അയർലണ്ടിൽ എംപ്ലോയ്മെന്റ് പെർമിറ്റ് ഓൺലൈൻ വിവരങ്ങൾ ചോർന്നു; പോർട്ടലിൽ സേവനങ്ങൾ ലഭ്യമല്ല
Current: മലയാളം
അയർലൻഡിലെ തൊഴിൽ പെർമിറ്റ് അപേക്ഷകൾക്കായുള്ള ഓൺലൈൻ സംവിധാനത്തിൽ (എംപ്ലോയ്മെന്റ് പെർമിറ്റ് ഓൺലൈൻ സിസ്റ്റം ) വിവരങ്ങൾ ചോർന്നതായി സംശയം. സൈബർ സുരക്ഷാ വീഴ്ച കണ്ടെത്തിയതിനെത്തുടർന്ന് സർക്കാർ പോർട്ടൽ താൽക്കാലികമായി അടച്ചുപൂട്ടി. ഒക്ടോബർ 29-ന് പുറത്തുവന്ന സംഭവത്തിൽ വിദേശ തൊഴിലാളികൾ, പുതിയ പെർമിറ്റിന് അപേക്ഷിക്കുന്നവർ, തൊഴിലുടമകൾ, ഏജന്റുമാർ എന്നിവർക്കിടയിൽ ആശങ്ക ഉയർന്നിട്ടുണ്ട്.പോർട്ടലിലെ സംശയാസ്പദമായ പ്രവർത്തനങ്ങൾ ശ്രദ്ധയിൽപ്പെട്ടതിനെത്തുടർന്നാണ് അധികൃതർ നടപടി സ്വീകരിച്ചത്.
ഉപയോക്താക്കളുടെ പേരുകൾ, ഇമെയിൽ വിലാസങ്ങൾ, അക്കൗണ്ട് സംബന്ധമായ വിവരങ്ങൾ എന്നിവ പുറത്തായിരിക്കാമെന്നാണ് പ്രാഥമിക വിലയിരുത്തൽ. സംഭവത്തെക്കുറിച്ച് ഡാറ്റാ പ്രൊട്ടക്ഷൻ കമ്മീഷനെ (ഡിപിസി) അറിയിക്കുകയും വിശദമായ അന്വേഷണം ആരംഭിക്കുകയും ചെയ്തിട്ടുണ്ട്.അതേസമയം, കൂടുതൽ സെൻസിറ്റീവായ വ്യക്തിഗത വിവരങ്ങൾ ചോർന്നതായി പ്രാഥമിക അന്വേഷണത്തിൽ കണ്ടെത്തിയിട്ടില്ലെന്നാണ് അധികൃതരുടെ വിശദീകരണം.
പോർട്ടൽ താൽക്കാലികമായി അടച്ചിട്ടുണ്ടെങ്കിലും നേരത്തേ സമർപ്പിച്ച തൊഴിൽ പെർമിറ്റ് അപേക്ഷകളുടെ നടപടികൾ തടസ്സപ്പെടില്ലെന്ന് സർക്കാർ വ്യക്തമാക്കിയിട്ടുണ്ട്. അപേക്ഷകളുടെ പരിശോധനയും തീരുമാനമെടുക്കുന്ന നടപടികളും തുടരും. പോർട്ടൽ ലഭ്യമല്ലാത്തതിനാൽ അപേക്ഷാ നടപടികൾ പൂർത്തിയാക്കാൻ കഴിയാത്തവർക്ക് ആവശ്യമായ സമയപരിധി ഇളവുകളും അനുവദിക്കും.സുരക്ഷാ പരിശോധനകളും സാങ്കേതിക നടപടികളും പൂർത്തിയാക്കിയ ശേഷം നവംബർ 3-ന് പോർട്ടൽ വീണ്ടും പ്രവർത്തനക്ഷമമാക്കാനാണ് അധികൃതരുടെ ലക്ഷ്യം.
തൊഴിൽ പെർമിറ്റ് നടപടികൾക്കായി ഈ ഓൺലൈൻ സംവിധാനത്തെ ആശ്രയിക്കുന്ന ആയിരക്കണക്കിന് വിദേശ തൊഴിലാളികൾക്കും തൊഴിലുടമകൾക്കും സംഭവവികാസം നിർണായകമാണ്. പോർട്ടൽ പുനഃസ്ഥാപിക്കുന്നതും അന്വേഷണത്തിലെ കൂടുതൽ വിവരങ്ങളും കാത്തിരിക്കുകയാണ് അപേക്ഷകർ.
