സ്വയംഭരണ എയ്ഡഡ്, സ്വാശ്രയ കോളജുകൾക്ക് ഇളവ് നൽകിയത് ഉന്നതവിദ്യാഭ്യാസ മേഖലയിൽ സമഗ്രമാറ്റത്തിന്: മന്ത്രി റോജി എം ജോൺ | Roji M John Higher Education Statement

കൊച്ചി: സ്വയംഭരണ എയ്ഡഡ്, സ്വാശ്രയ കോളജുകൾക്ക് ഇളവുകൾ നൽകാനുള്ള സർക്കാർ തീരുമാനത്തെ ന്യായീകരിച്ച് ഉന്നതവിദ്യാഭ്യാസ മന്ത്രി റോജി എം ജോൺ. കോഴ്സുകൾ ആരംഭിക്കുന്നതിലെ കാലതാമസം ഒഴിവാക്കുകയും വിദ്യാർഥികൾക്ക് കൂടുതൽ പഠനസൗകര്യങ്ങൾ ഒരുക്കുകയുമാണ് ലക്ഷ്യമെന്ന് മന്ത്രി പറഞ്ഞു. ഉന്നതവിദ്യാഭ്യാസ മേഖലയിൽ സമഗ്രമായ മാറ്റം കൊണ്ടുവരുന്നതിന്റെ ഭാഗമായാണ് പുതിയ തീരുമാനമെന്നും അദ്ദേഹം വ്യക്തമാക്കി. (Roji M John Higher Education Statement)

കേരളത്തിൽ മാത്രമാണ് സ്വയംഭരണ സ്ഥാപനങ്ങൾക്ക് പുതിയ കോഴ്സുകൾ ആരംഭിക്കാൻ സർക്കാരിന്റെയും സർവകലാശാലയുടെയും അനുമതി ആവശ്യമായി വരുന്നതെന്ന് മന്ത്രി ചൂണ്ടിക്കാട്ടി. യുജിസി മാനദണ്ഡങ്ങൾ പ്രകാരം ഓട്ടോണമസ് കോളജുകൾക്ക് പുതിയ കോഴ്സുകൾ തുടങ്ങാൻ ഇത്തരം അനുമതികൾ ആവശ്യമില്ല. നിലവിലെ രീതി സ്വയംഭരണ സ്ഥാപനങ്ങളുടെ അടിസ്ഥാന തത്വമായ അക്കാദമിക് സ്വാതന്ത്ര്യത്തിന് വിരുദ്ധമാണെന്നും അദ്ദേഹം പറഞ്ഞു. പല കോഴ്സുകളിലും സീറ്റുകൾ ഒഴിഞ്ഞുകിടക്കുന്ന സാഹചര്യമുണ്ട്. വിദ്യാർഥികൾക്ക് സംസ്ഥാനത്തുതന്നെ മികച്ച പഠനസൗകര്യങ്ങൾ ഒരുക്കേണ്ടതുണ്ട്. കാലത്തിനനുസരിച്ച് പുതിയ കോഴ്സുകൾ ആരംഭിക്കുകയും വിദ്യാർഥികളുടെ ആവശ്യങ്ങൾ പരിഗണിച്ച് നിലവിലുള്ള കോഴ്സുകൾ പുനഃക്രമീകരിക്കുകയും വേണം. വിദ്യാർഥികൾ വിദേശത്തേക്ക് പോകുന്നതിനെക്കുറിച്ച് ആശങ്കപ്പെടുന്നതിനുപകരം അവർക്ക് ആവശ്യമായ പഠനാന്തരീക്ഷം ഇവിടെ ഒരുക്കുകയാണ് വേണ്ടതെന്നും മന്ത്രി പറഞ്ഞു.

പുതിയ തീരുമാനത്തിന്റെ പേരിൽ സംവരണത്തിലോ മെറിറ്റ് അടിസ്ഥാനത്തിലുള്ള പ്രവേശനത്തിലോ മാറ്റമുണ്ടാകില്ലെന്നും റോജി എം ജോൺ വ്യക്തമാക്കി. സംവരണ തത്വങ്ങൾ കൃത്യമായി പാലിക്കപ്പെടും. പ്രതിപക്ഷത്തിന്റെ ആരോപണങ്ങൾ വസ്തുതകൾ മനസിലാക്കാതെയുള്ളതാണെന്നും വിദ്യാർഥികൾക്ക് കൂടുതൽ അവസരങ്ങൾ ലഭിക്കുന്നതിനെ എതിർക്കുന്നത് പിന്തിരിപ്പൻ സമീപനമാണെന്നും മന്ത്രി വിമർശിച്ചു.
സർക്കാർ കോളജുകൾക്കും കഴിഞ്ഞ ദിവസം പുതിയ കോഴ്സുകൾ അനുവദിച്ചിട്ടുണ്ട്. ഉന്നതവിദ്യാഭ്യാസ മേഖലയെ മറ്റ് സംസ്ഥാനങ്ങളിലേക്കും വിദേശരാജ്യങ്ങളിലേക്കും വിദ്യാർഥികൾക്ക് പോകേണ്ടിവരുന്ന സാഹചര്യമുണ്ടാക്കാതെ ശക്തിപ്പെടുത്തുകയാണ് സർക്കാരിന്റെ ലക്ഷ്യമെന്നും അദ്ദേഹം കൂട്ടിച്ചേർത്തു.

Summary: Kerala Higher Education Minister Roji M John defended the decision to grant concessions to autonomous aided and self-financing colleges. He said the move aims to reduce delays in starting courses, expand academic opportunities and bring comprehensive reforms to the higher education sector, without changing reservation or merit-based admission principles.