‘മുരശ്’ ചുഴലിക്കാറ്റ് ശക്തിപ്രാപിക്കുന്നു; ആന്ധ്രയിൽ വിമാന, ട്രെയിൻ സർവീസുകൾ റദ്ദാക്കി | Cyclone Murash

ന്യൂഡൽഹി: തെക്കുപടിഞ്ഞാറൻ ബംഗാൾ ഉൾക്കടലിൽ രൂപപ്പെട്ട ‘മുരശ്’ തീവ്ര ചുഴലിക്കാറ്റ് ശക്തിപ്രാപിച്ച് വടക്കുപടിഞ്ഞാറൻ ദിശയിൽ നീങ്ങുകയാണെന്ന് കേന്ദ്ര കാലാവസ്ഥാ വകുപ്പ് അറിയിച്ചു (Cyclone Murash). നവംബർ 3ന് പുലർച്ചെയോടെ തെക്കൻ ആന്ധ്രാപ്രദേശ് തീരത്ത് നെല്ലൂരിനും നർസാപൂരിനും ഇടയിൽ ഒംഗോളിന് സമീപം ചുഴലിക്കാറ്റ് കരതൊടുമെന്നാണ് പ്രവചനം.

കരയിൽ പ്രവേശിക്കുമ്പോൾ മണിക്കൂറിൽ 100 മുതൽ 110 കിലോമീറ്റർ വരെ വേഗതയിൽ കാറ്റ് വീശാൻ സാധ്യതയുണ്ട്. ചില സമയങ്ങളിൽ കാറ്റിന്റെ വേഗത മണിക്കൂറിൽ 120 കിലോമീറ്റർ വരെയാകാമെന്നും മുന്നറിയിപ്പുണ്ട്.

കേരളത്തിലും മഴയ്ക്ക് സാധ്യത

തമിഴ്നാട്, തെലങ്കാന, കേരളം തുടങ്ങിയ സംസ്ഥാനങ്ങളിലും മഴയ്ക്ക് സാധ്യതയുണ്ട്. തെലങ്കാനയിലെ ആറ് ജില്ലകളിൽ ഓറഞ്ച് അലേർട്ടും അഞ്ച് ജില്ലകളിൽ യെല്ലോ അലേർട്ടും പ്രഖ്യാപിച്ചിട്ടുണ്ട്.

10 ഇൻഡിഗോ വിമാന സർവീസുകൾ റദ്ദാക്കി

ചുഴലിക്കാറ്റ് മുന്നറിയിപ്പിന്റെ പശ്ചാത്തലത്തിൽ വിജയവാഡയിലെ ഗന്നവരം വിമാനത്താവളത്തിൽ നിന്നുള്ള 10 ഇൻഡിഗോ വിമാന സർവീസുകൾ റദ്ദാക്കി. കനത്ത കാറ്റും മഴയും വ്യോമഗതാഗതത്തെ ബാധിക്കാനുള്ള സാധ്യത കണക്കിലെടുത്താണ് മുൻകരുതൽ നടപടി.

വിമാനത്താവളത്തിലേക്ക് പുറപ്പെടുന്നതിന് മുമ്പ് അതത് വിമാനക്കമ്പനികളുമായി ബന്ധപ്പെട്ട് സർവീസ് സമയവും മറ്റ് വിവരങ്ങളും ഉറപ്പാക്കണമെന്ന് അധികൃതർ യാത്രക്കാരോട് നിർദേശിച്ചു.

ഒൻപത് ട്രെയിൻ സർവീസുകളും റദ്ദാക്കി

ചുഴലിക്കാറ്റിനെ തുടർന്നുള്ള സുരക്ഷാ മുൻകരുതലിന്റെ ഭാഗമായി ദക്ഷിണ തീര റെയിൽവേ ഒൻപത് ട്രെയിൻ സർവീസുകൾ റദ്ദാക്കിയിട്ടുണ്ട്. അടിയന്തര സാഹചര്യങ്ങൾ നേരിടുന്നതിനായി സോണൽ, ഡിവിഷണൽ ആസ്ഥാനങ്ങളിൽ 24 മണിക്കൂറും പ്രവർത്തിക്കുന്ന വാർ റൂമുകളും സജ്ജമാക്കിയിട്ടുണ്ട്.

റദ്ദാക്കിയ പ്രധാന ട്രെയിനുകൾ:

ട്രെയിൻ നമ്പർ 67225 – വിജയവാഡ–ഗൂഡൂർ പാസഞ്ചർ (നവംബർ 2)
ട്രെയിൻ നമ്പർ 67226 – ഗൂഡൂർ–വിജയവാഡ പാസഞ്ചർ (നവംബർ 3)
ട്രെയിൻ നമ്പർ 12744 – വിജയവാഡ–ഗൂഡൂർ എക്സ്പ്രസ് (നവംബർ 2)
ട്രെയിൻ നമ്പർ 12743 – ഗൂഡൂർ–വിജയവാഡ എക്സ്പ്രസ് (നവംബർ 3)
ട്രെയിൻ നമ്പർ 67235 – ഗുണ്ടൂർ–തെന്നാലി പാസഞ്ചർ (നവംബർ 2)
ട്രെയിൻ നമ്പർ 67236 – തെന്നാലി–ഗുണ്ടൂർ പാസഞ്ചർ (നവംബർ 3)
ട്രെയിൻ നമ്പർ 67237 – തെന്നാലി–റെപ്പല്ലെ പാസഞ്ചർ (നവംബർ 2)
ട്രെയിൻ നമ്പർ 67238 – റെപ്പല്ലെ–മാർക്കാപ്പൂർ പാസഞ്ചർ (നവംബർ 3)
ട്രെയിൻ നമ്പർ 67239 – മാർക്കാപ്പൂർ–തെന്നാലി പാസഞ്ചർ (നവംബർ 3)

Story Summary:
Cyclone ‘Murash’ has intensified over the southwest Bay of Bengal and is expected to cross the south Andhra Pradesh coast near Ongole early on November 3. Wind speeds could reach 100–110 kmph, with gusts up to 120 kmph. In view of the warning, 10 IndiGo flights from Vijayawada airport and nine train services have been cancelled. Rain is also likely in Tamil Nadu, Telangana and Kerala.