‘ഗർബയ്ക്ക് മതം നോക്കേണ്ടതില്ല’; അഹമ്മദാബാദിൽ ഹിന്ദുക്കളല്ലാത്തവർ വേദി വിടാൻ ആവശ്യപ്പെട്ട സംഭവത്തിൽ പ്രതികരിച്ച് ഗായകൻ ആദിത്യ ഗാധ്‌വി | Aditya Gadhvi Garba controversy
Current: മലയാളം
ഗുജറാത്തിലെ അഹമ്മദാബാദിൽ നവരാത്രി ആഘോഷങ്ങളുടെ ഭാഗമായി സംഘടിപ്പിച്ച ഗർബ പരിപാടിയിൽ ഹിന്ദുക്കളല്ലാത്തവരും മുസ്‌ലിംകളും വേദി വിട്ടുപോകണമെന്ന് പ്രഖ്യാപിച്ചതിനെച്ചൊല്ലി വിവാദം. പ്രശസ്ത നാടോടി ഗായകൻ ആദിത്യ ഗാധ്‌വി പങ്കെടുത്ത ‘റംഗ് മോർല ഫീറ്റ് ആദിത്യ ഗാധ്‌വി’ പരിപാടിക്കിടെയായിരുന്നു സംഭവം. വിവാദ പ്രഖ്യാപനത്തിൽ നിന്ന് ഗായകൻ അകലം പാലിച്ചു. (Aditya Gadhvi Garba controversy)
പരിപാടിക്കിടെ അവതാരകനും റേഡിയോ ജോക്കിയുമായ ആകാശ് ത്രിവേദിയാണ് വിശ്വഹിന്ദു പരിഷത്തിന്റെ (വിഎച്ച്പി) പേരിൽ പ്രഖ്യാപനം നടത്തിയത്. ഹിന്ദുക്കളല്ലാത്തവരും മുസ്‌ലിംകളും സ്വമേധയാ വേദി വിട്ടുപോകണമെന്നും സനാതന ധർമത്തിന്റെ സംരക്ഷണത്തിനായി വിഎച്ച്പി പ്രവർത്തകർ സ്ഥലത്തുണ്ടെന്നും അദ്ദേഹം പറഞ്ഞു. സഹായം ആവശ്യമുള്ളവർക്ക് വിഎച്ച്പിയുടെ ഹെൽപ്‌ലൈൻ നമ്പറിൽ ബന്ധപ്പെടാമെന്നും പ്രഖ്യാപനത്തിൽ വ്യക്തമാക്കി. പരിപാടി നടക്കുന്ന വേദികളിൽ ഹിന്ദുക്കളല്ലാത്തവരുടെ പ്രവേശനം തടയുന്നതിനായി വിഎച്ച്പി, ബജ്‌റംഗ് ദൾ പ്രവർത്തകർ പതിവായി എത്താറുണ്ടെന്ന് ഗുജറാത്ത് വിഎച്ച്പി സംഭവത്തെ ന്യായീകരിച്ച് പ്രതികരിച്ചതായാണ് റിപ്പോർട്ട്. പ്രഖ്യാപനത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ വലിയ വിമർശനമുയർന്നു.
സംഭവത്തിൽ തനിക്ക് പങ്കില്ലെന്ന് ആദിത്യ ഗാധ്‌വി ഇൻസ്റ്റഗ്രാം കുറിപ്പിലൂടെ വ്യക്തമാക്കി. തന്റെ സന്ദേശമോ നിർദേശമോ ആയിരുന്നില്ല ഇതെന്നും ഒരു സംഘം ആളുകൾ വേദിയുടെ പിന്നാമ്പുറത്ത് ഇടപെട്ട് താൻ ഒരിക്കലും ചെയ്യാത്ത കാര്യം തന്റെ വേദി ഉപയോഗിച്ച് നടത്തിയതാണെന്നും അദ്ദേഹം പറഞ്ഞു. തന്റെ ടീമിനോടോ അവതാരകനോടോ ഇക്കാര്യം ആലോചിച്ചിരുന്നില്ലെന്നും അവർക്ക് സംഭവത്തിൽ പങ്കില്ലെന്നും ഗാധ്‌വി വ്യക്തമാക്കി.
ഗർബയ്ക്ക് ഒരിക്കലും ആരുടെയും ജാതിയോ മതമോ ചോദിക്കേണ്ടിവന്നിട്ടില്ലെന്നും മറ്റൊരു കുറിപ്പിൽ അദ്ദേഹം പറഞ്ഞു. ഗുജറാത്തിലും ഇന്ത്യയുടെ മറ്റു ഭാഗങ്ങളിലും വിവിധ മതവിഭാഗങ്ങളിൽപ്പെട്ടവർ തലമുറകളായി ഒരുമിച്ച് ഗർബ കളിച്ചുവരുന്നുണ്ടെന്നും അതാണ് ഈ ആഘോഷത്തിന്റെ പ്രത്യേകതയെന്നും അദ്ദേഹം ചൂണ്ടിക്കാട്ടി. ഭക്തിയോടെയും ആദരവോടെയും എത്തുന്ന എല്ലാവർക്കും തന്റെ വേദിയിൽ സ്വാഗതമുണ്ടെന്നും സംഗീതവും ഭക്തിയുമാണ് തന്റെ വേദിയുടെ ലക്ഷ്യമെന്നും ഗായകൻ കൂട്ടിച്ചേർത്തു.
Summary: A controversy erupted at Ahmedabad’s “Rang Morla ft Aditya Gadhvi” Garba event after an announcement asked non-Hindus and Muslims to leave the venue. Singer Aditya Gadhvi distanced himself from the announcement, saying it was not his message and that people of all faiths are welcome at Garba events.
