ഇന്ത്യയിൽ മുൻപുണ്ടായിരുന്ന സമാധാനവും ശാന്തതയും ഇപ്പോൾ അനുഭവപ്പെടുന്നില്ലെന്ന വിവാദ പരാമർശത്തിൽ ഒടുവിൽ വിശദീകരണവുമായി സഞ്ജയ് ദത്ത്: ടോക്ക് ഷോയിൽ പറഞ്ഞ കാര്യങ്ങൾ മുൻകൂട്ടി തയ്യാറാക്കിയ സ്ക്രിപ്റ്റിന്റെ ഭാഗം മാത്രമായിരുന്നുവെന്ന് നടന്റെ വെളിപ്പെടുത്തൽ; ആരുടെയും വികാരങ്ങളെ വ്രണപ്പെടുത്താൻ ഉദ്ദേശിച്ചിരുന്നില്ല
Current: മലയാളം
മുംബൈ: നടന്‍ ശേഖര്‍ സുമന്‍ അവതാരകനായ ‘ശേഖര്‍ ടുനൈറ്റ്’ എന്ന ടോക്ക് ഷോയില്‍ ഭാരതത്തില്‍ ശാന്തിയും സമാധാനവും കുറയുന്നുവെന്ന രീതിയില്‍ നടത്തിയ പരാമര്‍ശത്തില്‍ വിശദീകരണവുമായി ബോളിവുഡ് താരം സഞ്ജയ് ദത്ത്.
താന്‍ നടത്തിയ പരാമര്‍ശങ്ങള്‍ തികച്ചും മുന്‍കൂട്ടി തയാറാക്കിയ തിരക്കഥയുടെ ഭാഗമായിരുന്നുവെന്നും ആരുടെയും വികാരങ്ങളെ വ്രണപ്പെടുത്താന്‍ ഉദ്ദേശിച്ചിരുന്നില്ലെന്നും താരം എക്‌സിലൂടെ വ്യക്തമാക്കി.
ഗാന്ധി ജയന്തി ദിനത്തോടനുബന്ധിച്ച് നടന്ന പരിപാടിയില്‍ തന്റെ മുന്‍കാല ചിത്രമായ ‘മുന്‍നാ ഭായ്’ പ്രമേയമാക്കിയുള്ള തമാശ രൂപേണയുള്ള രാഷ്ട്രീയ ആക്ഷേപഹാസ്യ സംഭാഷണമാണ് നടന്നതെന്നും, എന്നാല്‍ താന്‍ പറഞ്ഞ കാര്യങ്ങള്‍ തെറ്റായ രീതിയില്‍ വ്യാഖ്യാനിക്കപ്പെടുകയായിരുന്നുവെന്നും അദ്ദേഹം കൂട്ടിച്ചേര്‍ത്തു.
ഷോയ്ക്കിടെ രാജ്യത്തെ നിലവിലെ അവസ്ഥയെക്കുറിച്ച് സംസാരിക്കവേ, ഇന്ത്യക്കാര്‍ വലിയ മനസ്സുള്ളവരാണെന്നും എന്നാല്‍ രാജ്യത്ത് മുന്‍പുണ്ടായിരുന്ന ആ ശാന്തതയും സമാധാനവും ഇപ്പോള്‍ അനുഭവപ്പെടുന്നില്ലെന്നുമായിരുന്നു സഞ്ജയ് ദത്ത് പറഞ്ഞത്.
കൂടാതെ, അഞ്ചു മിനിറ്റത്തേക്ക് താന്‍ ഇന്ത്യയുടെ പ്രധാനമന്ത്രിയായാല്‍ എന്തൊക്കെ ചെയ്യുമെന്ന മുന്‍നാ ഭായ് ശൈലിയിലുള്ള തമാശ രൂപേണയുള്ള ചോദ്യത്തിന് ഗാന്ധിജിയുടെ മൂന്ന് കുരങ്ങന്മാര്‍ക്ക് പുറമെ തെറ്റുകള്‍ കണ്ടാല്‍ അത് തിരുത്തുന്ന നാലാമതൊരു കുരങ്ങന്‍ കൂടി ഇന്നത്തെ കാലത്ത് ആവശ്യമാണെന്നും അദ്ദേഹം പറഞ്ഞിരുന്നു.
ഈ പരാമര്‍ശങ്ങള്‍ സോഷ്യല്‍ മീഡിയയില്‍ വലിയ വിവാദങ്ങള്‍ക്കും ചര്‍ച്ചകള്‍ക്കും വഴിവെച്ചതിനെ തുടര്‍ന്നാണ് താരം മുന്‍കൂട്ടി തയ്യാറാക്കിയ സ്ക്രിപ്റ്റിന്റെ ഭാഗമായാണ് ഇത്തരം പരാമര്‍ശങ്ങള്‍ നടത്തിയതെന്ന വിശദീകരണവുമായി രംഗത്തെത്തിയത്.
