ഉക്രെയ്നിലെ ദുരിതാശ്വാസ കേന്ദ്രത്തിന് നേരെ റഷ്യൻ ആക്രമണം; മരണം 29 ആയി, 48 പേരെ കാണാനില്ല | Ukraine war

കീവ്: ഉക്രെയ്നിലെ തെക്കൻ മേഖലയിലുള്ള ദുരിതാശ്വാസ കേന്ദ്രത്തിന് നേരെയുണ്ടായ റഷ്യൻ ആക്രമണത്തിൽ മരിച്ചവരുടെ എണ്ണം 29 ആയി (Ukraine war). 48 പേരെ ഇനിയും കണ്ടെത്താനുണ്ടെന്നാണ് റിപ്പോർട്ടുകൾ. വൈദ്യുതി നിലയങ്ങളും മറ്റ് അടിസ്ഥാന സൗകര്യങ്ങളും ലക്ഷ്യമിട്ട് റഷ്യൻ ആക്രമണങ്ങൾ തുടരുന്നതിനിടെ ഡ്രോണുകൾ ഉപയോഗിച്ച് ഉക്രെയ്ൻ ശക്തമായ പ്രത്യാക്രമണവും നടത്തുന്നുണ്ട്.

ഉക്രെയ്നിലെ ഒൻപത് മേഖലകളെ ലക്ഷ്യമിട്ട് റഷ്യ 289 ആക്രമണ ഡ്രോണുകളും 17 ബാലിസ്റ്റിക് മിസൈലുകളും 59 ക്രൂയിസ് മിസൈലുകളും തൊടുത്തുവിട്ടതായി പ്രസിഡന്റ് വോളോഡിമിർ സെലെൻസ്കി വ്യക്തമാക്കി. അമേരിക്കൻ തിരഞ്ഞെടുപ്പ് സാഹചര്യം മുതലെടുക്കാനാണ് റഷ്യ ശ്രമിക്കുന്നതെന്നും അദ്ദേഹം ആരോപിച്ചു.

ദുരിതാശ്വാസ കേന്ദ്രത്തിനും അഭയകേന്ദ്രത്തിനും നേരെ ആക്രമണം

സപോറീഷ്യ മേഖലയിലെ കോമ്യുഷുവാഖ ഗ്രാമത്തിൽ ദുരിതാശ്വാസ സാമഗ്രികൾ വിതരണം ചെയ്തിരുന്ന സ്കൂൾ കെട്ടിടത്തിന് നേരെയാണ് ആദ്യം റഷ്യൻ ഗൈഡഡ് ബോംബുകൾ പതിച്ചത്. പിന്നാലെ തൊട്ടടുത്തുള്ള അഭയകേന്ദ്രത്തിനും ആക്രമണമുണ്ടായി. മരിച്ചവരിൽ നാല് പൊലീസ് ഉദ്യോഗസ്ഥരും രണ്ട് രക്ഷാപ്രവർത്തകരും ഉൾപ്പെടുന്നതായി റീജിയണൽ മിലിട്ടറി അഡ്മിനിസ്ട്രേഷന്റെ ആക്ടിങ് തലവൻ മിഖായേലോ സെമിക്കിൻ അറിയിച്ചു.

856 ഡ്രോണുകൾ വെടിവെച്ചിട്ടെന്ന് റഷ്യ

അതേസമയം, തിങ്കളാഴ്ച രാത്രി ഉക്രെയ്ൻ അയച്ച 856 ഡ്രോണുകൾ വെടിവെച്ചിട്ടതായി റഷ്യൻ പ്രതിരോധ മന്ത്രാലയം അവകാശപ്പെട്ടു. മോസ്കോ ലക്ഷ്യമാക്കി 493 ഡ്രോണുകൾ എത്തിയതായി നഗര മേയർ സെർജി സോബിയാനിൻ പറഞ്ഞു.

റഷ്യയിലെ യാറോസ്ലാവ്ളിലുള്ള എണ്ണശുദ്ധീകരണ ശാലയ്ക്ക് നേരെ ഉക്രെയ്ൻ നടത്തിയ ഡ്രോൺ ആക്രമണത്തിൽ രണ്ട് ജീവനക്കാർക്ക് പരിക്കേറ്റു. അടിസ്ഥാന സൗകര്യങ്ങൾക്കും കേടുപാടുകൾ സംഭവിച്ചതായി പ്രാദേശിക ഗവർണർ മിഖായേൽ യെവ്രായേവ് അറിയിച്ചു.

റഷ്യൻ അധിനിവേശ മേഖലയായ ക്രിമിയയിലെ ഊർജനിലയങ്ങൾക്ക് നേരെയുണ്ടായ ആക്രമണത്തെത്തുടർന്ന് തെക്ക്, പടിഞ്ഞാറ്, കിഴക്കൻ മേഖലകളിൽ വൈദ്യുതി നിയന്ത്രണം ഏർപ്പെടുത്തിയതായി റഷ്യൻ ഉദ്യോഗസ്ഥർ വ്യക്തമാക്കി.

Story Summary:
The death toll from an attack on a relief centre in Ukraine’s southern Zaporizhzhia region has risen to 29, with 48 people still reported missing. Ukrainian President Volodymyr Zelensky said Russia launched hundreds of drones and missiles targeting nine regions. Meanwhile, Russia claimed to have intercepted 856 Ukrainian drones, while Ukrainian strikes reportedly damaged an oil refinery in Yaroslavl and energy facilities in Crimea.