മെഴ്സിഡസ്-മെയ്ബാക്ക് എസ് 580ഇ ഇന്ത്യയിൽ; വില 3.35 കോടി, ആദ്യഘട്ടത്തിൽ 30 യൂണിറ്റുകൾ | Mercedes-Maybach S 580e
കൊച്ചി: ആഡംബര വാഹന വിപണിയിൽ പുതിയ അധ്യായത്തിന് തുടക്കമിട്ട് ഇന്ത്യയിലെ ആദ്യത്തെ ഇലക്ട്രിഫൈഡ് മെഴ്സിഡസ്-മെയ്ബാക്ക് എസ് 580ഇ പ്ലഗ്-ഇൻ ഹൈബ്രിഡ് മോഡൽ അവതരിപ്പിച്ചു (Mercedes-Maybach S 580e). ആഡംബരവും വൈദ്യുത സാങ്കേതികവിദ്യയും സമന്വയിപ്പിക്കുന്ന വാഹനത്തിന് 3.35 കോടി രൂപയാണ് എക്സ്-ഷോറൂം വില. ആദ്യഘട്ടത്തിൽ രാജ്യത്ത് 30 എക്സ്ക്ലൂസീവ് യൂണിറ്റുകൾ മാത്രമാണ് ലഭ്യമാക്കിയിരിക്കുന്നത്.
3.0 ലിറ്റർ പെട്രോൾ പ്ലഗ്-ഇൻ ഹൈബ്രിഡ് പവർട്രെയിനും 4മാറ്റിക് ഓൾ-വീൽ ഡ്രൈവ് സംവിധാനവുമാണ് വാഹനത്തിന്റെ പ്രധാന സവിശേഷതകൾ. പെട്രോൾ എൻജിനും ഇലക്ട്രിക് മോട്ടോറും ചേർന്ന് 585 എച്ച്പി പരമാവധി കരുത്തും 750 എൻഎം ടോർക്കും ഉത്പാദിപ്പിക്കും. പൂർണമായും വൈദ്യുത ശക്തിയിൽ ഏകദേശം 100 കിലോമീറ്റർ വരെ സഞ്ചരിക്കാനാകുമെന്ന് കമ്പനി അവകാശപ്പെടുന്നു.
11 കിലോവാട്ട് എസി ചാർജിംഗിനൊപ്പം 60 കിലോവാട്ട് ഡിസി ഫാസ്റ്റ് ചാർജിംഗ് സംവിധാനവും വാഹനത്തിലുണ്ട്. സുരക്ഷയ്ക്കായി 15 എയർബാഗുകൾ, പ്രീ-സേഫ് സംവിധാനം, ലെവൽ-2 എഡിഎഎസ് ഡ്രൈവർ അസിസ്റ്റ് സാങ്കേതികവിദ്യ എന്നിവ നൽകിയിട്ടുണ്ട്. വെറും 4.8 സെക്കൻഡിൽ 0 മുതൽ 100 കിലോമീറ്റർ വേഗത കൈവരിക്കുന്ന വാഹനത്തിന്റെ പരമാവധി വേഗം മണിക്കൂറിൽ 250 കിലോമീറ്ററാണ്.
ആഡംബര അനുഭവത്തിന് കൂടുതൽ പ്രാധാന്യം നൽകുന്ന നിരവധി ഫീച്ചറുകളും എസ് 580ഇയിലുണ്ട്. 31 സ്പീക്കറുകളും 1,610 വാട്ട് ഔട്ട്പുട്ടുമുള്ള ബർമെസ്റ്റർ 4ഡി സറൗണ്ട് സൗണ്ട് സിസ്റ്റമാണ് പ്രധാന ആകർഷണങ്ങളിലൊന്ന്. പിൻഭാഗത്ത് എക്സിക്യൂട്ടീവ് സീറ്റുകൾ, വയർലെസ് ചാർജിംഗ്, മസാജ് ഫംഗ്ഷൻ തുടങ്ങിയ സൗകര്യങ്ങളോടുകൂടിയ ഫസ്റ്റ് ക്ലാസ് സീറ്റിംഗ് സംവിധാനമാണ് ഒരുക്കിയിരിക്കുന്നത്.
ഇന്ധനക്ഷമതയിലും വാഹനം ശ്രദ്ധേയമായ കണക്കുകളാണ് വാഗ്ദാനം ചെയ്യുന്നത്. ലിറ്ററിന് 34.48 കിലോമീറ്റർ ഇന്ധനക്ഷമതയാണ് കമ്പനി അവകാശപ്പെടുന്നത്. മനുഫാക്ടൂർ എക്സ്ക്ലൂസീവ് നാപ്പ ലെതർ ഉപയോഗിച്ചുള്ള ഇന്റീരിയറും ക്ലൗഡ് അധിഷ്ഠിത എയർമാറ്റിക് സസ്പെൻഷനും യാത്രാനുഭവം കൂടുതൽ മെച്ചപ്പെടുത്തുന്നു. എംബി ഡ്രൈവർ അസിസ്റ്റ് സാങ്കേതികവിദ്യയും വാഹനത്തിൽ ഉൾപ്പെടുത്തിയിട്ടുണ്ട്.
ഉയർന്ന നിലവാരത്തിലുള്ള ആഡംബര വാഹനങ്ങൾ ഉപഭോക്താക്കൾക്ക് നൽകുകയെന്ന കമ്പനിയുടെ ലക്ഷ്യത്തിന്റെ ഭാഗമാണ് പുതിയ മോഡലെന്ന് മെഴ്സിഡസ് ബെൻസ് ഇന്ത്യ മാനേജിംഗ് ഡയറക്ടറും സി.ഇ.ഒയുമായ സന്തോഷ് അയ്യർ പറഞ്ഞു. ഹൈബ്രിഡ് വാഹനങ്ങൾക്ക് ഉപഭോക്താക്കൾക്കിടയിൽ വർധിച്ചുവരുന്ന താൽപര്യവും പുതിയ മോഡലിന്റെ അവതരണത്തിന് പിന്നിലുണ്ടെന്ന് അദ്ദേഹം വ്യക്തമാക്കി.
മെഴ്സിഡസ് ബെൻസ് 140 വർഷത്തെ പാരമ്പര്യം ആഘോഷിക്കുന്ന ഘട്ടത്തിലാണ് പുതിയ മെയ്ബാക്ക് എസ് 580ഇ ഇന്ത്യയിലെത്തുന്നത്. ആഡംബരവും പ്രകടനശേഷിയും ഇലക്ട്രിഫൈഡ് ഡ്രൈവ് സാങ്കേതികവിദ്യയും ഒരുമിപ്പിക്കുന്ന പുതിയ മോഡൽ രാജ്യത്തെ പ്രീമിയം വാഹന വിഭാഗത്തിലെ ശ്രദ്ധേയമായ അവതരണമായി മാറുകയാണ്.
Story Summary:
Mercedes-Benz has launched the electrified Mercedes-Maybach S 580e in India at an ex-showroom price of ₹3.35 crore. Limited to 30 units initially, the plug-in hybrid luxury sedan combines a 585 hp powertrain with electric driving capability of around 100 km.




