തുടർന്ന് ജൂലൈയിൽ നടപ്പിലാക്കേണ്ടിയിരുന്ന പദ്ധതി കൗൺസിൽ ഒക്ടോബറിലേക്ക് നീട്ടുകയും പൊതു കൂടിയാലോചന നടത്തുകയും ചെയ്തിരുന്നു. എന്നാൽ, പ്രതികരിച്ചവരിൽ മുക്കാൽ ഭാഗത്തിലധികം പേരും ബാഗ് നിരോധനത്തെ എതിർത്തു. എങ്കിലും തെരുവുകൾ പ്ലാസ്റ്റിക് ബാഗ് വിമുക്തമാക്കാനും ശുചിത്വം ഉറപ്പാക്കാനുമുള്ള തീരുമാനത്തിൽ ഉറച്ചുനിൽക്കുന്നതായി കാലാവസ്ഥാ-നഗര പ്രതിരോധ എക്സിക്യൂട്ടീവ് മാനേജർ ഡെറക് കെല്ലി കൗൺസിലർമാരെ അറിയിച്ചു.

നടപ്പിലാക്കുന്നതിന് മുൻപായി കൂടുതൽ പ്രായോഗികമായ ബദലുകൾ കണ്ടെത്താനാണ് ഇപ്പോൾ സമയം അനുവദിച്ചിരിക്കുന്നത്. ഈ കാലാവധിയിൽ കൗൺസിലർമാരുമായും മാലിന്യ ശേഖരണ കമ്പനികളുമായും ചേർന്ന് താമസക്കാർക്ക് പ്രായോഗികവും നിയമപരവും പാരിസ്ഥിതിക ലക്ഷ്യങ്ങൾക്ക് അനുയോജ്യവുമായ മറ്റ് പരിഹാരങ്ങൾ പരിശോധിക്കും. ഇതുസംബന്ധിച്ച റിപ്പോർട്ട് നവംബറിൽ കൗൺസിലർമാർക്ക് സമർപ്പിക്കുമെങ്കിലും, കൗൺസിൽ മറ്റ് മാറ്റങ്ങളൊന്നും നിർദ്ദേശിച്ചില്ലെങ്കിൽ 2027 ഫെബ്രുവരി 1 മുതൽ നിരോധനം പ്രാബല്യത്തിൽ വരുമെന്ന് കെല്ലി വ്യക്തമാക്കി.

മാലിന്യ ചാക്കുകൾക്ക് പകരം ബിന്നുകൾ നിർബന്ധമാക്കിക്കൊണ്ട് 2016-ൽ നിയമം വന്നിരുന്നെങ്കിലും, വീടുകളുടെ സൗകര്യക്കുറവ് കണക്കിലെടുത്ത് നൽകിയിരുന്ന താൽക്കാലിക ഇളവാണ് ഇപ്പോൾ നിർത്തലാക്കുന്നത്. തെരുവ് ശുചിത്വം ഉറപ്പാക്കാനും കീടശല്യം കുറയ്ക്കാനും യൂറോപ്യൻ മാലിന്യ മാനേജ്‌മെന്റ് മാനദണ്ഡങ്ങൾ പാലിക്കാനുമാണ് ഈ നടപടി. സിറ്റി സെന്ററിലെ ടെമ്പിൾ ബാർ, ഗ്രാഫ്റ്റൺ സ്ട്രീറ്റ്, നോർത്ത് ഇന്നർ സിറ്റി തുടങ്ങിയ പ്രദേശങ്ങളിൽ ഈ ബാഗ് നിരോധനം ഇതിനകം വിജയകരമായി നടപ്പിലാക്കിയിട്ടുണ്ട്.

Get more updates from Pudukad News on Google