അജിത് അഗാർക്കർക്ക് പകരം രമേഷ് പവാർ ബി.സി.സി.ഐ സെലക്ഷൻ കമ്മിറ്റിയിലേക്ക്. പ്രഗ്യാൻ ഓജ പുതിയ ചീഫ് സെലക്ടറായേക്കും. അഭിമുഖം പൂർത്തിയാക്കി സി.എ.സി. പാർഥിവ് പട്ടേൽ അപേക്ഷിച്ചില്ല. ലക്ഷ്മൺ സെലക്ഷൻ യോഗങ്ങളിൽ പങ്കാളിയാകും. ദൊഡ്ഡ ഗണേഷ് ജൂനിയർ സെലക്ഷൻ തലവനായേക്കും

മുംബൈ: മുൻ ഇന്ത്യൻ സ്പിന്നർ രമേഷ് പവാർ ബി.സി.സി.ഐ സീനിയർ പുരുഷ സെലക്ഷൻ കമ്മിറ്റിയിലേക്ക് തെരഞ്ഞെടുക്കപ്പെടാൻ സാധ്യതയേറി. ചീഫ് സെലക്ടറായിരുന്ന അജിത് അഗാർക്കറുടെ കാലാവധി പൂർത്തിയായതിനെ തുടർന്ന് ബി.സി.സി.ഐ ക്ഷണിച്ച ഒഴിവിലേക്കാണ് പവാറിനെ പരിഗണിക്കുന്നത്.

അതേസമയം, നിലവിൽ സെലക്ഷൻ പാനലിലുള്ള മുൻ ഇന്ത്യൻ സ്പിന്നർ പ്രഗ്യാൻ ഓജയെ പുതിയ ചീഫ് സെലക്ടറായി ബി.സി.സി.ഐ നിയമിച്ചേക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

ഇന്ത്യൻ വനിതാ ക്രിക്കറ്റ് ടീമിന്റെ മുഖ്യ പരിശീലകനായി രണ്ട് വ്യത്യസ്ത ഘട്ടങ്ങളിൽ സേവനമനുഷ്ഠിച്ചിട്ടുള്ള രമേഷ് പവാർ, ഇന്ത്യക്കായി രണ്ട് ടെസ്റ്റുകളിലും 31 ഏകദിനങ്ങളിലും കളിച്ചിട്ടുണ്ട്.

ഒക്ടോബർ 15-ന് ക്രിക്കറ്റ് അഡ്വൈസറി കമ്മിറ്റി (CAC) നടത്തിയ അഭിമുഖത്തിൽ വസീം ജാഫർ, കോണർ വില്യംസ്, ജേക്കബ് മാർട്ടിൻ എന്നിവർക്കൊപ്പമാണ് പവാറും പങ്കെടുത്തത്. 

തുടക്കത്തിൽ ജൂനിയർ സെലക്ഷൻ കമ്മിറ്റിയുടെ തലവനാക്കാൻ വേണ്ടിയാണ് പവാറിനെ പരിഗണിച്ചിരുന്നതെങ്കിലും, അഭിമുഖത്തിന് ശേഷം അദ്ദേഹത്തെ സീനിയർ സെലക്ഷൻ പാനലിൽ ഉൾപ്പെടുത്താൻ ക്രിക്കറ്റ് അഡ്വൈസറി കമ്മിറ്റി തീരുമാനിക്കുകയായിരുന്നു.

അതേസമയം, അഗാർക്കറുടെ പിൻഗാമിയായി ശക്തമായി പരിഗണിക്കപ്പെട്ടിരുന്ന മുൻ വിക്കറ്റ് കീപ്പർ ബാറ്റർ പാർഥിവ് പട്ടേൽ ഈ പദവിയിലേക്ക് അപേക്ഷ സമർപ്പിച്ചില്ല. സെലക്ഷൻ കമ്മിറ്റിയുടെ പ്രവർത്തന ശൈലിയിൽ വരുത്തുന്ന സുപ്രധാന മാറ്റങ്ങളുടെ ഭാഗമായി, സെന്റർ ഓഫ് എക്സലൻസ് (CoE) മേധാവി വി.വി.എസ്. ലക്ഷ്മൺ ഇനിമുതൽ സെലക്ഷൻ കമ്മിറ്റി യോഗങ്ങളിൽ സ്ഥിരം പങ്കാളിയാകും.

കളിക്കാരുടെ ശാരീരികക്ഷമത, പരിക്കുകൾ, ലഭ്യത എന്നിവ സംബന്ധിച്ച വ്യക്തമായ വിവരങ്ങൾ സെലക്ടർമാർക്ക് കൃത്യസമയത്ത് ലഭ്യമാക്കാൻ ലക്ഷ്മണിന്റെ സാന്നിധ്യം സഹായിക്കും. കൂടാതെ, ജൂനിയർ സെലക്ഷൻ കമ്മിറ്റി തലവനായി കർണാടകയുടെ മുൻ ഇന്ത്യൻ പേസർ ദൊഡ്ഡ ഗണേഷ് നിയമിക്കപ്പെടാൻ സാധ്യതയുണ്ടെന്നും റിപ്പോർട്ടുകൾ വ്യക്തമാക്കുന്നു.