പഞ്ചാബിൽ വൈക്കോൽ കത്തിക്കൽ വർദ്ധിക്കുന്നു; 700-ലധികം ലംഘനങ്ങൾ രേഖപ്പെടുത്തി മലിനീകരണ നിയന്ത്രണ ബോർഡ്, തൻ തരൺ ജില്ലയിൽ മാത്രം 318 കേസുകൾ, കുറ്റക്കാർക്കെതിരെ എഫ്.ഐ.ആറും റെഡ് എൻട്രിയും
Current: മലയാളം
ചണ്ഡീഗഡ്: പഞ്ചാബില്‍ നെല്ല് കൊയ്ത്ത് സീസണിന് പിന്നാലെ വൈക്കോല്‍ കത്തിക്കുന്ന സംഭവങ്ങള്‍ വര്‍ദ്ധിക്കുന്ന പശ്ചാത്തലത്തില്‍ കര്‍ശന നടപടികളുമായി സംസ്ഥാന മലിനീകരണ നിയന്ത്രണ ബോര്‍ഡ്.
ഒക്ടോബര്‍ 27 വരെയുള്ള കണക്കുകള്‍ പ്രകാരം സംസ്ഥാനത്തൊട്ടാകെ 717 വൈക്കോല്‍ കത്തിക്കല്‍ സംഭവങ്ങളാണ് രേഖപ്പെടുത്തിയത്. വനം-പരിസ്ഥിതി ഉദ്യോഗസ്ഥര്‍ നടത്തിയ പരിശോധനയില്‍ 313 സ്ഥലങ്ങളില്‍ വൈക്കോല്‍ കത്തിച്ചതായി സ്ഥിരീകരിക്കുകയും 24 പ്രഥമ വിവര റിപ്പോര്‍ട്ടുകള്‍ രജിസ്റ്റര്‍ ചെയ്യുകയും ചെയ്തു.
വൈക്കോല്‍ കത്തിക്കലില്‍ തന്‍ തരണ്‍ ജില്ലയാണ് ഏറ്റവും മുന്നില്‍ നില്‍ക്കുന്നത്. ഇവിടെ 318 സംഭവങ്ങള്‍ റിപ്പോര്‍ട്ട് ചെയ്തതില്‍ 152 സ്ഥലങ്ങളില്‍ നിയമലംഘനം സ്ഥിരീകരിച്ചു.
ജില്ലയില്‍ 152 കേസുകളിലായി 7.80 ലക്ഷം രൂപ പരിസ്ഥിതി നഷ്ടപരിഹാര പിഴയായി ചുമത്തുകയും ഇതില്‍ 2.65 ലക്ഷം രൂപ ഈടാക്കുകയും ചെയ്തു. കൂടാതെ 64 എഫ്.ഐ.ആറുകള്‍ രജിസ്റ്റര്‍ ചെയ്യുകയും 152 കൃഷിയിടങ്ങള്‍ക്കെതിരെ ഔദ്യോഗികമായി ‘റെഡ് എന്‍ട്രി’ രേഖപ്പെടുത്തുകയും ചെയ്തിട്ടുണ്ട്.
അമൃതസറാണ് പട്ടികയില്‍ തൊട്ടുപിന്നിലുള്ളത്. ഇവിടെ റിപ്പോര്‍ട്ട് ചെയ്ത 154 സംഭവങ്ങളില്‍ 75 ഇടങ്ങളില്‍ നിയമലംഘനം സ്ഥിരീകരിച്ചു. അമൃതസറില്‍ 70 കേസുകളില്‍ നിന്നായി 3.35 ലക്ഷം രൂപ പിഴ ചുമത്തുകയും 2.85 ലക്ഷം രൂപ വസൂലാക്കുകയും ചെയ്തു.
കൂടാതെ 24 എഫ്.ഐ.ആറുകള്‍ രജിസ്റ്റര്‍ ചെയ്യുകയും 57 സ്ഥലങ്ങളില്‍ റെഡ് എന്‍ട്രി രേഖപ്പെടുത്തുകയും 186 മുന്നറിയിപ്പ് നോട്ടീസുകള്‍ അയക്കുകയും ചെയ്തതായി മലിനീകരണ നിയന്ത്രണ ബോര്‍ഡ് അറിയിച്ചു.
