അയർലൻറ്റിൽ എഐബി ഹൗസിംഗ് ലോൺ ഫിക്സഡ് റേറ്റ് കുറച്ചു; നിരവധി പേർക്ക് മാസ അടവിൽ കുറവ് വരും

അയർലൻഡിൽ ഭവനവായ്പയെടുത്തവർക്ക് ആശ്വാസം.നാല് വർഷത്തെ ഫിക്സഡ് നിരക്കിൽ കുറവ്.അയർലൻഡിലെ പ്രമുഖ ബാങ്കുകളിലൊന്നായ എഐബി നാല് വർഷത്തെ ഫിക്സഡ് മോർട്ട്ഗേജ് പലിശനിരക്കുകൾ കുറച്ചു. പുതിയ തീരുമാനം ഭവനവായ്പയെടുക്കാൻ ഉദ്ദേശിക്കുന്നവർക്കും നിശ്ചിത വ്യവസ്ഥകൾ പാലിക്കുന്ന നിലവിലെ ഉപഭോക്താക്കൾക്കും പ്രയോജനകരമാകും.

വായ്പയുടെ തുകയും വീടിന്റെ മൂല്യവുമായി ബന്ധപ്പെട്ട ലോൺ-ടു-വാല്യൂ (എൽടി വി) അനുപാതവും അനുസരിച്ചാണ് പുതുക്കിയ പലിശനിരക്കുകൾ ബാധകമാകുന്നത്. ചില വിഭാഗങ്ങളിൽ പലിശനിരക്ക് 0.35 ശതമാന പോയിന്റ് വരെ കുറച്ചിട്ടുണ്ട്. ഇതിലൂടെ യോഗ്യരായ ഉപഭോക്താക്കൾക്ക് പ്രതിമാസ തിരിച്ചടവിൽ കുറവുണ്ടാകാനും വായ്പയുടെ കാലയളവിൽ പലിശച്ചെലവ് ലാഭിക്കാനും സാധിക്കും.

€350,000 (മൂന്നര ലക്ഷം യൂറോ) മോർട്ട്ഗേജ് ബാക്കിയുള്ള ഒരാൾക്ക് എഐബി പ്രഖ്യാപിച്ച നാല് വർഷത്തെ ഫിക്സഡ് പലിശനിരക്ക് കുറവ് ലഭിക്കുകയാണെങ്കിൽ, വായ്പയുടെ കാലാവധിയും എൽ ടി വി അനുപാതവും അനുസരിച്ച് പ്രതിമാസ തിരിച്ചടവിൽ ഏകദേശം €46 മുതൽ €65 വരെ ലാഭിക്കാം. ഉദാഹരണത്തിന്, ബാക്കി വായ്പാ കാലാവധി 25 വർഷമാണെന്നും പലിശനിരക്ക് 3.60%-ൽ നിന്ന് 3.25%-ലേക്ക് കുറയുന്ന വിഭാഗത്തിലാണെന്നും കരുതിയാൽ, മാസത്തവണ ഏകദേശം €1,771-ൽ നിന്ന് €1,706 ആയി കുറയും. ഏകദേശം മാസം 65 യൂറോയുടെ കുറവ് ഈ കേസിൽ മാസ അടവിൽ ഉണ്ടാകും.

നാല് വർഷത്തെ ഫിക്സഡ് റേറ്റ് തിരഞ്ഞെടുക്കുന്നവർക്ക് നിശ്ചിത കാലയളവിൽ പലിശനിരക്ക് സ്ഥിരമായി നിലനിർത്താൻ കഴിയും. അതിനാൽ പ്രതിമാസ തിരിച്ചടവ് മുൻകൂട്ടി കണക്കാക്കാനും കുടുംബത്തിന്റെ സാമ്പത്തിക ചെലവുകൾ ആസൂത്രണം ചെയ്യാനും ഇത് സഹായിക്കും.

എന്നാൽ നിരക്കിലെ കുറവ് എല്ലാ ഉപഭോക്താക്കൾക്കും ഒരുപോലെ ബാധകമാകണമെന്നില്ല. നിലവിൽ ഫിക്സഡ് റേറ്റിലുള്ളവർക്ക് ഉടൻ പുതിയ നിരക്കിലേക്ക് മാറാൻ സാധിക്കുമോ എന്നത് അവരുടെ വായ്പാ കരാറിനെയും ബാങ്കിന്റെ നിബന്ധനകളെയും ആശ്രയിച്ചിരിക്കും. അതിനാൽ വായ്പയുള്ളവർ എ ഐ ബിയുമായി ബന്ധപ്പെട്ട് തങ്ങൾക്ക് ലഭ്യമായ നിരക്കുകളും മാറുന്നതിന്റെ വ്യവസ്ഥകളും പരിശോധിക്കുന്നത് ഉചിതമാണ്.