ട്രിപ്പിള്‍ ലോക്ക് മാറ്റം: ആദ്യ കടമ്പ കടന്ന് ഐറിഷ് സര്‍ക്കാര്‍
Current: മലയാളം
ഡബ്ലിന്‍: അയര്‍ലണ്ടിന്റെ സൈനികരെ വിദേശ ദൗത്യങ്ങള്‍ക്ക് അയയ്ക്കുന്നതിനുള്ള ‘ട്രിപ്പിള്‍ ലോക്ക്’ സംവിധാനത്തില്‍ മാറ്റം വരുത്തുന്ന ബില്ലിന് ഡോയില്‍ ആദ്യഘട്ട അംഗീകാരം. ബുധനാഴ്ച നടന്ന വോട്ടെടുപ്പില്‍ 79 അംഗങ്ങള്‍ അനുകൂലിച്ചപ്പോള്‍ 71 പേര്‍ എതിര്‍ത്തു. ഐക്യരാഷ്ട്രസഭയുടെ അനുമതി നിര്‍ബന്ധമാക്കുന്ന വ്യവസ്ഥ നീക്കാനുള്ള നീക്കമാണ് ഭരണ-പ്രതിപക്ഷ ഏറ്റുമുട്ടലിനു വഴിവച്ചത്.
എന്താണ് ട്രിപ്പിള്‍ ലോക്ക്?
പന്ത്രണ്ടിലധികം സൈനികരെ വിദേശ സമാധാനദൗത്യങ്ങള്‍ക്ക് നിയോഗിക്കുന്നതിന് സര്‍ക്കാര്‍, പാര്‍ലമെന്റിന്റെ അധോസഭയായ ഡോയില്‍, ഐക്യരാഷ്ട്രസഭ എന്നിവയുടെ അംഗീകാരം ആവശ്യപ്പെടുന്ന സംവിധാനമാണ് ട്രിപ്പിള്‍ ലോക്ക്. ഇതില്‍ യുഎന്‍ അനുമതി വേണമെന്ന നിബന്ധന ഒഴിവാക്കാനാണ് ബില്‍ ലക്ഷ്യമിടുന്നത്.
ആദ്യ വോട്ടെടുപ്പ് വിജയിച്ചതുകൊണ്ട് മാറ്റം നിയമമായിട്ടില്ല. ബില്‍ അടുത്തതായി കമ്മിറ്റി തലത്തിലുള്ള വിശദപരിശോധനയ്ക്കു വിധേയമാകും. ഇത് അടുത്ത മാസം നടക്കുമെന്നാണ് പ്രതീക്ഷ. വര്‍ഷാവസാനത്തിനുമുമ്പ് നിയമനിര്‍മാണം പൂര്‍ത്തിയാകുമെന്നാണ് റിപ്പോര്‍ട്ട്.
സമാധാനദൗത്യങ്ങള്‍ തുടരാനെന്ന് സര്‍ക്കാര്‍
അയര്‍ലണ്ടിന്റെ വിദേശ സമാധാനദൗത്യങ്ങള്‍ തുടരാന്‍ നിയമമാറ്റം അനിവാര്യമാണെന്നാണ് സര്‍ക്കാരിന്റെ നിലപാട്. യുഎന്‍ സുരക്ഷാസമിതിയിലെ സ്ഥിരാംഗങ്ങളുടെ വീറ്റോ അധികാരം അയര്‍ലണ്ടിന്റെ തീരുമാനങ്ങളെ തടയുന്ന സാഹചര്യമുണ്ടെന്ന് പ്രതിരോധമന്ത്രി ഹെലന്‍ മക്എന്റി ചൂണ്ടിക്കാട്ടി.
ഐറിഷ് സമാധാനസേനയെ എവിടേക്ക് അയയ്ക്കാമെന്ന കാര്യത്തില്‍ റഷ്യ ഉള്‍പ്പെടെയുള്ള രാജ്യങ്ങള്‍ക്ക് സ്വാധീനം ചെലുത്താന്‍ നിലവിലെ സംവിധാനം അവസരമൊരുക്കുന്നുവെന്നാണ് മന്ത്രിയുടെ വാദം. മാറിയ ആഗോള സാഹചര്യങ്ങള്‍ക്ക് അനുയോജ്യമല്ല നിലവിലെ ട്രിപ്പിള്‍ ലോക്ക് സംവിധാനമെന്നും അവര്‍ പറഞ്ഞു.
നിഷ്പക്ഷതയ്ക്ക് ഭീഷണിയെന്ന് പ്രതിപക്ഷം
അയര്‍ലണ്ടിന്റെ സൈനിക നിഷ്പക്ഷതയെ ദുര്‍ബലപ്പെടുത്തുന്നതാണ് നീക്കമെന്ന് പ്രതിപക്ഷം ആരോപിച്ചു. യുഎന്‍ അംഗീകാരമില്ലാതെ വിദേശ സൈനിക നടപടികളില്‍ പങ്കെടുക്കാന്‍ വഴിയൊരുക്കുന്നത് നിലവിലെ സംരക്ഷണവ്യവസ്ഥകള്‍ നീക്കുന്നതിനു തുല്യമാണെന്ന് സിന്‍ ഫെയ്ന്‍ നേതാവ് മേരി ലൂ മക്ഡൊണാള്‍ഡ് പറഞ്ഞു.
രാജ്യത്തെ യൂറോപ്യന്‍ സൈനിക സംവിധാനങ്ങളിലേക്കും നാറ്റോയുമായുള്ള കൂടുതല്‍ അടുപ്പത്തിലേക്കും നയിക്കാനുള്ള സാധ്യതയാണ് അവര്‍ ഉയര്‍ത്തിക്കാട്ടിയത്. നിഷ്പക്ഷതയുമായി ബന്ധപ്പെട്ട ഇത്തരമൊരു മാറ്റത്തില്‍ ജനങ്ങളുടെ അഭിപ്രായം ഹിതപരിശോധനയിലൂടെ തേടണമെന്നും മക്ഡൊണാള്‍ഡ് ആവശ്യപ്പെട്ടു.
അതേസമയം, ഫിയന്ന ഫെയ്ന്‍ അംഗങ്ങളായ ജോണ്‍ മക്ഗിന്നസും വില്ലി ഒ’ഡീയും ബുധനാഴ്ചത്തെ വോട്ടെടുപ്പില്‍ പങ്കെടുത്തില്ല. ആദ്യ കടമ്പ സര്‍ക്കാര്‍ മറികടന്നെങ്കിലും ബില്ലിന്റെ തുടര്‍പരിശോധനയിലും ശക്തമായ രാഷ്ട്രീയ പോരാട്ടത്തിനാണ് കളമൊരുങ്ങുന്നത്
