ഹൂതികൾക്കെതിരെ തിരിച്ചടിക്ക് യെമൻ സർക്കാർ; രാജ്യത്തെ മുഴുവൻ പ്രദേശങ്ങളും തിരിച്ചുപിടിക്കാൻ സൈനിക നീക്കം | Yemen government offensive against Houthis
Current: മലയാളം
യെമനിൽ ഇറാൻ പിന്തുണയ്ക്കുന്ന ഹൂതി വിമതരുടെ നിയന്ത്രണത്തിലുള്ള പ്രദേശങ്ങൾ തിരിച്ചുപിടിക്കാൻ വലിയ സൈനിക നീക്കം ആരംഭിച്ചതായി സൗദി പിന്തുണയുള്ള യെമൻ സർക്കാർ. പ്രസിഡൻഷ്യൽ ലീഡർഷിപ്പ് കൗൺസിൽ (PLC) പ്രസിഡന്റ് റഷാദ് അൽ അലിമിയാണ് രാജ്യത്തെ മുഴുവൻ പ്രദേശങ്ങളും തിരിച്ചുപിടിക്കുന്നതുവരെ സൈനിക നടപടി തുടരുമെന്ന് പ്രഖ്യാപിച്ചത്. (Yemen government offensive against Houthis)
ഹൂതികൾ 2014 മുതൽ തലസ്ഥാനമായ സനാ ഉൾപ്പെടെ ജനസംഖ്യ കൂടുതലുള്ള വടക്കുപടിഞ്ഞാറൻ യെമന്റെ വലിയ ഭാഗം നിയന്ത്രിച്ചുവരികയാണ്. കഴിഞ്ഞ മാസം നടത്തിയ അപ്രതീക്ഷിത ആക്രമണത്തിൽ തന്ത്രപ്രധാനമായ ബാബ് അൽ-മന്ദബ് കടലിടുക്കും ചെങ്കടൽ തീരത്തെ ഏകദേശം 150 കിലോമീറ്റർ പ്രദേശവും ഹൂതികൾ പിടിച്ചെടുത്തതായി റിപ്പോർട്ടുണ്ട്. ഇതോടെ അന്താരാഷ്ട്ര കപ്പൽ ഗതാഗതത്തിന് നിർണായകമായ ഈ പാതയിൽ ഹൂതികൾക്ക് കൂടുതൽ സ്വാധീനം ലഭിച്ചു. യെമൻ സർക്കാർ തിരിച്ചടിക്ക് ഒരുങ്ങുന്നതിനിടെ സൗദി അറേബ്യയിലെ അരാംകോ കേന്ദ്രങ്ങൾ ലക്ഷ്യമിട്ട് ബാലിസ്റ്റിക് മിസൈലുകളും ഡ്രോണുകളും വിക്ഷേപിച്ചതായി ഹൂതികൾ അവകാശപ്പെട്ടു. റിയാദിലെയും ഖുറൈസ് മേഖലയിലെയും കേന്ദ്രങ്ങളിലാണ് ആക്രമണം നടത്തിയതെന്നും വലിയ തീപിടിത്തമുണ്ടായെന്നും ഹൂതികൾ പറഞ്ഞു. കഴിഞ്ഞ 12 മണിക്കൂറിനിടെ യെമനിൽ സൗദിയുടെ നേതൃത്വത്തിൽ 50 വ്യോമ-മിസൈൽ ആക്രമണങ്ങൾ നടന്നതിന് മറുപടിയായാണ് നടപടിയെന്നും അവർ വ്യക്തമാക്കി. എന്നാൽ ഈ അവകാശവാദങ്ങളിൽ സൗദിയുടെ സ്ഥിരീകരണം ഉടൻ ലഭിച്ചിട്ടില്ല.
സൗദി അറേബ്യയും യെമനിലെ സഖ്യകക്ഷികളും ഹൂതികൾക്കെതിരെ ആക്രമണത്തിന് തയ്യാറെടുക്കുന്നതായി നേരത്തെ തന്നെ റിപ്പോർട്ടുകളുണ്ടായിരുന്നു. സൗദി വ്യോമാക്രമണങ്ങൾക്ക് നേതൃത്വം നൽകുകയും യെമൻ സേന കരയിൽനിന്ന് മുന്നേറുകയും ചെയ്യുന്ന രീതിയിലാണ് നീക്കം ആസൂത്രണം ചെയ്തതെന്നാണ് റിപ്പോർട്ട്. ബാബ് അൽ-മന്ദബ് കടലിടുക്ക് പിടിച്ചെടുത്തതിന് പിന്നാലെ ഹൂതികൾ യെമനിലെ തായിസ് മേഖലയിലും മുന്നേറ്റം തുടരുന്നതായാണ് സൈനിക വൃത്തങ്ങളെ ഉദ്ധരിച്ചുള്ള റിപ്പോർട്ട്. തായിസിനും തെക്കൻ തീരത്തെ ഏദനും ഇടയിലെ അവസാന പ്രധാന റോഡിന്റെ നിയന്ത്രണം ഹൂതികൾ നേടിയാൽ നഗരത്തെ ഫലത്തിൽ ഉപരോധിക്കാനാകും. യെമനിലെ മൂന്നാമത്തെ വലിയ നഗരമായ തായിസിൽ ലക്ഷക്കണക്കിന് സാധാരണക്കാരും ആയിരക്കണക്കിന് സർക്കാർ സൈനികരും കഴിയുന്നുണ്ട്.
2015ൽ സൗദി അറേബ്യ അറബ് സഖ്യത്തിന് നേതൃത്വം നൽകി യെമൻ ആഭ്യന്തരയുദ്ധത്തിൽ ഇടപെട്ടിരുന്നെങ്കിലും ഹൂതികളെ പരാജയപ്പെടുത്താൻ കഴിഞ്ഞിരുന്നില്ല. 2022ലെ വെടിനിർത്തൽ കരാർ വലിയ തോതിൽ നിലനിന്നെങ്കിലും ഈ വർഷം സംഘർഷം വീണ്ടും രൂക്ഷമായി. പോരാട്ടം ശക്തമായതോടെ യെമനിലെ ഭക്ഷ്യക്ഷാമവും കുടിയൊഴിപ്പിക്കലും കൂടുതൽ രൂക്ഷമായതായി വേൾഡ് ഫുഡ് പ്രോഗ്രാം മുന്നറിയിപ്പ് നൽകിയിട്ടുണ്ട്.
Summary: Yemen’s Saudi-backed government has announced a major military campaign to retake territory controlled by the Iran-backed Houthis. The move follows recent Houthi advances around the Bab el-Mandeb Strait and reports of attacks targeting Saudi oil infrastructure.
