2014ൽ ലഭിച്ച ഇമെയിലിൽ രാമായണത്തിന് സംഗീതം നൽകുമെന്ന് പ്രവചനം; പഴയ സന്ദേശം പങ്കുവെച്ച് എ ആർ റഹ്മാൻ | AR Rahman Ramayana music

എ.ആർ. റഹ്മാൻ സംഗീതം ഒരുക്കുന്ന രാമായണ സിനിമയുമായി ബന്ധപ്പെട്ട് കൗതുകകരമായൊരു പഴയ അനുഭവം പങ്കുവെച്ചിരിക്കുകയാണ്. 2014ൽ സതീഷ് എന്നയാൾ അയച്ച ഇമെയിലിൽ രാമായണത്തിന് റഹ്മാൻ സംഗീതം നൽകുമെന്ന് സ്വപ്നം കണ്ടതായി പറഞ്ഞിരുന്നു. വർഷങ്ങൾക്കിപ്പുറം ഹോളിവുഡ് സംഗീതസംവിധായകൻ ഹാൻസ് സിമ്മറിനൊപ്പം രാമായണത്തിന്റെ സംഗീതത്തിൽ പ്രവർത്തിക്കുകയാണ് റഹ്മാൻ. (AR Rahman Ramayana music)

ഒക്ടോബർ 21ന് ചെന്നൈയിൽ നടന്ന ചിത്രത്തിന്റെ ആൽബം ലോഞ്ച് ചടങ്ങിലായിരുന്നു റഹ്മാൻ പഴയ ഇമെയിലിനെക്കുറിച്ച് വെളിപ്പെടുത്തിയത്. “2014ൽ സതീഷ് എന്നൊരു വ്യക്തി രാമായണത്തിന് ഞാൻ സംഗീതം നൽകുമെന്ന് മനസിൽ ഉറപ്പിച്ച് പറഞ്ഞിരുന്നു. ഒരു കാര്യം പങ്കുവയ്ക്കാനുണ്ട്,” എന്ന് പറഞ്ഞ ശേഷമാണ് അദ്ദേഹം സന്ദേശം സദസ്സിന് മുന്നിൽ വായിച്ചത്. “പുലർച്ചെ നിങ്ങൾ എന്റെ സ്വപ്നത്തിൽ പ്രത്യക്ഷപ്പെട്ടു. ഇത് യാഥാർഥ്യമാകുമെന്ന് ഞാൻ വിശ്വസിക്കുന്നു. ഇന്ത്യയിലും ലോകത്തിന്റെ വിവിധ ഭാഗങ്ങളിലും നിങ്ങൾ സംഗീതപരിപാടികൾ അവതരിപ്പിക്കുകയും മഹത്തായ ഇതിഹാസമായ രാമായണം അവതരിപ്പിക്കുകയും ചെയ്യുകയായിരുന്നു,” എന്നായിരുന്നു ഇമെയിലിലെ വാക്കുകൾ. വർഷങ്ങൾക്കുമുമ്പ് ലഭിച്ച സന്ദേശം ഇപ്പോഴത്തെ സിനിമാ സഹകരണവുമായി ചേർന്നുനിൽക്കുന്നതാണ് റഹ്മാൻ പങ്കുവെച്ച അനുഭവത്തെ ശ്രദ്ധേയമാക്കുന്നത്.

നിതേഷ് തിവാരി സംവിധാനം ചെയ്യുന്ന രാമായണ: റൈസ് ഓഫ് എ ലെജൻഡ് വാൽമീകി രാമായണത്തെ ആസ്പദമാക്കിയുള്ള രണ്ട് ഭാഗങ്ങളുള്ള ലൈവ്-ആക്ഷൻ ചിത്രമാണ്. രൺബീർ കപൂർ ശ്രീരാമനായും സായ് പല്ലവി സീതയായും യഷ് രാവണനായും സണ്ണി ഡിയോൾ ഹനുമാനായും രവി ദുബെ ലക്ഷ്മണനായും എത്തുന്നു. ചിത്രത്തിന്റെ നിർമാണത്തിൽ പ്രൈം ഫോക്കസ് സ്റ്റുഡിയോസ്, ഡി.എൻ.ഇ.ജി, യഷിന്റെ മോൺസ്റ്റർ മൈൻഡ് ക്രിയേഷൻസ് എന്നിവ പങ്കാളികളാണ്. ചിത്രത്തിന്റെ ആദ്യഭാഗം നവംബർ 5ന് ആഗോളതലത്തിൽ തിയറ്ററുകളിലെത്താനാണ് പദ്ധതിയിട്ടിരിക്കുന്നത്. രണ്ടാം ഭാഗം 2027ൽ റിലീസ് ചെയ്യുമെന്നാണ് റിപ്പോർട്ടുകൾ.

Summary: AR Rahman recalled an email he received in 2014 from a man named Sathish, who claimed to have dreamt that the composer would create music for the epic Ramayana. Rahman shared the message at the film’s album launch in Chennai, years before his collaboration with Hollywood composer Hans Zimmer on the project.