മുസ്ലിം ലീഗിനെതിരായ ബിജെപി വിമർശനങ്ങൾക്ക് രാഷ്ട്രീയ മറുപടി; മുഖ്യമന്ത്രി വിഡി സതീശനെ അഭിനന്ദിച്ച് കെപി നൗഷാദ് അലി | KP Noushad Ali Facebook post
Current: മലയാളം
മുസ്ലിം ലീഗിനെതിരായ ബിജെപിയുടെ ആരോപണങ്ങൾക്ക് രാഷ്ട്രീയമായി മറുപടി നൽകിയ മുഖ്യമന്ത്രി വി.ഡി. സതീശനെ അഭിനന്ദിച്ച് പൊന്നാനി എംഎൽഎ കെ.പി. നൗഷാദ് അലി. ഇന്ത്യൻ എക്സ്പ്രസിന് നൽകിയ അഭിമുഖത്തിൽ ബിജെപിയുടെ വിമർശനങ്ങളെ പ്രതിരോധിക്കുന്ന വ്യക്തമായ രാഷ്ട്രീയ നിലപാടുകൾ മുഖ്യമന്ത്രി അവതരിപ്പിച്ചെന്ന് അദ്ദേഹം ഫേസ്ബുക്ക് കുറിപ്പിൽ പറഞ്ഞു. (KP Noushad Ali Facebook post)
വയനാട്ടിൽ മുസ്ലിം ലീഗിന്റെ പച്ചക്കൊടിയെ പാകിസ്താൻ പതാകയുമായി ബന്ധപ്പെടുത്തി തെറ്റിദ്ധാരണ പരത്താനും അതിലൂടെ ധ്രുവീകരണം സൃഷ്ടിക്കാനും ബിജെപി ശ്രമിച്ചെന്നായിരുന്നു നൗഷാദ് അലിയുടെ വിമർശനം. ലീഗിനെയും പച്ചക്കൊടിയെയും ലക്ഷ്യമിട്ടുള്ള പരാമർശങ്ങൾ നരേന്ദ്ര മോദിയടക്കമുള്ള ബിജെപി നേതാക്കളിൽനിന്ന് ഉണ്ടായിട്ടുണ്ടെന്നും അദ്ദേഹം കുറിച്ചു. വിഭജനകാലത്തെ അഖിലേന്ത്യാ മുസ്ലിം ലീഗിനെയും ഇന്ത്യൻ യൂണിയൻ മുസ്ലിം ലീഗിനെയും ഒരുപോലെ ചിത്രീകരിക്കുന്ന സംഘപരിവാർ നിലപാടിനെ മുഖ്യമന്ത്രി തുറന്നുകാട്ടിയെന്ന് നൗഷാദ് അലി അഭിപ്രായപ്പെട്ടു. കഴിഞ്ഞ പതിറ്റാണ്ടുകളായി കേരളത്തിൽ മതസൗഹാർദം നിലനിർത്തുന്നതിൽ മുസ്ലിം ലീഗ് നൽകിയ സംഭാവനകളും സതീശൻ ഉയർത്തിക്കാട്ടിയതായി അദ്ദേഹം പറഞ്ഞു.
മുസ്ലിം ലീഗ് ദുർബലപ്പെട്ടാൽ കേരളത്തിന്റെ സാമൂഹികാന്തരീക്ഷത്തിലുണ്ടാകാവുന്ന പ്രത്യാഘാതങ്ങളെക്കുറിച്ചുള്ള മുഖ്യമന്ത്രിയുടെ നിലപാട് കേരളീയ പൊതുസമൂഹത്തിന്റെ ആശങ്കകളെ പ്രതിനിധീകരിക്കുന്നതാണെന്നും നൗഷാദ് അലി കൂട്ടിച്ചേർത്തു. കോൺഗ്രസും മുസ്ലിം ലീഗും തമ്മിലുള്ള ബന്ധത്തിന് അരനൂറ്റാണ്ടിലേറെ പഴക്കമുണ്ടെന്നും ലീഗ് കോൺഗ്രസിന്റെ പ്രധാന ഘടകകക്ഷിയാണെന്നും അദ്ദേഹം ഓർമിപ്പിച്ചു. മുസ്ലിം ലീഗിനെതിരായ ആരോപണങ്ങളെ നേരിടേണ്ടത് രാഷ്ട്രീയമായും ആശയപരമായുമാണെന്നും പച്ചക്കൊടി ഒളിപ്പിച്ചുവെക്കുകയല്ല വേണ്ടതെന്നും വ്യക്തമാക്കിയ നൗഷാദ് അലി, നിലപാട് തുറന്നുപറഞ്ഞ മുഖ്യമന്ത്രിക്ക് അഭിവാദ്യങ്ങൾ നേർന്നു.
Summary: Ponnani MLA K.P. Noushad Ali praised Chief Minister V.D. Satheesan for his remarks in an interview with The Indian Express on the BJP’s criticism of the Muslim League. Noushad Ali said the party’s role in maintaining communal harmony and its long-standing alliance with Congress should be addressed through political and ideological arguments.
