Skip to content
November 20, 2026
⌕

‘പൊലീസ് എംപിമാരെ മർദിച്ചു’; ഡൽഹി പൊലീസ് നടപടിക്കെതിരെ രൂക്ഷ വിമർശനവുമായി പ്രിയങ്ക ഗാന്ധി | Priyanka Gandhi

October 7, 2026
Share this post to
Priyanka Gandhi

ന്യൂഡൽഹി: ഇന്ത്യ സഖ്യത്തിന്റെ പ്രതിഷേധ മാർച്ചിനിടെ ഡൽഹി പൊലീസ് സ്വീകരിച്ച നടപടിക്കെതിരെ രൂക്ഷ വിമർശനവുമായി കോൺഗ്രസ് നേതാവ് പ്രിയങ്ക ഗാന്ധി (Priyanka Gandhi). ജനാധിപത്യപരമായ പ്രതിഷേധങ്ങളെ കേന്ദ്ര സർക്കാർ അടിച്ചമർത്താൻ ശ്രമിക്കുകയാണെന്നും പൊലീസ് ബലം പ്രയോഗിച്ചതാണ് പ്രതിഷേധത്തിനിടെ സംഘർഷാവസ്ഥയ്ക്ക് കാരണമായതെന്നും പ്രിയങ്ക ഗാന്ധി ആരോപിച്ചു.

പൊലീസ് എംപിമാർക്കെതിരെ ബലം പ്രയോഗിച്ചെന്നും തന്നെ നിലത്തേക്ക് തള്ളിയിട്ടെന്നും ഇതേത്തുടർന്ന് ശരീരത്തിൽ നിരവധി പോറലുകൾ ഉണ്ടായെന്നും പ്രിയങ്ക ഗാന്ധി പറഞ്ഞു. തിരഞ്ഞെടുപ്പ് കമ്മിഷണറെ കാണാൻ അനുമതി തേടിയ പാർലമെന്റ് അംഗങ്ങളോട് പൊലീസ് ഇത്തരത്തിൽ പെരുമാറിയത് അംഗീകരിക്കാനാകില്ലെന്നും അവർ വ്യക്തമാക്കി.

“രാജ്യം മുഴുവൻ ഈ അക്രമം കാണുന്നുണ്ട്. പൊലീസ് എംപിമാരെ മർദിക്കുകയാണ്. പൊലീസുകാർ തന്നെയാണ് എന്നെ നിലത്തേക്ക് വലിച്ചെറിഞ്ഞത്. ശരീരത്തിൽ എല്ലായിടത്തും പോറലുകളുണ്ട്. ഇനി ഞങ്ങൾ ഇവിടെനിന്ന് മാറില്ല. അവർക്ക് കൂടുതൽ സേനയെ കൊണ്ടുവരാം. ഞാൻ ഇവിടെനിന്ന് ഒരടി പോലും മാറില്ല,” എന്നാണ് പ്രിയങ്ക ഗാന്ധിയുടെ പ്രതികരണം.

മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഇന്ത്യ സഖ്യം നടത്തിയ പ്രതിഷേധത്തിനിടെയാണ് രാഹുൽ ഗാന്ധി ഉൾപ്പെടെയുള്ള പ്രതിപക്ഷ നേതാക്കളെ പൊലീസ് കസ്റ്റഡിയിലെടുത്തത്. പ്രതിഷേധ മാർച്ച് തടയുന്നതിനിടെയുണ്ടായ സംഘർഷത്തെ തുടർന്ന് നിരവധി നേതാക്കളെ പൊലീസ് കസ്റ്റഡിയിലെടുക്കുകയായിരുന്നു.

സംഭവത്തിന് പിന്നാലെ ഡൽഹിയിലെ വിവിധ പ്രതിഷേധ കേന്ദ്രങ്ങളിൽ സംഘർഷാവസ്ഥ തുടരുകയാണ്. തിരഞ്ഞെടുപ്പ് നടപടികളിലെ സുതാര്യത ആവശ്യപ്പെട്ടും മുഖ്യ തിരഞ്ഞെടുപ്പ് കമ്മിഷണറുടെ രാജി ആവശ്യപ്പെട്ടുമാണ് പ്രതിപക്ഷം പ്രതിഷേധം ശക്തമാക്കിയിരിക്കുന്നത്.

Story Summary:
Congress leader Priyanka Gandhi has strongly criticised Delhi Police over the action taken against INDIA bloc leaders during their protest. She alleged that police used force against MPs and pushed her to the ground, while asserting that the opposition would continue its protest.

Get more updates from Pudukad News on Google